<p><span style="color: #000000;"><strong>(សេអ៊ូល)៖</strong> គ្រឿងយន្ដកសិកម្មប្រមាណ ១,០០០គ្រឿងរួមមានទំាងត្រាក់ទ័រ និងយានយន្តកសិកម្មជា ច្រើនគ្រឿងផេ្សងទៀត នឹងធ្វើដំណើរចូលទៅដល់ទីក្រុងសេអ៊ូល ដើម្បីចូលរួមក្នុងបាតុកម្មតវ៉ានៅថ្ងៃសុក្រនេះ ទាមទារឱ្យប្រធានាធិបតីកូរ៉េខាងត្បូង លោកស្រី ផាក គឺនហេ ចុះចេញពីតំណែង ខណៈបាតុកម្មតវ៉ាទ្រង់ទ្រាយធំ ដែលគេរំពឹងថានឹងមានបាតុករ ២លាននាក់ចូលរួមនឹងត្រូវធ្វើឡើងនៅថ្ងៃសៅរ៍ ស្អែកនេះ។ នេះបើតាមការចេញផ្សាយដោយទីភ្នាក់ងារសារព័ត៌មានចិន ស៊ិនហួរ នៅរសៀលថ្ងៃសុក្រ ទី២៥ ខែវិច្ឆិកា ឆ្នាំ២០១៦។</span></p>
<p><span style="color: #000000;">យោងតាមរូបភាពបង្ហោះដោយស្ថានីយ៍ទូរទស្សន៍នៅក្នុងស្រុក គេឃើញកសិករជាច្រើននាក់បើកត្រាក់ទ័រ និងយានយន្ដកសិកម្មរបស់ពួកគេ សំដៅចូលទៅក្នុង ទីក្រុងសេអ៊ូល ដោយក្នុងនោះមានដោតទង់ ដែលមានសរសេរអក្សរនៅពីលើនោះថា <strong>«ធានាស្ថេរភាពតម្លៃស្រូវ! ចាប់ខ្លួនលោកស្រី ផាក! លោកស្រី ផាក អើយចុះចេញទៅ!»</strong>។ ទន្ទឹមគ្នានោះដែរកងកម្លាំងប៉ូលិសក្រុងសេអ៊ូល បានហាតមឃាត់ចំពោះការបើកត្រាក់ទ័រចូលក្រុងក្រោមហេតុផលកកស្ទះចរាចរណ៍ ក៏ប៉ុន្តែតុលាការទីក្រុងសេអ៊ូល បានអនុញ្ញាតឱ្យក្រុមកសិករធ្វើបាតុកម្មតវ៉ា ក្នុងលក្ខខណ្ឌមិនឱ្យយកត្រាក់ទ័រចូលក្រុង។</span></p>
<p><span style="color: #000000;">គួរបញ្ជាក់ថា ក្រុមបាតុករជាកសិករបានធ្វើដំណើរតាមត្រាក់ទ័រ ចេញពីទីជនបទរបស់ពួកគេដោយចំណាយពេលជាង១០ថ្ងៃ ដើម្បីធ្វើដំណើរមកកាន់ទីក្រុងសេអ៊ូល ហើយពួកគេនឹងមានគំរោងប្រមូលផ្ដុំគ្នា នៅឯឧទ្យាន Sejongno ក្បែរទីលាន Gwanghwamun ស្ថិតនៅកណ្ដាលក្រុងសេអ៊ូល មុននឹងនាំគ្នាដើរហែរជាក្បួនឆ្ពោះទៅកាន់ វិមានប្រធានាធិបតីលោកស្រី ផាក គឺនហេ។ ការតវ៉ានេះរៀបចំឡើងដោយសម្ព័ន្ធកសិករកូរ៉េខាងត្បូង៕</span></p>
<p><span style="color: #000000;"><a class="thickbox" title="" href="/FileManager/Commons/2016/11/25/09e-25-11-2016--16-33-21.jpg"><img src="/FileManager/Articles/mce/2016/11/25/09e-25-11-2016--16-33-21.jpg" alt="" /></a><br /><br /></span></p>
<p style="text-align: right;"><span style="color: #000000;">ប្រភព ៖ ស៊ិនហួរ</span></p>