<p><span style="color: #000000;"><strong>(ភ្នំពេញ)៖</strong> ពានរង្វាន់ AFF U-16 Championship ឆ្នាំ២០១៦ បានឈានដល់ការប្រកួតវគ្គពាក់កណ្ដាលផ្ដាច់ព្រ័ត្រ ចាប់ពីរសៀលថ្ងៃទី២១ ខែកក្កដានេះហើយ ដោយក្រុមម្ចាស់ផ្ទះកម្ពុជា ត្រូវជួបក្រុមយុវជនវៀតណាម ក្រោយពេលក្រុមការពារតំណែងជើងឯកថៃ ត្រូវជួបក្រុមយុវជនមាឌធំអូស្ដ្រាលី ។ ចាំមើលតើក្រុមណាខ្លះ បានឡើងដល់វគ្គផ្ដាច់ព្រ័ត្រនៃពានរង្វាន់យុវជនក្រោមអាយុ ១៦ឆ្នាំនេះ?</span></p>
<p><span style="color: #000000;">សម្រាប់ការប្រកួតល្ងាចនេះ គូដែលអ្នកគាំទ្រទន្ទឹងរង់ចាំទស្សនាជាងគេ គឺក្រុម U-16 កម្ពុជា ជួបក្រុមយុវជនវៀតណាម ព្រោះនេះគឺជាលើកដំបូង ដែលក្រុមយុវជនកម្ពុជា ឡើងដល់វគ្គពាក់កណ្ដាលផ្ដាច់ព្រ័ត្រនៃពានរង្វាន់ថ្នាក់តំបន់នេះ។ យុវជនកម្ពុជា បានប្រកួតជម្រុះក្នុងពូល B ៤ប្រកួតឈ្នះ៣ និងចាញ់១ មាន ៩ពិន្ទុឈរលេខរៀងទី២ ហេតុនេះកម្ពុជា ក៏ត្រូវប្រឈមមុខជាមួយក្រុមលេខ១ ពូលA គឺក្រុមយុវជនវៀតណាមតែម្ដង។</span></p>
<p><span style="color: #000000;">លោក Inoue Kazanori គ្រូបង្វឹកក្រុមយុវជនកម្ពុជា ហាក់មិនមានការព្រួយបារម្ភអ្វីឡើយ ចំពោះការប្រកួតនេះ បើទោះបីលោកចាត់ទុកវៀតណាម គឺជាក្រុមខ្លាំងក៏ដោយ។ លោកថា លោកមិនអាចប៉ាន់ស្មានលទ្ធផលទុកមុនបានឡើយ ប៉ុន្ដែលោកនឹងព្យាយាមឲ្យអស់ពីលទ្ធភាព នៅក្នុងការជំរុញកូនក្រុមស្វែងរកជ័យជម្នះ និងបង្កើតប្រវត្តិសាស្រ្ដថ្មីមួយ ជូនប្រទេសកម្ពុជាឲ្យបាន។</span></p>
<p><span style="color: #000000;">ចំណែកការប្រកួតរវាងក្រុមការពារតំណែងជើងឯកថៃ និងក្រុមយុវជនអូស្រ្ដាលី ក៏ជាជំនួបដែលអ្នកស្នេហាវិស័យកីឡាចង់ដឹងផងដែរ ព្រោះក្រុមថៃ គឺជាខ្លាកំណាចមួយក្នុងតំបន់អាស៊ាន ខណៈយុវជនអូស្ដ្រាលី ជាក្រុមកីឡាករមាឌធំ។ លោក Chaiyong Khumpiam ក្រុមគ្រូបង្វឹកយុវជនថៃ ធ្លាប់បាននិយាយថា បើសិនជាអាច លោកចង់ជួបយុវជនវៀតណាម នៅវគ្គពាក់កណ្ដាលផ្ដាច់ព្រ័ត្រនេះជាងជួបវៀតណាម។</span></p>
<p><span style="color: #000000;">សម្រាប់ការប្រកួតខ្វែងពូលនេះ ចំពោះក្រុមទទួលបានជ័យជម្នះ នឹងមានឱកាសឡើងវគ្គផ្ដាច់ព្រ័ត្រ ដើម្បីប្រជែងយកតំណែងជើងឯកពានរង្វាន់យុវជនថ្នាក់តំបន់ ឆ្នាំ២០១៦នេះ។ ចំណែកក្រុមចាញ់ ក៏ត្រូវជួបគ្នា ដើម្បីដណ្ដើមយកចំណាត់ថ្នាក់លេខ៣ផងដែរ ដែលការប្រកួតនឹងធ្វើឡើងថ្ងៃតែមួយ នៅថ្ងៃទី២៣ ខែកក្កដានេះ នៅលើទីលានពហុកីឡដ្ឋានជាតិ ក្នុងរាជធានីភ្នំពេញ។</span></p>
