<div class="item-page">
<p><span style="color: #000000;"><strong>(សៀមរាប)៖</strong> អំពើឃាតកម្មដែលបង្កឲ្យមានការតក់ស្លុត និងភ្ញាក់ផ្អើលយ៉ាងខ្លាំង នៅទឹកដីក្រុងសៀមរាប ដែលឃាតកម្នាក់ ចូលទៅអារ-កសម្លាប់ជនរងគ្រោះ៣នាក់ ជាបុគ្គលិកក្រុមហ៊ុនអាហារបំប៉ន់ បណ្ដាលឲ្យស្លាប់២នាក់ និងរបួសធ្ងន់ម្នាក់ ត្រូវបានសមត្ថកិច្ចអះអាងថា មិនមែនជាករណីប្លន់នោះឡើយ ពោលវាជារឿងគំនុំរវាងឃាតក និងក្រុមជនរងគ្រោះ។</span></p>
<p><span style="color: #000000;">ក្រោយមានអំពើឃាតកម្មដែលបានកើតឡើង នៅយប់ឆ្លងឆ្នាំ ស្ថិតនៅបន្ទប់ជួល ភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប ទើបមកដល់វេលាម៉ោង៦៖៣០នាទីល្ងាចថ្ងៃទី៤ ខែមករា ឆ្នាំ២០១៧ ជនដៃដល់ ត្រូវបានកម្លាំងនគរបាលក្រុងសៀមរាប សហការជាមួយកម្លាំងនគរបាលស្រុកជីក្រែង ចាប់ខ្លួននៅពេលជននេះ កំពុងជិះរថយន្ដតាក់ស៊ី ប្រុងបន្ដគេចខ្លួនឆ្ពោះទៅស្រុកកំណើត នៅឯស្រុករលារប្អៀរ ខេត្តកំពង់ឆ្នាំង។</span></p>
<p><span style="color: #000000;">លោក សាក់ ចំរើនរិទ្ធ អធិការរងទទួលផែនព្រហ្មទណ្ឌក្រុងសៀមរាប បានប្រាប់អង្គភាព Fresh News នៅថ្ងៃទី៥ ខែមករានេះថា ជនដៃដល់មានឈ្មោះ ជា សុខជីន អាយុ២៣ឆ្នាំ។ លោកបន្ដថា ក្រោយពេលកើតហេតុកម្លាំងនគរបាលរបស់លោក ក្រោមការបញ្ជាផ្ទាល់ពីសំណាក់ស្នងការនគរបាលខេត្ត និងស្នងការរងទទួលផែនព្រហ្មទណ្ឌ បានដេញប្រមាញ់ចាប់ជននេះ រហូតមកដល់រាជធានីភ្នំពេញ រួចបន្ដទៅកំពង់ឆ្នាំង ជាទឹកដីស្រុកកំណើត និងបន្ទាប់មក បន្ដដល់ទឹកដីខេត្តបន្ទាយមានជ័យ ហើយបន្ដគេចខ្លួនទៅស្រុកពូក ស្រុកក្រឡាញ់ និងចុងក្រោយដល់ស្រុកជីក្រែង ក៏ត្រូវស្ទាក់ចាប់បាននៅទីនោះ។</span></p>
<p><span style="color: #000000;">អធិការរងរូបនេះ បានបញ្ជាក់ថា មូលហេតុពិតប្រាកដនោះ ជារឿងគំនុំសុទ្ធសាធ ដោយផ្ដើមចេញមុនដំបូង ជនដៃដល់ និងជនរងគ្រោះបានស្គាល់គ្នាតាម Facebook រួចហើយជនរងគ្រោះបានប្រាប់ឲ្យចូលបម្រើការងារ ជាបុគ្គលិកក្រុមហ៊ុន អាហារបំប៉ន់ដូចពួកគេ។ ពេលដែលជនដៃដល់យល់ព្រមចូលបម្រើការងារ ស្រាប់តែក្រុមជនរងគ្រោះបានប្រាប់ឲ្យរូបគេ បង់លុយចំនួន២,០០០ដុល្លារ តែជនដៃដល់មិនមាន ហើយក្រុមជនរងគ្រោះនៅបន្ដបង្ខំ ទោះទៅខ្ចីលុយគេ ឬសុំពីគ្រួសារ។ ការបង្ខំឲ្យបង់លុយបែបនេះ ធ្វើឲ្យជនដៃដល់ខឹងសម្បារដោយសារចាញ់បោក ទើបរៀបចំផែនការសម្លាប់ជនរងគ្រោះតែម្ដង។</span></p>
<p><span style="color: #000000;">យ៉ាងណាក៏ដោយ អធិការរងរូបនេះបានអះអាងថា ជនដៃដល់ប្រព្រឹត្តតែម្នាក់ឯងប៉ុណ្ណោះ មិនមានបក្ខពួកផ្សេងទៀតនោះឡើយ។</span></p>
<p><span style="color: #000000;">លោកស្នងការរងខេត្តសៀមរាប លោក ភឿង ចិន្តារ៉េត បានបញ្ជាក់ថា ប្រតិបត្តិការតាមចាប់ខ្លួន ជនជាឃាតកនេះ ត្រូវបានធ្វើឡើងដោយកម្លាំងនគរបាលរបស់លោក បានសហការជាមួយកម្លាំងនគរបាលនាយកដ្ឋានក្រសួងមហាផ្ទៃ កម្លាំងនគរបាលតាមបណ្តាខេត្ត ព្រមទាំងកម្លាំងពាក់ព័ន្ធ និងប្រជាពលរដ្ឋល្អដែលបានជួយរាយការណ៍ពីករណីនេះ។</span></p>
