<p><span style="color: #000000;"><strong>(បាត់ដំបង)៖</strong> វិចិត្រករស្ថាបនារូបសំណាកលោកតាដំបងក្រញូង ដ៏ល្បីល្បាញប្រចាំខេត្តបាត់ដំបង ដែលគេហៅជាទូទៅនៅក្នុងខេត្តថា «ឳតាដំបងគ្រញូង» បានទទួលមរណភាព នាព្រឹកមិញនេះដោយរោគាពាធ។</span></p>
<p><span style="color: #000000;">លោកតា ផូ សុងហេង អាយុ៧៥ឆ្នាំ ជាវិចិត្រករដៃឯក សាងសង់រូបសំណាកតាដំបងក្រញូង ក្នុងខេត្តបាត់ដំបង បានដួលសន្លប់ក្នុងបន្ទប់ទឹក កាលពីរាត្រីថ្ងៃអង្គារ ឯលំនៅដ្ឋានរបស់លោក ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង។</span></p>
<p><span style="color: #000000;">រំពេចនោះសមាជិកគ្រួសារបានបញ្ជូនទៅដល់មន្ទីរពេទ្យ ជាបន្ទាន់ដើម្បីសង្គ្រោះជីវិត ប៉ុន្តែជាអកុសល ក្រោយពីថតពិនិត្យខួរក្បាល ក្រុមគ្រូពេទ្យប្រាប់ថា ឈាមបានច្រាលពេញខួរក្បាលមិនអាចសង្គ្រោះបាន។ លុះដល់ម៉ោង៦ព្រឹកថ្ងៃទី៨ មីនានេះ លោកតាបានទទួលមរណភាព ។</span></p>
<p><span style="color: #000000;">អ្នកខេត្តបាត់ដំបង ឬអ្នកស្គាល់ តែងតែគោរពរូបសំណាកលោកតាតំបងក្រញូង ប៉ុន្តែមិនបាននឹកដល់វិចិត្រករទេ ឬក៏ភាគតិចណាស់ដែលបាន នឹកឃើញ។ វិចិត្រករម្នាក់ គឺលោក ផូ សុងហេង ដែលទទួលមរណៈភាពនៅថ្ងៃនេះឯង។</span></p>
<p><span style="color: #000000;">ក្រៅពីនេះលោកក៏មានស្នាដៃរចនា នៅតាមទីអាមជាច្រើនក្នុងខេត្តបាត់ដំបង និងតាមខេត្តផ្សេងៗទៀត ជាពិសេសលោកធ្លាប់ឆ្លាក់ក្បាច់អាគារខ្លះ ក្នុងព្រះបរមរាជវាំង និងក្បាច់នៅតាមអគារវិទ្យសល័យជាស៊ីមបឹងកេងកង ក្នុងរាជធានីភ្នំពេញផងដែរ។ ក្នុងជីវិតជាវិចិត្រករ លោក ផូ សុខហេង មានជីវភាពយ៉ាប់យឺនខ្លាំងណាស់ រហូតដល់ប៉ុន្មានឆ្នាំចុងក្រោយនេះ លោក និងភរិយា បានសម្រេចប្រកបរបបើកហាងលក់សាច់ពិសេស នៅក្រោយស្នងការខេត្តបាត់ដំបង។</span></p>
<p><span style="color: #000000;">ការចាប់យកមុខរបរថ្មី ជាអ្នកលក់សាច់ឆ្កែដ៏ល្បីល្បាញ នៅក្នុងខេត្តបាត់ដំបង បានធ្វើឲ្យគាត់ឃ្លាតឆ្ងាយពីជំនាញពិតប្រាកដ ហើយចាប់តាំងពីពេលនោះមក អាជិពជាវិចិត្រកររបស់លោក ត្រូវបានជីកកប់ចោលដោយសារតែប្រែក្លាយមុខរបរថ្មីដើម្បីជីវភាព។</span></p>
<p><span style="color: #000000;">សូមវិញ្ញណក្ខ័ន្ធលោក ផូ សុងហេង បានសម្រេចនូវសុគតិភពកុំបីឃ្លាងឃ្លាតឡើយ៕</span></p>
<p><span style="color: #000000;"><img src="http://image.freshnewsasia.com/2017/112/fn-2017-03-08-19-46-37-0.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/112/fn-2017-03-08-19-46-37-1.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/112/fn-2017-03-08-19-46-37-2.jpg" alt="" width="730" /></span></p>
<p><span style="color: #000000;"><img src="http://image.freshnewsasia.com/2017/112/fn-2017-03-08-19-48-36-0.jpg" alt="" width="730" /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី</span></p>