<p><strong>ព័ត៌មានអន្តរជាតិ ៖</strong> មន្រ្តីក្រសួងមហាផ្ទៃ របស់រុស្ស៊ីបាននិយាយថា យ៉ាងហោចណាស់ មនុស្ស ចំនួន ០៥នាក់បានស្លាប់ និង ៤៥ នាក់ទៀតរងរបួស នៅពេលដែលរថភ្លើង ចំនួនពីរគ្រឿងបាន ប៉ះទង្គិចគ្នា នៅជិតទីក្រុងមូស្គូ ប្រទេស រុស្ស៊ី កាលពីរសៀលថ្ងៃអង្គារនេះ។</p>
<p>ទីភ្នាក់ងារព័ត៌មានចិន ស៊ិនហួ ចេញផ្សាយនៅរាត្រីថ្ងៃអង្គារ ទី២០ ខែឧសភាឆ្នាំ២០១៤ដោយផ្អែក តាមការផ្សាយ របស់ទីភ្នាក់ងារព័ត៌មាន រៀ ណូវូស្ទី ដែលបានដកស្រង់សម្តី អ្នកនាំពាក្យ នៃក្រុម ប្រតិ បត្តិការសង្គ្រោះ សុំមិនបញ្ចេញឈ្មោះថា«មនុស្សសរុប៥០នាក់បានរងរបួសក្នុងឧប្បតិ្ដហេតុ នោះ ប៉ុន្តែក្នុងចំណោមនោះមាន ០៥នាក់បានស្លាប់»។</p>
<p>ចំណែកប្រភពផ្សេងទៀត ពី ទីភ្នាក់ងារជំរុញផ្នែកច្បាប់ បានប្រាប់សារព័ត៌មាន អ៊ិនធ័រហ្វាក់ថា មនុស្សចំនួន ២៥ នាក់ ត្រូវគេរួសរាន់បញ្ជូន ទៅកាន់មន្ទីរពេទ្យដែលនៅជាយក្រុង មូស្គូ ក្នុងនោះ មាន ០៣នាក់ ត្រូវគេដឹកទៅសង្គ្រោះបន្ទាន់។ មន្រ្តីសង្គ្រោះបន្ទាន់បាននិយាយថា ចំនួនអ្នក ស្លាប់ អាចនឹងកើនឡើង ខណៈអ្នកដំណើរជាច្រើន ត្រូវបានគេទាញចេញពីគំនរបាក់បែក។</p>
<p><a class="thickbox" title="" href="/FileManager/Commons/2014/5/21/90-21-05-2014--11-27-41.jpg"><img src="/FileManager/Articles/mce/2014/5/21/90-21-05-2014--11-27-41.jpg" alt="" /></a></p>
<p>ឧប្បតិ្ដហេតុនេះ បានកើតឡើង កាលពីវេលាម៉ោង ១៣៖០០នាទី ម៉ោងនៅមូស្គូ នៅជិតស្ថានីយ៍ រថភ្លើង បេកាសូវ៉ូ ដែលមានចម្ងាយប្រមាណ ៧០គីឡូម៉ែត្រ ពីភាគនិរតីនៃទីក្រុង មូស្គូ ដោយ រថភ្លើង ដឹកឥវ៉ាន់មួយគ្រឿង បានរអិលធ្លាក់ផ្លូវ ទៅប៉ះនឹងរថភ្លើងដឹកអ្នកដំណើរមួយគ្រឿងទៀត ដែលធ្វើដំណើរពីទីក្រុង មូស្គូ ទៅទីក្រុង ម៉ូលឡូវ៉ាន់។</p>
<p>ជាមួយគ្នានោះដែរ ក្រុមហ៊ុន អយស្ម័យយានរុស្ស៊ីបាននិយាយថា «ការស៊ើបអង្កេត បឋមបាន បង្ហាញ ថា ហេតុការណ៍ប៉ះទង្គិចគ្នានេះ បានកើតឡើងដោយសារតែ រថភ្លើងដឹកទំនិញនោះខូច ទើបបណ្តាលឲ្យរត់ធ្លាក់ពីផ្លូវ ទៅប៉ះរថភ្លើង មួយគ្រឿងទៀត ហើយបើតាមប្រភពបានឲ្យដឹងថា រថភ្លើងដឹកទំនិញនោះ ជាកម្មសិទ្ធិរបស់ប្រទេស អ៊ុយក្រែន៕</p>
<p>ក្នុងឧប្បតិហេតុនេះ ក្រសួងសង្គ្រោះបន្ទាន់រុស្ស៊ី ក៏បានបញ្ជូនឧទ្ធម្ភាគចក្រចំនួន ០៧គ្រឿង ដើម្បី រួសរាន់ដឹកអ្នករបួសទៅកាន់មន្ទីរពេទ្យ ដែលនៅជិតនោះផងដែរ។ ចំណែកអាជ្ញាធររុស្ស៊ី ក៏បាន បើកការស៊ើបអង្កេត ដោយភ្ជាប់ជាមួយនឹងករណីឧក្រិដ្ឋកម្ម ៕</p>
<p style="text-align: right;">ប្រែសម្រួល ៖ កុសល<br />ប្រភព ៖ ស៊ីអិនអិន & ដើមអម្ពិល</p>