<p><span style="color: #000000;"><strong>(សេអ៊ូល)៖</strong> លោក គីម ជុងណាំ ដែលជាបងប្រុសម្ដាយទីទៃរបស់លោក គីម ជុងអ៊ុន ទំនងជាធ្លាប់បានផ្ញើសំបុត្រ មួយច្បាប់ទៅកាន់ទីក្រុងព្យុងយ៉ាង ដើម្បីទាមទារប្រាក់មួយចំនួន មុននឹងលោកត្រូវបានគេធ្វើឃាត នៅឯព្រលានយន្ដហោះអន្តរជាតិទីក្រុងគូឡាឡាំពួរ កាលពីថ្ងៃទី១៣ ខែកុម្ភៈ កន្លងទៅ។ នេះបើតាមប្រធានវិទ្យាស្ថាន កូរ៉េសម្រាប់ប្រជាធិបតេយ្យ លោក Yoo Dong-ryul ដកស្រង់ដោយទីភ្នាក់ងារសារព័ត៌មានយ៉ុនហាប់ នៅថ្ងៃចន្ទទី២៧ ខែកុម្ភៈ ឆ្នាំ២០១៧។</span></p>
<p><span style="color: #000000;">ការអះអាងរបស់លោក Yoo Dong-ryul ធ្វើឡើងនៅក្នុងសន្និសិទសារព័ត៌មាននៅឯសភាជាតិនៅថ្ងៃចន្ទនេះ។ លោក Yoo លើកឡើងដូច្នេះថា៖ <strong>«បើទោះជា ព័ត៌មាននេះពុំត្រូវបានបង្ហើបដោយទីភ្នាក់ងារស៊ើបការសម្ងាត់ជាតិកូរ៉េខាងត្បូង NIS ក៏ដោយ ក៏ប៉ុន្តែលោក គីម ជុងណាំ ពិតជាធ្លាប់បានផ្ញើសំបុត្រមួយទៅ កាន់ប្អូនប្រុសរបស់ខ្លួនគឺលោក គីម ជុងអ៊ុន ដើម្បីទាមទារប្រាក់មួយចំនួន សម្រាប់ការចាយវាយប្រចាំថ្ងៃ ដោយសារតែលោកមានបញ្ហាហិរញ្ញវត្ថុ»</strong>។ តែទោះ បីជាបែបនេះក្ដី លោក Yoo មិនបានបញ្ជាក់ឱ្យច្បាស់នោះទេចំពោះប្រភពព័ត៌មាននេះដែលលោកទទួលបាន។</span></p>
<p><span style="color: #000000;">គួរបញ្ជាក់ថា ទីភ្នាក់ងារស៊ើបការសម្ងាត់ជាតិកូរ៉េខាងត្បូង NIS នៅថ្ងៃចន្ទដែរនេះ បាននិយាយចំៗតែម្ដងថា ក្រសួងសន្តិសុខ និងក្រសួងការបរទេសកូរ៉េខាងជើងគឺជាអ្នករៀបចំគំរោងសម្លាប់លោក គីម ជុងណាំ៕</span></p>
<p><span style="color: #000000;"><a class="thickbox" title="" href="/FileManager/Commons/2017/2/28/12b-28-02-2017--09-42-22.jpg"><img src="/FileManager/Articles/mce/2017/2/28/12b-28-02-2017--09-42-22.jpg" alt="" /></a><br /><br /></span></p>
<p style="text-align: right;"><span style="color: #000000;">ប្រភព ៖ យ៉ុនហាប់</span></p>