<p><span style="color: #000000;"><strong>(ភ្នំពេញ)៖</strong> New Star ជាខារ៉ាអូខេដែលបុរសៗចូលចិត្តទៅកម្សាន្តពេលយប់ ដោយសារតែមាននារីក្មេងៗកំដរច្រើននោះ កំពុងរងនូវការរិះគន់យ៉ាងខ្លាំងក្លាពីមហាជន ជាពិសេសលើបណ្តាញសង្គម Facebook រឿងដែលម្ចាស់ខារ៉ាអូខេនេះ អនុញ្ញាតឱ្យមានការរាំរបាំជូនពរ ដែលជារបាំប្រពៃណីដ៏ផូផង់របស់ខ្មែរ កំដរភ្ញៀវនៅក្នុងបន្ទប់ច្រៀង។</span></p>
<p><span style="color: #000000;">ក្រុមអ្នកលេង Facebook បាននាំគ្នារិះគន់ថា ខារ៉ាអូខេ New Star សម្រាប់ការកម្សាន្តពេលរាត្រីនេះ កំពុងបំផ្លាញប្រពៃណីដ៏ផូរផងរបស់ខ្មែរ ជាពិសេសរបាំជូនពរ ដែលជាសិល្បៈវប្បធម៌ល្អប្រពៃមួយ តែងត្រូវបានរៀបចំតែសម្រាប់ទទួលស្វាគមន៍ថ្នាក់ដឹកនាំធំៗ ក៏ដូចជាពិធីប្រពៃណីផ្សេងៗ។</span></p>
<p><span style="color: #000000;">អ្នកនាំពាក្យក្រសួងវប្បធម៌ និងវិចិត្រសិល្បៈ លោក ថៃ នរៈសត្យា បានចាត់ទុកថា ការយករបាំជូនពរទៅសម្តែងក្នុងបន្ទប់ខារ៉ាអូខេ គឺជាអំពើខុសឆ្គងរបស់ម្ចាស់ខារ៉ាអូខេ និង អ្នកដឹកនាំការសម្តែង ដែលធ្វើឱ្យអាប់ឱនដល់សិល្បៈវប្បធម៌ខ្មែរ។ លោកលើកឡើងថា <strong>«ខ្ញុំគិតថា វាបានធ្វើឱ្យស្រអាប់ទៅដល់កេរ្តិ៍ឈ្មោះ ទៅដល់អ្វីដែលយើងនាំគ្នាគោរពព្រោះថា យើងជាខ្មែរ ត្រូវតែថែរក្សាវប្បធម៌ជាតិ ទាំងរូបិយ៍ និងអរូបិយ៍»</strong>។</span></p>
<p><span style="color: #000000;">លោក នរៈសត្យា បានបន្ថែមថា <strong>«ការដែលយើងយកទៅសម្តែង ក៏យើងត្រូវចេះរើសកន្លែងដែលសំដែងដែរ មិនមែនដោយសារតែមូលហេតុសេដ្ឋកិច្ច មូលហេតុថវិកា ឬដើម្បីលុយ យើងចេះតែយកសិល្បៈវប្បធម៌ជាតិ ដែលមានតម្លៃផូរផង់របស់ខ្មែរ យកទៅសម្តែងទេ អញ្ចឹងវាមិនមែនជា ការផ្សព្វផ្សាយទេ តែជាការយកទៅបន្ថោក ជាន់ឈ្លី សិល្បៈវប្បធម៌ជាតិកម្ពុជា»</strong>។</span></p>
<p><span style="color: #000000;">សូមបញ្ជាក់ថា នាថ្មីៗនេះ បណ្តាញសង្គម Facebook បានចែកចាយបន្តគ្នាអំពីវីដេអូរាំរបាំជូនពរ នៅក្នុងបន្ទប់ច្រៀងដែលគេអះអាងថា ធ្វើឡើងនៅក្នុងខារ៉ាអូខេ New Star។ នៅក្នុងវីដេអូឃ្លីប មានរយៈពេល ១នាទី និង២៧វិនាទីនោះ បានបង្ហាញថា មានអ្នករបាំជូនពរ៤-៥នាក់ បានរាំ កំដរក្រុមអ្នកទៅកម្សាន្តនៅក្នុងខារ៉ាអូខេនោះ មានទាំងជនជាតិខ្មែរ និងបរទេស ដោយមានទាំងនារីកំដរផងដែរ ។ មជ្ឈដ្ឋានមួយចំនួន បានទាមទារឱ្យក្រសួងមានសមត្ថកិច្ចមានវិធានការ ចំពោះកំហុសឆ្គងនៅក្នុងខារ៉ាអូខេខាងលើ ដើម្បីការពារសិល្បៈវប្បធម៌ខ្មែរ។</span></p>
<p><span style="color: #000000;">Fresh News នៅអាចទំនាក់ទំនងទៅថៅកែ ឬអ្នកគ្រប់គ្រង នៅក្នុងខារ៉ាអូខេ New Star ដែលរងការចោទប្រកាន់ថាធ្វើឱ្យខូចសិល្បៈវប្បធម៌ខ្មែរនេះ បាននៅឡើយទេ នៅរសៀលថ្ងៃទី២១ ខែមេសា ឆ្នាំ២០១៦។</span></p>
<p><span style="color: #000000;">យ៉ាងណាក៏ដោយ អ្នកនាំពាក្យក្រសួងវប្បធម៌ បានអះអាងថា ក្រសួងកំពុងពិនិត្យមើលករណីនេះយ៉ាងយកចិត្តទុកដាក់ ហើយថាក្រសួងអាចនឹងមានវិធានការ ជាមួយក្រសួងពាក់ព័ន្ធ ដើម្បីឈានទៅរកការបញ្ឈប់ឱ្យមានការរាំរបាំប្រពៃណីបែបនេះ នៅក្នុងបន្ទប់ខារ៉ាអូខេ តទៅទៀត៕</span></p>
<p><span style="color: #3366ff;"><a href="https://www.facebook.com/freshnewsasia/videos/542936882544774/" target="_blank"><span style="color: #3366ff;">-ចុចទីនេះ ដើម្បីទស្សនាវីដេអូននេះ ទាំងអស់គ្នា </span></a></span></p>
<p style="text-align: right;"><span style="color: #000000;"><br />ផ្តល់សិទ្ធិដោយ ៖ ហ្រ្វេសញូវអាសុី </span></p>