<p><strong>ភ្នំពេញៈ</strong> ថ្មីៗនេះ តារាសម្តែងជាតួឯកក្នុងរឿង "សន្យាស្នេហ៍" និងជាបេក្ខជន ប្រកួតប្រជែងក្នុងកម្មវិធី "អប្សរាAward" លោក អង់ ឆាយទី ត្រូវបានមិត្តភក្តិរួមសាលាជាមួយគ្នា ចោទប្រកាន់ថា លោកបានឆបោកម៉ូតូ ម៉ាកហុងដាឌ្រីមស៊េរី ២០១២ (ប្រើប៊ិច)មួយគ្រឿង ហើយគេចវេស មិនចេញមុខដោះស្រាយ រហូតមកពេលនេះ ។</p>
<p>តាមប្រភពគួរឲ្យទុកចិត្តមួយ បានបង្ហើបប្រាប់គេហទំព័រ LookingTODAY ថាតួឯកប្រុស ក្នុងរឿង "សន្យាស្នេហ៍" លោក អង់ ឆាយទី បានឆបោកម៉ូតូមិត្តភក្តិ ម៉ាកហុងដាឌ្រីម (អាសង់ ប៊ិចស៊េរី២០១២) ដោយដំបូងលោកបាន ពោលពាក្យខ្ចីគេជិះ ទៅថតមួយភ្លេត ហើយនឹងយកមកឲ្យមិត្តភក្តិវិញ ។ ប៉ុន្តែគិតរហូតមកដល់ ថ្ងៃទី២៣ ខែឧសភា ឆ្នាំ២០១៤ នេះគឺមានរយៈ ពេល១សប្តាហ៍ ហើយនៅតែមិនឃើញរូបលោក យកម៉ូតូមកឲ្យម្ចាស់ទេ ហើយទូរស័ព្ទទៅក៏មិនលើកដែរ ។</p>
<p>ប្រភពខាងលើនេះ បានប្រាប់ឲ្យដឹងបន្ថែមទៀតថា ម្ចាស់ម៉ូតូដែល លោក អង់ឆាយទី ឆបោកនោះ គឺជានិស្សិតរៀននៅ សាកលវិទ្យាល័យជាតិគ្រប់គ្រង (NUM) ហើយគ្មានអ្នកណានឹកស្មានដល់ទេថា តារាសម្តែងដែលមាន ឈ្មោះបោះសំឡេងក្នុងវិថីសិល្បៈរូបនេះ ក្លាយជាអ្នកឆបោកសោះឡើយ ។</p>
<p>ក្នុងករណីឆបោកនេះ បានកើតឡើង១សប្តាហ៍ហើយ ប៉ុន្តែមិត្តភក្តិរបស់លោក មិនទាន់ដាក់ពាក្យបណ្តឹងទេ ដោយគេនៅទុក ឱកាសចុងក្រោយឲ្យ លោក ឆាយទី ចេញមុខមកដោះស្រាយជាមួយគេ ព្រោះថារវាងពួកគេទាំងពីរ បានរាប់អានគ្នាច្រើនឆ្នាំហើយ និងជាមិត្តរួមថ្នាក់ជាមួយគ្នាទៀត ។ ប៉ុន្តែប្រសិនបើលោក នៅតែមិនអើពើដោះស្រាយ ទៀតជនរងគ្រោះអាចនឹងចាត់ការ ទៅតាមផ្លូវច្បាប់ ។</p>
<p>ប្រភពដដែលបានប្រាប់ឲ្យដឹងទៀតថា មូលហេតុដែលតារាសម្តែងវ័យក្មេង អង់ ឆាយទី កើតគំនិតឆបោកម៉ូតូមិត្តភក្តិបែបនេះ អាចបណ្តាលមកពីការញៀនល្បែង ឬជំពាក់ប្រាក់នរណាម្នាក់ បានជាធ្វើឲ្យលោកប្រព្រឹត្តិទង្វើបែបនេះ ។</p>
<p>បើទោះជាមានការលើកឡើង បែបនេះក្តី ប៉ុន្តែ LookingTODAY នៅមិនទាន់អាចសន្និដ្ឋានបាន ទាំងស្រុងទេថា ជាការពិត ឬយ៉ាងណា ដោយសារតែ LookingTODAY បានព្យាយាមទាក់ទងទៅ លោក អង់ ឆាយទី ដើម្បីសាកសួរពីរឿងនេះដែរ កាលពីល្ងាចថ្ងៃទី២៣ ខែឧសភានេះ ប៉ុន្តែលេខទូរស័ព្ទ ដែលលោកប្រើ ត្រូវបានបុរសម្នាក់លើក ហើយប្រាប់ថា “ច្រឡំលេខហើយ ខ្ញុំមិនមែន ឆាយទី ទេ លេខនេះ ខ្ញុំទិញប្រើយូរគ្រាន់បើហើយ ” ។</p>
<p>LookingTODAY បានព្យាយាមទៅកាន់លេខទូរស័ព្ទ មួយប្រព័ន្ធទៀត គឺ ០៧០ ៦៣០ ០០៩ ប៉ុន្តែមិនបានសម្រេចដដែល ព្រោះលេខទូរស័ព្ទនេះ ត្រូវបានបិទ ។ យ៉ាងណាក៏ដោយ LookingTODAY រង់ចាំស្វាគមន៍ ដោយក្ដីរីករាយបំផុត ចំពោះការបកស្រាយពី ម្ចាស់សាម៉ីខ្លួននៅពេលក្រោយ ដើម្បីឲ្យមហាជន អស់ការសង្ស័យ និងជាការស្ដាកិត្តិយស របស់លោកឡើងវិញ ក្នុងនាមជាតារាល្បីម្នាក់ ដែលកំពុងទទួលបាន ការគាំទ្រយ៉ាងច្រើន ពីទស្សនិកជន៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/May/id-098/S_0302.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/May/id-098/S_0303.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/May/id-098/S_0304.jpg" alt="" width="600" /></p>
<p style="text-align: right;"><a href="http://lookingtoday.com/index.php/entertainment-general-news/30670-2014-05-23-10-14-16.html" target="_blank">ផ្តល់សិទ្ធដោយ ៖ ដើមអម្ពិល</a></p>