<p><span style="color: #000000;"><strong>(ភ្នំពេញ)៖</strong> ដូចអ្វីដែលបានគ្រោងទុក រថភ្លើងដឹកអ្នកដំណើរ ពីភ្នំពេញទៅ ខេត្តព្រះសីហនុ បានដំណើរការរត់ឡើងវិញ ហើយនៅថ្ងៃទី៩ ខែមេសា ឆ្នាំ២០១៦នេះ ដោយបានបងប្អូនប្រជាពលរដ្ឋ បានទិញសំបុត្រធ្វើដំណើរយ៉ាងច្រើន ពោលគឺពេញកន្លែងទាំងអស់។</span></p>
<p><span style="color: #000000;">លោក បឿន សុបិន បុគ្គលិកក្រុមហ៊ុន Royal Railways ដែលកំពុងធ្វើដំណើរលើក រថភ្លើងឆ្ពោះទៅកាន់ ខេត្តព្រះសីហនុ បានប្រាប់អង្គភាព Fresh News ថា រថភ្លើងដឹកអ្នកដំណើរខ្សែដំបូងនេះ បានចេញដំណើរពីភ្នំពេញ នៅម៉ោង ៧៖០០នាទីព្រឹក ដោយផ្ទុកអ្នកដំណើរចំនួន ១៨០នាក់ ដោយបងប្អូនប្រជាពលរដ្ឋ មានការគាំទ្រយ៉ាងខ្លាំង។</span></p>
<p><span style="color: #000000;">លោកបន្តថា អ្នកដំណើរមួយចំនួន បានចុះនៅស្ថានីយខេត្តតាកែវ និងខ្លះទៀតឈប់នៅខេត្តកំពត ហើយសល់ប៉ុន្មានឈប់ នៅស្ថានីយខេត្តព្រះសីហនុតែម្តង។ លោកថា ក្នុងចំណោមអ្នកធ្វើដំណើរទាំងអស់មានមួយចំនួនជាអ្នកចង់ធ្វើដំណើរ តាមរថភ្លើងដើម្បីកម្សាន្ត ឬទេសចរណ៍ និងខ្លះទៀត ជាអ្នកដំណើរទៅស្រុកកំណើតក្នុងឱកាសបុណ្យចូលឆ្នាំថ្មី។</span></p>
<p><span style="color: #000000;">រថភ្លើងចេញពីភ្នំពេញ នៅម៉ោង ៧៖០០នាទីព្រឹក ទៅដល់ខេត្តព្រះសីហនុនៅម៉ោងប្រហែល ៣៖៣០នាទី។</span></p>
<p><span style="color: #000000;">លោក បឿន សុបិន បញ្ជាក់ឲ្យដឹងទៀតថា នៅថ្ងៃស្អែករថភ្លើងនឹងរត់២ខ្សែ នៅម៉ោង៧៖០០នាទីព្រឹក ដោយមួយខ្សែចេញពីភ្នំពេញ ទៅកាន់ព្រះសីហនុ និងមួយខ្សែទៀតចេញ ព្រះសីហនុមកភ្នំពេញវិញ។</span></p>
<p><span style="color: #000000;">តម្លៃសំបុត្រជិះរថយន្តភ្លើង ពីភ្នំពេញទៅតាកែវ ថ្លៃ៣ដុល្លារ ហើយពីភ្នំពេញ ទៅកំពត៥ដុល្លារ និង ពីភ្នំពេញ ទៅព្រះសីហនុតម្លៃ៦ដុល្លារ។</span></p>
<p><span style="color: #000000;">សូមជម្រាបថា ខ្សែរថភ្លើងដឹកអ្នកដំណើរ ពីភ្នំពេញទៅព្រះសីហនុ និងពីព្រះសីហនុមកភ្នំពេញ ចាប់ផ្តើមដំណើរការឡើងវិញ នៅថ្ងៃទី៩ ខែមេសា ឆ្នាំ២០១៦ ដល់ថ្ងៃទី១៧ ខែមេសា ឆ្នាំ២០១៦ បន្ទាប់ពីខកខាន មិនបានដំណើរការ អស់រាប់សិបឆ្នាំមកហើយនោះ។ តែយ៉ាងណាបន្ទាប់ពីដំណើរការ សាកល្បងរយៈពេលខ្លីនេះ ក្រុមហ៊ុនអាចនឹងពិចារណា ក្នុងដំណើរការរត់ឡើងវិញ ជាមួយនឹងល័ក្ខខណ្ឌផ្សេងៗ ហើយប្រសិនបើមានការគាំទ្រច្រើនពីប្រជាជននោះ នឹងបន្តដំណើររហូត៕</span></p>
<p style="text-align: center;"><span style="color: #000000;"><img src="http://image.freshnewsasia.com/2016/019/03/fn-2016-04-09-13-53-08-1.jpg" alt="" width="730" /></span></p>
<p style="text-align: center;"><span style="color: #000000;"><img src="http://image.freshnewsasia.com/2016/019/03/fn-2016-04-09-13-53-08-2.jpg" alt="" width="730" /></span></p>
<p style="text-align: center;"><span style="color: #000000;"><img src="http://image.freshnewsasia.com/2016/019/03/fn-2016-04-09-13-53-08-3.jpg" alt="" width="730" /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ហ្វ្រេសញូវអាស៊ី</span></p>