<p><span style="color: #000000;"><strong>(ភ្នំពេញ)៖</strong> ភាពភ្ញាក់ផ្អើលជាមួយពាក្យពេចន៍រិះគន់ធ្ងន់ៗ បានលេចចេញជាហូរហែនៅលើទំព័រ Facebook ទៅលើសាកលវិទ្យាល័យ IIC បន្ទាប់ពីសាកលវិទ្យាល័យមួយនេះ បានប្រគល់សញ្ញាបត្របណ្ឌិតកិត្តិយសផ្នែកសេដ្ឋកិច្ចជូន ឧកញ៉ា ទ្រី ភាព ដែលបានសាងភាពមានបានជាមួយជំនួញឈើប្រណីត តាមរយៈការកាប់ព្រៃឈើនៅតាមបណ្តាខេត្តមួយចំនួន ក្រោមរូបភាពដីសម្បទានសេដ្ឋកិច្ចនោះ។</span></p>
<p><span style="color: #000000;">សាកលវិទ្យាល័យ IIC កាលពីរសៀលថ្ងៃទី១៥ ខែកុម្ភៈ បានបង្កើតក្រុមប្រឹក្សាវាយតម្លៃផ្តល់សញ្ញាបត្រកិត្តិយសជូន ដោយមានការចូលរួមពីសាស្ត្រាចារ្យបណ្ឌិតល្បីៗ ជាច្រើនរូបរួមទាំងតំណាងក្រសួងអប់រំ យុវជន និងកីឡាផងដែរ ដើម្បីពិនិត្យលក្ខណៈសម្បត្តិប្រគល់សញ្ញាបត្របណ្ឌិតកិត្តិយស ផ្នែកសេដ្ឋកិច្ចជូន ឧកញ៉ា ទ្រី ភាព។ ដោយការពិនិត្យឃើញថា ឧកញ៉ា ទ្រី ភាព បានខិតខំស្រាវជ្រាវ និងចងក្រងនូវសៀវភៅ ២ក្បាល ដែលក្នុងនោះ ១ក្បាលមានចំណងជើងថា «ដំណើរឆ្ពោះទៅរកភាពជោគជ័យលើវិស័យសេដ្ឋកិច្ច» និង ១ក្បាលទៀត មានចំណងជើងថា «ក្រ អាច មាន» និងបានពិនិត្យឃើញឧកញ៉ា ទ្រី ភាព បានសាងភាពមានបានពីបាតដៃទទេ នោះសាស្ត្រាចារ្យបណ្ឌិតចំនួន ១៥រូប បានសម្រេចផ្តល់សញ្ញាបត្របណ្ឌិតកិត្តិយសផ្នែកសេដ្ឋកិច្ចជូន ឧកញ៉ាទ្រី ភាព តែម្តង។</span></p>
<p><span style="color: #000000;">ឧកញ៉ា ទ្រី ភាព មានអតីតកាលជាកូនកសិករ ជាអ្នកឡើងត្នោតនៅក្នុងស្រុកកណ្តាលស្ទឹង ខេត្តកណ្តាល ហើយក៏មិនទទួលបានការ អប់រំជ្រៅជ្រះនោះដែរ។ នេះបើតាមការបញ្ជាក់ពីក្រុមគ្រួសារ និងសាច់ញាតិរបស់លោក។</span></p>
<p><span style="color: #000000;">ឧកញ៉ា ទ្រី ភាព ធ្លាប់មានជីវភាពយ៉ាប់យ៉ឺនខ្លាំង រហូតមានពេលខ្លះដាច់បាយ ក៏មានកាលពីអំឡុងឆ្នាំ២០០០ តែជីវិតរបស់លោកត្រូវបាន ប្រែក្លាយជាធូរធា និងរីកចម្រើនជាបន្តបន្ទាប់ រហូតក្លាយជាសេដ្ឋីនៅក្នុងរយៈពេលប្រមាណជាង ១០ឆ្នាំចុងក្រោយនេះ បន្ទាប់ពីមានការជួយជ្រោមជ្រែង ពីមន្រ្តីជាន់ខ្ពស់មួយរូប។ ជីវិតរបស់ឧកញ៉ា ទ្រី ភាព បានក្លាយជារីកចម្រើនខ្លាំង បន្ទាប់ពីរូបលោកទទួលបាន សិទ្ធិពីរាជរដ្ឋាភិបាលក្នុងការស្តារឈើពីបាតអាងវារីអគ្គិសនីអាតៃ ក្នុងខេត្តពោធិ៍សាត់ ហើយក៏ជាឱកាស ដែលរូបលោកប្រមូលទិញឈើប្រណីតក្នុងខេត្តមួយនេះ បានយ៉ាងច្រើនសន្ធឹកសន្ធាប់ទៅលក់ឲ្យឈ្មួញ។</span></p>
<p><span style="color: #000000;">ជាបន្តបន្ទាប់មកទៀត ក្រុមហ៊ុនរបស់ឧកញ៉ា ទ្រី ភាព ក៏ពង្រីកខ្លួនទៅកាប់ឈើនៅតាមបណ្តាខេត្តជាច្រើនទៀត ដូចជានៅរតនគិរី មណ្ឌលគិរី និង ព្រះវិហារ ក្រោមរូបភាពដីសម្បទានសេដ្ឋកិច្ចរបស់រាជរដ្ឋាភិបាល។ និយាយជារួមមកជីវិតរបស់ឧកញ៉ាដ៏ល្បាញល្បី រូបនេះ បានរីកចម្រើនរហូតដល់ក្លាយជាសេដ្ឋីមានលុយរាប់រយលានដុល្លារ គឺពឹងផ្អែកទាំងស្រុងទៅជំនួញព្រៃឈើ។</span></p>
<p><span style="color: #000000;">ដោយមើលឃើញពីការវិវឌ្ឍន៍ នៃជីវិតរបស់ឧកញ៉ា ទ្រី ភាព ពីអ្នកក្រក្លាយជាសេដ្ឋីយ៉ាងឆាប់រហ័សនេះហើយ ទើបសកលវិទ្យាល័យ IIC ប្រគល់សញ្ញាបត្របណ្ឌិត កិត្តិយសជូនលោកឧកញ៉ា កាលពីថ្ងៃទី១៥ ខែកុម្ភៈ ម្សិលមិញនេះ។ ការផ្តល់សញ្ញាបត្របណ្ឌិតកិត្តិយសនេះ នាំឲ្យផ្ទុះការរិះគន់យ៉ាងខ្លាំង ពីប្រជាពលរដ្ឋខ្មែរនៅលើបណ្តាញសង្គម Facebook។</span></p>