<p><span style="color: #000000;">គួរបញ្ជាក់ថា ពានយុវជនថ្នាក់តំបន់នេះ បានដំណើរការប្រកួតកាលពីថ្ងៃទី១០ ខែកក្កដាកន្លងទៅ ដោយមាន ១១ប្រទេសចូលរួម និងបែងចែកជា ២ពូល ក្នុងនោះពូលA មានក្រុមយុវជនវៀតណាម អូស្រ្ដាលី ម៉ាយ៉ាន់ម៉ា ម៉ាឡេស៊ី សិង្ហបុរី និងក្រុមយុវជនហ្វីលីពីន។ រីឯពូលB មានក្រុមម្ចាស់ផ្ទះកម្ពុជា ឡាវ ទីម័រខាងកើត ប្រ៊ុយណេ និងក្រុមការពារតំណែងជើងឯកឆ្នាំចាស់ថៃ។</span></p>
<p><span style="color: #000000;">ជាលទ្ធផលគេបានរកឃើញក្រុមខ្លាំង ៤ក្រុមឡើងដល់វគ្គពាក់កណ្ដាលផ្ដាច់ព្រ័ត្រ គឺមានក្រុមយុវជនវៀតណាម អូស្រ្ដាលី ថៃ និងក្រុមយុវជនកម្ពុជា៕</span></p>
<p><span style="color: #000000;"><img src="https://scontent-kul1-1.xx.fbcdn.net/v/t1.0-9/13726754_1754272074812310_6296981366968394550_n.jpg?oh=3c48a5d8a852c925a23c26fbc2896084&oe=58200559" alt="" width="730" /></span></p>
<p><span style="color: #000000;"><img src="https://fbcdn-sphotos-a-a.akamaihd.net/hphotos-ak-xta1/v/t1.0-9/13782217_1754272078145643_8236659049584142913_n.jpg?oh=d3042c4bfadefb677194586f5c7c9757&oe=5833E033&__gda__=1478573006_e5e4bc83fe64670b3fc1ec1d1b643424" alt="" width="730" /></span></p>
<p><span style="color: #000000;">U-16 កម្ពុជា</span></p>
<p><span style="color: #000000;"><img src="https://fbcdn-sphotos-g-a.akamaihd.net/hphotos-ak-xfl1/v/t1.0-9/13754201_1754272111478973_4813399885613204038_n.jpg?oh=c5947805c2903d2558abf8aa58f31b73&oe=57EB2B92&__gda__=1479535831_7b2ee3c6290d3b55a8ab885d1e5cc98d" alt="" width="730" /></span></p>
<p><span style="color: #000000;">U-16 វៀតណាម</span></p>
<p><span style="color: #000000;"><img src="https://scontent-kul1-1.xx.fbcdn.net/v/t1.0-9/13726852_1754272068145644_4043644325574934364_n.jpg?oh=b683cb342c196d1f23d0a3eebc791b60&oe=58327659" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>