<p><span style="color: #000000;"><strong>(ភ្នំពេញ)៖</strong> ក្រសួងទេសចរណ៍ បានប្រកាសជាផ្លូវការអំពីការរៀបចំ ដាក់ចេញនូវចលនាប្រឡងប្រណាំង «បដិសណ្ឋារកិច្ចល្អ» លើកទី១ នៅកម្ពុជាដើម្បីចូលរួមលើកកម្ពស់គោលដៅទេសចរណ៍ ឱ្យក្លាយជាគោលដៅទេសចរ ប្រកបដោយភាពទាក់ទាញ។</span></p>
<p><span style="color: #000000;">ការប្រកាសរៀបចំចលនាប្រឡងប្រណាំង «បដិសណ្ឋារកិច្ចល្អ» លើកទី១ នៅកម្ពុជា នាពេលនេះ បានធ្វើឡើងបន្ទាប់ពីមានការអនុញ្ញាត ដោយរាជរដ្ឋាភិបាលកម្ពុជា ក្នុងនោះ ក្រសួងក៏តម្រូវឱ្យប្រតិបត្តិករទេសចរណ៍ទាំងអស់ចូលរួមក្នុងការប្រឡងប្រណាំងនេះផងដែរ ហើយលទ្ធផលនឹងប្រកាសនៅខែធ្នូ ឆ្នាំ២០១៦។</span></p>
<p><span style="color: #000000;">តាមរយៈសេចក្តីប្រកាសរបស់ក្រសួងទេសចរណ៍ កាលពីម្សិលមិញ បានឱ្យដឹងថា ចលនាប្រឡងប្រណាំង «បដិសណ្ឋារកិច្ចល្អ» នេះធ្វើឡើងផ្អែកលើស្តង់ដារវាយតម្លៃរបស់ភ្ញៀវទេសចរ ឬប្រជាពលរដ្ឋទៅលើសេវាបដិសណ្ឋារកិច្ច ដែលត្រូវបានបែងចែកជា ៣ប្រភេទរួមមាន៖ ១. បដិសណ្ឋារកិច្ចល្អក្នុងសេវាទេសចរណ៍ ២. បដិសណ្ឋារកិច្ចល្អក្នុងសេវាសាធារណៈរបស់ក្រុង/ខណ្ឌ និងសង្កាត់បេក្ខភាពក្នុងចលនាប្រឡងប្រណាំងទីក្រុងស្អាត ៣. បដិសណ្ឋារកិច្ចល្អ តាមច្រកទ្វារអន្តរជាតិ។</span></p>
<p><span style="color: #000000;">ក្នុងពិធីទទួលពានរង្វាន់ «កម្ពុជាជាគោលដៅទេសចរណ៍ល្អបំផុត សម្រាប់ឆ្នាំ២០១៦» ពីក្រុមប្រឹក្សាទេសចរណ៍ និងពាណិជ្ជកម្ម នៃសហភាពអឺរ៉ុប នាព្រឹកថ្ងៃទី២២ ខែមិថុនា ឆ្នាំ២០១៦នេះ លោក ថោង ខុន បានលើកឡើងថា ការដាក់ចេញចលនាប្រឡងប្រណាំង «បដិសណ្ឋារកិច្ចល្អ» គឺដើម្បីចូលរួមលើកកម្ពស់គោលដៅទេសចរណ៍ របស់កម្ពុជា ឱ្យក្លាយជាគោលដៅទេសចរ ប្រកបដោយភាពទាក់ទាញ និងភាពកក់ក្ដៅឋិតក្នុងការចងចាំរបស់ភ្ញៀវទេសចរគ្រប់គ្នា ជាមួយការស្វាគមន៍ ដោយភាពរួសរាយរាក់ទាក់ និងស្នាមញញឹមពីធម្មជាតិ របស់ប្រជាពលរដ្ឋកម្ពុជា។</span></p>
<p><span style="color: #000000;"><strong>ខាងក្រោមនេះ ជាសេចក្តីប្រកាសរបស់ក្រសួងទេសចរ៖</strong></span></p>
<p> </p>
<p><span style="color: #000000;"><img src="http://image.freshnewsasia.com/2016/019/05/fn-2016-06-29-16-00-33-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2016-06-29-16-00-33-1.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធដោយ ៖ ហ្រ្វេសញ៉ូវអាសុី</span></p>