<p><span style="color: #000000;">អ្នកលេង Facebook ម្នាក់បានសរសេរថា <strong>«ចូលរួមអបអរសាទរ បណ្ឌិតបំផ្លាញព្រៃឈើ ជាធនធានកម្ពុជា ហើយកូនខ្មែរទាំងអស់ចាំថា សកលវិទ្យាល័យ IIC ក៏បានរួមចំណែកបំផ្លាញធនធានធម្មជាតិព្រៃឈើ ដែលជាសម្បត្តិ ដ៏មានតម្លៃរបស់ខ្មែរដែរ។ ខ្ញុំនិងប្រាប់បងប្អូន កូនក្មួយ និងសាច់ញាតិ ៧សន្តាន របស់ខ្ញុំ មិនឲ្យចូលសិក្សាសកលវិទ្យាល័យ IICនេះដាច់ខាត»</strong>។</span></p>
<p><span style="color: #000000;">អ្នកលេង Facebook ម្នាក់ទៀតបានលើកឡើងថា <strong>«មិនគួរសោះដែលលើកដំកើងជនដែលបំផ្លាញធនធានធម្មជាតិ ស្ទើរតែអស់ព្រៃឈើនៅក្នុងស្រុកខ្មែរទៅហើយនោះ មិនថាតែព្រៃឈើនៅខាងស្រុកខ្ញុំទេ គឺវាលដោយសារស្នាដៃគាត់ និងគូកនកូនចៅគាត់នឹងរលីងហើយ នៅមានមុខជាបណ្ឌិតទៀតហ្ន៎»</strong>។</span></p>
<p><span style="color: #000000;">អ្នកខ្លះបានលើកឡើងបែបបញ្ឆិតបញ្ឆៀងថា ចង់ប្តូរអាជីពទៅកាប់ឈើថែមទៀតផង ដើម្បីបានបណ្ឌិតហ្នឹងគេ <strong>«ហាស ហាស ហាស ... បណ្ឌិត ។ ស្អែកចង់ដូរអាជីពអ្នកកាប់ឈើ បំផ្លាញជាតិ និងគេដែរហើយ ក្រែងឡើងបណ្ឌិតហ្នឹងគេ ។ ចាំឈ្មោះសាកលវិទ្យាល័យនេះទុកសម្រាប់កូនចៅយើង»</strong>។</span></p>
<p><span style="color: #000000;">ប្រជាពលរដ្ឋខ្មែរម្នាក់ទៀត បាននិយាយដោយបង្ហាញភាពសោកស្តាយរបស់ខ្លួនថា <strong>«ភាពពិតជាការបន្លំភ្នែក, ឡប់ឡែ ឬជាការភូតកុហក មហាជន ដើម្បីឲ្យទ្រីភាពរស់នៅសាងអំពើបំផ្លាញបន្តទៀត។ ទ្រី ភាព ជាប់ឈ្មោះជាអ្នកបំផ្លាញព្រៃឈើខ្មែរ ធើ្វមានបាន និងការលើកតម្កើង ទ្រី ភាព ជាទីប្រឹក្សា និងទទួលបានសញ្ញាបត្រកិតិ្តយស ក៏ព្រោះចង់បញ្ជាក់ថា ទ្រី ភាព ជាមនុស្ស ដែលបានកសាងសេដ្ឋកិច្ច នៃប្រទេសនេះ»</strong>។</span></p>
<p><span style="color: #000000;">សូមបញ្ជាក់ថា ការរិះគន់នេះ នៅមានជាច្រើនទៀត តែ Fresh News សូមដកស្រង់នូវការរិះគន់តែមួយចំនួនប៉ុណ្ណោះ, ខាងក្រោមនេះជា Comment របស់បងប្អូនប្រជាពលរដ្ឋនៅលើ Facebook៕</span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xlf1/v/t1.0-9/12742796_938384102884111_3587639899518274791_n.jpg?oh=04abb4af08232e60d1f7a0b049a40337&oe=572BBE8D" alt="" width="730" /></span></p>
<p style="text-align: center;"><span style="color: #000000;"><img src="https://scontent-hkg3-1.xx.fbcdn.net/hphotos-xpa1/v/t1.0-9/3811_1558592947788404_6484600568277778951_n.jpg?oh=8490aa9f388a21cfd127141aa4c9bd25&oe=5764065F" alt="" width="730" /></span></p>
<p style="text-align: center;"><span style="color: #000000;"><img src="https://s3-ap-southeast-1.amazonaws.com/images.freshnews/fn.photo/Feb2016/photo_2016-02-16_19-11-19.jpg" alt="" width="730" /></span></p>
<p style="text-align: center;"><span style="color: #000000;"><img src="https://s3-ap-southeast-1.amazonaws.com/images.freshnews/fn.photo/Feb2016/photo_2016-02-16_19-11-20.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>