<p><span style="color: #000000;">លោកស្នងការរងបានបន្តថា កម្លាំងជំនាញ និងកម្លាំងអធិការក្រុងបានបែងចែកកម្លាំងពិសេសជា៣ក្រុម ដោយមួយក្រុមសហការជាមួយកម្លាំងនគរបាលរាជធានីភ្នំពេញ ស្រាវជ្រាវនៅភ្នំពេញ, ក្រុមមួយទៀតសហការជាមួយកម្លាំង នគរបាលខេត្តកំពង់ឆ្នាំង ស្រាវជ្រាវនៅកំពង់ឆ្នាំង និងមួយក្រុមទៀតស្រាវជ្រាវ នៅខេត្តសៀមរាបតែម្ដង ដែលទីបំផុតជនសង្ស័យត្រូវបានចាប់ខ្លួននៅ ស្រុកជីក្រែង។ ជាមួយគ្នានេះលោក ភឿន ចិន្តារ៉េត ក៏សូមថ្លែងអំណរគុណដល់កម្លាំងនគរបាលពាក់ព័ន្ធទាំងអស់ ដែលបានចូលប្រតិបត្តិការ រហូតតាមចាប់ជនដៃដល់រូបនេះបាន។</span></p>
<p><span style="color: #000000;">លោកអធិការរងបានបន្តថា ជនសង្ស័យបានយកកាំបិតទៅចោលនៅក្នុងទឹកស្ទឹងប្រោះ ស្រុកកំពង់ស្វាយ ខេត្តកំពង់ធំ ហើយត្រូវបានកម្លាំងនគរបាលនាំខ្លួនទៅរកនៅទីនោះ ព្រមទាំងដកហូតទូរស័ព្ទមួយគ្រឿងផងដែរ។</span></p>
<p><span style="color: #000000;">សូមបញ្ជាក់ថា មនុស្ស៣នាក់ ត្រូវបានឃាតកចិត្តឆៅចូលអារ-ក ប្លន់សម្លាប់ដល់ក្នុងបន្ទប់ជួល បណ្តាលឲ្យស្លាប់២នាក់ក្នុងថ្លុកឈាម និងម្នាក់ទៀតរបួសធ្ងន់។ ហេតុការណ៍ឃាតកម្មដល់សាហាវនេះភ្ញាក់ផ្អើលនៅព្រឹកថ្ងៃទី០១ ខែមករា ឆ្នាំ២០១៧ នៅចំណុចបន្ទប់ជួល ស្ថិតក្នុងក្រុមទី៦ ភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប។</span></p>
<p><span style="color: #000000;">មន្ដ្រីនគរបាលមូលដ្ឋានបានឲ្យដឹងថា ក្នុងហេតុការណ៍ឃាតកម្មនេះ បណ្ដាលឲ្យជនរងគ្រោះ២នាក់ដេកស្លាប់ ក្នុងថ្លុងឈាម ដែលទី១៖ ឃុន សុយិន ភេទប្រុស អាយុ២៧ឆ្នាំ មុខរបរធ្វើការក្រុមហ៊ុនអាហារបំប៉ន មានស្រុកកំណើតនៅស្រុកឈូក ខេត្តកំពត, ទី២៖ ឈ្មោះ វេត រដ្ផា ភេទប្រុស អាយុ២៥ឆ្នាំ មានស្រុកកំណើត នៅស្រុកអូរជ្រៅ ខេត្តបន្ទាយមានជ័យ និងទី៣៖ ឈ្មោះ ឡេង ស្រីពៅ ភេទស្រី អាយុ២៨ឆ្នាំ រងរបួសធ្ងន់ ក្នុងចំណោមជនរងគ្រោះទាំង៣នាក់នេះ ២នាក់ជាប្ដីប្រពន្ធនឹងគ្នា៕</span></p>
<p><span style="color: #000000;"><img src="http://image.freshnewsasia.com/2017/010/fn-2017-01-05-14-43-25-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/010/fn-2017-01-05-14-43-25-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/001/fn-2017-01-04-23-22-07-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/ID-112/fn-2017-01-04-22-09-27-0.jpg" alt="" width="730" /></span></p>
<p><span style="color: #000000;"><strong>ឃាតកចិត្តឆៅ ដែលចូលអារ-ក ប្លន់សម្លាប់ជនរងគ្រោះ៣នាក់</strong></span></p>
<p><span style="color: #000000;"><img src="http://image.freshnewsasia.com/2016/019/05/fn-2017-01-01-05-07-40-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2017-01-01-05-07-40-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2017-01-01-05-07-40-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2017-01-01-05-07-40-3.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2017-01-01-05-07-40-4.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2016/019/05/fn-2017-01-01-05-07-40-5.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>
</div>