<p><span style="color: #000000;"><strong>(ចិន)៖</strong> ក្រុមបុរាណវិទូនៃប្រទេសចិន បានស្វែងរកឃើញ រូបគំនូរមួយដែលមានអាយុកាល ២,០០០ឆ្នាំ ត្រូវបានគូរជាប់ នៅក្នុងផ្នូរបុរាណ ស្ថិតនៅខេត្តស្វយ័ត អ៉ីណឺម៉ុងហ្គោលី (Inner Mongolia) ភាគខាងជើងប្រទេស។ នេះបើតាម ការចេញផ្សាយនៅមុននេះបន្តិច ដោយទីភ្នាក់ងារព័ត៌មានចិនស៊ិនហួរ នារសៀលថ្ងៃអង្គារ ទី១៩ ខែកក្កដា ឆ្នាំ២០១៦។</span></p>
<p><span style="color: #000000;">ផ្នូរខាងលើនេះ មានទីតាំងស្ថិតនៅទីវាលមួយក្បែរទីក្រុង Ordos ដែលជាកន្លែងក្រុមបុរាណវិទូចិន ធ្លាប់រកឃើញ លលាដ៏ក្បាលពីរ នៅក្នុងមឈូសពុកផុយមួយ ដែលមានផ្ទុកផងដែរ នូវគ្រឿងប្រើប្រាស់ប្រចាំថ្ងៃនានា។ នេះបើតាមការ បញ្ជាក់ថារបស់លោក Gao Xingchao អ្នកស្រាវជ្រាវមកពីសារមន្ទីរទីក្រុង Ordos។</span></p>
<p><span style="color: #000000;">គួរបញ្ជាក់ថា រូបគំនូរខាងលើនេះត្រូវបានគូរនៅលើជញ្ជាំង និងពិដាន ដែលមានក្រឡាផ្ទៃ ៣០ម៉ែត្រក្រឡា ហើយវា មានប្រមាណ ១០រូបភាព ដែលបង្ហាញប្រាប់អំពីជីវិត របស់នៅរបស់គ្រួសារម្ចាស់ផ្នូរ ដូចជាការធ្វើដំណើរ, ការផ្សងព្រេង, ការជួបជុំ និង ការចិញ្ចឹមសត្វផងដែរ។ បន្ថែមពីនេះទៀត វាក៏អមដោយរូបផ្កា នាគរហោះ និង ការហោះហើរនៃ បក្សាបក្សីជាច្រើនប្រភេទ ដើម្បីឲ្យជីវិតពោពេញដោយអ្វីគ្រប់យ៉ាងក្រោយពេលស្លាប់។</span></p>
<p><span style="color: #000000;">តាមសម្តីរបស់លោក Gao ប្រវត្តិនៃម្ចាស់ផ្នូរនេះ នៅមិនទាន់មាននរណាដឹងទេ ដោយសារតែមាន ការខ្វះខាតដានមួយ ចំនួនដើម្បីធ្វើការវិភាគ។ បើតាមការគណនាផ្នូរខាងលើនេះ ត្រូវបានសាងសង់ឡើង នៅសម័យរាជវង្សហានភាគខាង កើតចន្លោះឆ្នាំ ២៤ ដល់ ២២០ នៃគ.ស៕</span></p>
<p><span style="color: #000000;"><img src="http://4.bp.blogspot.com/-4mwy-oHArzE/VL_Vx-GWHRI/AAAAAAABOas/WH7sCaryXbM/s1600/China-murals_01.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ខ្មែរថកឃីង</span></p>