<div class="item-page">
<div>
<p><span style="color: #000000;"><strong>(ភ្នំពេញ)៖</strong> តារាចម្រៀងរបស់ផលិតកម្មភ្លេងរីខត កញ្ញា វ៉ាន់ នីឡា ទោះបីជាពេលនេះ រឿងអាស្រូវបែកធ្លាយរូបអាក្រាត នៅតែបន្តកើតមានសម្រាប់រូបនាង ដ៏គួឲ្យឈឺចាប់ក៏ពិតមែន ប៉ុន្តែតារាស្រីរូបនេះ នៅតែខំតស៊ូជំនះឧបសគ្គមិនរាថយឡើយ ខណៈការលើកទឹកចិត្ត ពីអ្នកសិល្បៈ ក៏ដូចជាទស្សនិកជនជាច្រើន បានផ្តល់កំលាំងចិត្តដល់នាងឲ្យរឹងមាំឡើងជាបន្តបន្ទាប់។ មិនតែប៉ុណ្ណោះ ដើម្បីបង្ហាញពីអំពើល្អ ក្នុងការជួយសង្គមតារាស្រី វ៉ាន់ នីឡា ថ្មីៗនេះ បានបរិច្ចាគថវិកាចំនួន៥០ ដុល្លារ ចូលរួមសកម្មភាព មនុស្សធម៌ ជួយកុមារក្រីក្រសហគមន៍ ក្នុងខេត្តមណ្ឌលគិរី ជាមួយ «មូលនិធិកុមារសាវិនកម្ពុជា»។</span></p>
<p><span style="color: #000000;">ប្រធានមូលនិធិកុមារ សាវិន កម្ពុជាលោក សាវិន ហ្វីលីព បានថ្លែងប្រាប់ Khmertalking ឲ្យដឹងថា តារាចម្រៀងកញ្ញា វ៉ាន់ នីឡា និងលោក សុខ ជំនោ កាលពីម្សិលមិញ បានឧបត្ថម្ភថវិកាចំនួន៥០ដុល្លារ ដើម្បីទិញកង់ និងសម្ភារៈសិក្សាជូនដល់កុមារសហគមន៍ ក្នុងខេត្តមណ្ឌលគិរី នៅថ្ងៃ ២៣ មិថុនា ២០១៦ ខាងមុខនេះ។</span></p>
<p><span style="color: #000000;">តារាប្រុសមានប្រជាប្រិយភាព និងល្បីល្បាញតាមរយៈកិច្ចការងារជួយសង្គម ព្រមទាំងការតួសម្តែងភាពយន្ត លោក សាវិន ហ្វីលីព បានបន្តថា មូលនិធិកុមារសាវិនកម្ពុជា សូមអរគុណកញ្ញា វ៉ានីទ្បា និងលោក សុខ ជំនោរ ដែលបានបរិច្ចាគថវិការចំនួន ៥០ ដុល្លារ ដើម្បីទិញកង់ និងសម្ភារៈសិក្សាជូនដល់កុមារសហគមន៍ ក្នុងខេត្តមណ្ឌលគិរី។</span></p>
<p><span style="color: #000000;">លោក សាវិន ហ្វីលីព បានបន្ថែមថា «ក្នុងនាមជាសិល្បករដូចគ្នា ខ្ញុំសូមសរសើរដល់ទឹកចិត្តសប្បុរស របស់ប្អូនស្រី ទោះបីពេលនេះប្អូនស្រី កំពុងមានរឿងអាស្រូវក៏ដោយ ហើយសូមអរគុណម្ដងទៀត ដល់លោក សុខ ជំនោរ ដែលបានចូលរួមចំណែក ចែករំលែកសេចក្ដីស្រឡាញ់ ដល់កុមារក្នុងសហគមន៍ទាំងនោះ!»។</span></p>
<p><span style="color: #000000;">សូមបញ្ជាក់ថា កាលពីថ្មីៗនេះតារាប្រុសលោក សាវិន ហ្វីលីព បានប្រកាស នៅលើបណ្តាញសង្គមហ្វេសប៊ុករបស់ខ្លួនថា លោកបានឯកភាពគ្នា ជាមួយតារាចម្រៀង លោក សាន ផានិត និង លោក DJ អាចារ្យធំ ក្នុងការស្វះស្វែងរកថវិកា ដើម្បីទិញកង់ចំនួន៣០គ្រឿង (ក្នុងមួយគ្រឿងថ្លៃ៤០ដុល្លា) នាំយកទៅចែកជូនដល់សិស្សានុសិស្ស ដែលជាកូនចៅរបស់ជនជាតិភាគតិច និងជាកុមារក្រីក្រនៅសាលារៀនបឋមសិក្សា «ពូតាង» សង្កាត់ រម្យនា ខេត្តមណ្ឌលគិរី។</span></p>
<p><span style="color: #000000;">តារាប្រុសលោក សាវិន ហ្វីលីព បានបញ្ជាក់ទៀតថា ចំពោះគម្រោងនៃការចែកកង់ និងសម្ភារៈសិក្សាដល់សិស្សក្រីក្រនេះ គឺធ្វើឡើងនៅថ្ងៃទី២៣ ខែមិថុនា ២០១៦ខាងមុខនេះ ពោលគឺចំថ្ងៃខួបកំណើតរបស់លោកតែម្ដង។ ដូច្នេះលោកសូមជូនដំណឹងនេះ ដល់សិល្ប-ករសិល្បការិនីសប្បុរសជនទាំងក្នុង និងក្រៅប្រទេសទាំងអស់ ដែលមានបំណងចង់ចូលរួម ចែករំលែកសេចក្ដីស្រឡាញ់ ដល់កុមារសហគមន៍ សូមមេត្តាជួយបរិច្ចាគ ជាអំណោយកង់ ឬសម្ភារៈសិក្សាដល់កុមារទាំងនោះ ដោយក្ដីអនុគ្រោះ ៕</span></p>
<p><span style="color: #000000;"><img src="https://scontent-sjc2-1.xx.fbcdn.net/v/t1.0-9/13407213_10202036774756258_499797174244040306_n.jpg?oh=d98a71200c11d1adc26ab79b3788374a&oe=57DB1E70" alt="" width="730" /></span></p>
<p><span style="color: #000000;"><img src="https://scontent-sjc2-1.xx.fbcdn.net/v/t1.0-9/13434682_10202036774996264_2341434792498284759_n.jpg?oh=be76232e5c50b25b1ecc49fffb8e7793&oe=57E34C45" alt="" width="730" /></span></p>
<p><span style="color: #000000;"><img src="https://scontent-sjc2-1.xx.fbcdn.net/v/t1.0-9/13442284_10202036775276271_1136654960503885522_n.jpg?oh=aee9c1b043173719c16df9daec26357e&oe=57D5EDF2" alt="" width="730" /></span></p>
<p><span style="color: #000000;"><img src="https://scontent-sjc2-1.xx.fbcdn.net/v/t1.0-9/13412999_10202036774636255_3177353172077338244_n.jpg?oh=c37016b68648a77915aeef7e18144f95&oe=57E4F21D" alt="" width="730" /></span></p>
<p><span style="color: #000000;"><img src="https://scontent-sjc2-1.xx.fbcdn.net/v/t1.0-9/13406724_1013359058745255_5666169011151835004_n.jpg?oh=884e1d6f19267fb2272951941ad99346&oe=57C21DEE" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ខ្មែរថកឃីង</span></p>
</div>
</div>