<p><span style="color: #000000;"><strong>(ភ្នំពេញ)៖</strong> អតីតម្ចាស់មេដាយមាសកីឡាស៊ីហ្គេម លើកទី៣ កាលពីឆ្នាំ១៩៦៥ លើវិញ្ញាសាចោលស្នលោកស្រី ណុល កន បានទទួលមរណភាពហើយ កាលពីថ្ងៃទី៣១ ខែធ្នូ ឆ្នាំ២០១៦ កន្លងទៅ ដែលនឹងប្រារព្ធពិធីបុណ្យ ៧ថ្ងៃ នៅថ្ងៃទី៤ ខែមករាស្អែកនេះ ប៉ុន្ដែក្រោយការស្លាប់របស់អតីតកីឡាការិនីអត្ដពលកម្មនេះ បានបន្សល់ទុកនូវបំណុលប្រមាណ ៥ពាន់ដុល្លារឲ្យកូន-ចៅសងជំនួស ដោយហេតុនេះកូនៗ ក៏បានធ្វើការអំពាវនាវរកជំនួយ ដើម្បីសម្រាលទុក្ខលំបាកក្នុងគ្រួសារ ដែលកំពុងជួបការខ្វះខាត។</span></p>
<p><span style="color: #000000;">លោកស្រី ខាន់ ចន្ត្រា កូនស្រីបង្កើតរបស់លោកស្រី ណុល កន បានឲ្យដឹងថា ម្ដាយរបស់ខ្លួនបានលាចាកលោកកាលពីថ្ងៃទី៣១ ខែធ្នូ ឆ្នាំ២០១៦ កន្លងទៅ ប៉ុន្ដែបានបន្សល់នូវបំណុលចំនួន ៥ពាន់ដុល្លារ ដែលម្ដាយបានខ្ចីគេមកសាងសង់ផ្ទះ ដែលកូន-ចៅក្នុងបន្ទុកត្រូវទទួលរាប់រង។ តែដោយសារបច្ចុប្បន្នគ្រួសារនៃសពពុំមានលទ្ធភាព និងខ្វះខាតថវិកាធ្វើបុណ្យឲ្យម្ដាយផង លោកស្រី ខាន ចន្ត្រា ក៏បានអំពាវនាវដល់សប្បុរសជនជួយសម្រាលទុក្ខលំបាក និងរៀបចំធ្វើបុណ្យជូនអតីត កីឡាការិនីជម្រើសជាតិខាងលើ តាមរយៈលេខទូរស័ព្ទ ០៩៦ ៣៧២ ៨១ ៧៧។</span></p>
<p><span style="color: #000000;">ទន្ទឹមនឹងការទទួលបានដំណឹងដ៏ក្រៀមក្រំនេះ ថ្នាក់ដឹកនាំអង្គភាពកីឡាក្រសួងមហាផ្ទៃ ក៏បានត្រៀមថវិកាចំនួន ១លានរៀល ដើម្បីចូលរួមសម្រាលទុក្ខលំបាកជាមួយគ្រួសារសពលោកស្រី ណុល កន ផងដែរ។ នេះបើយោងតាមការឲ្យដឹងពីមនុស្សជំនិតរបស់លោក ជា ប៊ុនហេង ប្រធានអង្គភាពកីឡាក្រសួងមហាផ្ទៃ ដែលគ្រោងនាំយកថវិកាខាងលើ ទៅប្រគល់ជូនគ្រួសារសពក្នុងពេលឆាប់ៗខាងមុខ ហើយអង្គភាពកីឡាក្រសួងមហាផ្ទៃ ក៏បានសម្ដែងការសោកស្ដាយ ចំពោះការបាត់បង់ធនធានកីឡា ដ៏មានស្នាដៃខាងលើផងដែរ៕</span></p>
<p><a class="thickbox" title="" href="/FileManager/Commons/2017/1/3/07a-03-01-2017--13-40-52.jpg"><img src="/FileManager/Articles/mce/2017/1/3/07a-03-01-2017--13-40-52.jpg" alt="" /></a></p>
<p><span style="color: #000000;"><img src="http://image.freshnewsasia.com/2016/ID-113/fn-2017-01-03-11-45-06-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-113/fn-2017-01-03-11-45-06-2.jpg" alt="" width="730" /></span></p>
<p> </p>
<div id="news_detail" class="postcontainer">
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>
</div>
<div class="detail_bottom_function">
<div class="facebook_like"></div>
</div>