<p><span style="color: #000000;"><strong>(ភ្នំពេញ)៖</strong> កីឡាករបាល់បោះល្បីឈ្មោះ Wayne Ellington និងកីឡាការិនី Sue Wicks ក្នុងក្របខណ្ឌកំពូល NBA របស់អាមេរិក នឹងមកចែករំលែកបទ ពិសោធន៍ពីការលេងបាល់បោះរបស់ពួកគេ នៅកម្ពុជារយៈពេល ៥ថ្ងៃចាប់ពីថ្ងៃទី១២ ដល់ថ្ងៃទី១៧ ខែកក្កដា ឆ្នាំ២០១៦ សប្តាហ៍ក្រោយតាមរយៈសេចក្តីប្រកាសព័ត៌មានរបស់ក្រសួងការបរទេសសហរដ្ឋអាមេរិក ដែលអង្គភាព Fresh News ទទួលបាននៅរសៀលថ្ងៃសុក្រ ទី០៨ កក្កដានេះ។</span></p>
<p><span style="color: #000000;">Ellington និង Sue Wicks បេសកជនកីឡាបាល់បោះបុរស និងនារីដំបូងគេបង្អស់ ដែលនឹងមកផ្តល់បទពិសោធន៍ ពីការលេងកីឡាបាល់បោះអាជីពរបស់ពួកគេនៅកម្ពុជា ដោយសហការជាមួយសមាគមកីឡាបាល់បោះបុរស និងសមាគមកីឡាបាល់បោះនារី នៅសហរដ្ឋអាមេរិក ដើម្បីជួយពង្រឹងជំនាញ និងធ្វើឲ្យមានការចាប់អារម្មណ៍ច្រើនថែមទៀតនៅកម្ពុជា ចំពោះកីឡាដ៏មានប្រជាប្រិយភាពបំផុតនៅអាមេរិក និងលើពិភពលោក។</span></p>
<p><span style="color: #000000;">ជាមួយគ្នានោះដែរ ស្ថានទូតអាមេរិក នៅភ្នំពេញកំពុងធ្វើការជាមួយក្រសួងអប់រំ យុវជន និងកីឡា រួមទាំងគណៈកម្មាធិការជាតិអូឡាំពិកកម្ពុជា សហព័ន្ធកីឡាបាល់បោះកម្ពុជា និងសមាគមអតីតនិស្សិតអាហារូបករណ៍ Fulbright នៃកម្ពុជាដើម្បីទទួលបេសកជនកីឡា និងរៀបចំសកម្មភាពនានានៅសប្តាហ៍ក្រោយ ក្នុងការរៀបចំកម្មវិធី ដែលមានឈ្មោះថា <strong>«SportsUnited»</strong> ចំពោះសកម្មភាព ២យ៉ាង ដែលនឹងត្រូវបានបើកឲ្យសាធារណជន ចូលមើលដោយសេរី និងមិនគិតថ្លៃ៖</span><br /><span style="color: #000000;"><strong>1/.</strong> ម៉ោង ៩ ព្រឹកថ្ងៃទី១៤ កក្កដា៖ គំរោងជួសជុលទីលានលេងកីឡាបាល់បោះនៅវត្តកោះ ក្នុងក្រុងភ្នំពេញបើកទទួលអ្នកស្ម័គ្រចិត្ត មកពីសហគមន៍ក្នុងមូលដ្ឋាន។</span><br /><span style="color: #000000;"><strong>2/.</strong> ម៉ោង ៥ រសៀលថ្ងៃទី១៥ កក្កដា កម្មវិធីពិសេសនៅពហុកីឡដ្ឋានអូឡាំពិក ដោយមានការលេងបាល់បោះ ការប្រគំតន្រ្តី និងមានកម្មវិធីជាច្រើនទៀត។</span></p>
<p><span style="color: #000000;">Wayne Ellington ត្រូវបានជ្រើសរើសជាមនុស្សទី២៨ ដោយក្រុមកីឡា Minnesota Timberwolves នៅក្នុងការជ្រើសរើសជាសមាជិកក្រុមកីឡាបាល់បោះប្រចាំឆ្នាំនៅអាមេរិកក្នុងឆ្នាំ២០០៩។ Ellington ដែលបានលេងឲ្យក្រុម Brooklyn Nets កាលពីឆ្នាំទៅ ក៏បានលេងផងដែរឲ្យក្រុម Memphis Grizzlies, Cleveland Cavaliers, Dallas Mavericks និង Los Angeles Lakers។</span></p>
<p><span style="color: #000000;">មិត្តរួមជាតិ Sue Wicks ក៏មិនធម្មតាដែរ នាងធ្លាប់ជាប់ជាជំរើសជុំដំបូងរបស់ក្រុម New York Liberty នៅក្នុងការជ្រើសរើសកីឡាការិនី ជាលើកដំបូងក្នុងឆ្នាំ១៩៩៧ របស់សមាគមកីឡាការិនីបាល់បោះអាមេរិក។ Wicks បានបន្តលេងឲ្យក្រុម Liberty ៦រដូវកាល ដោយត្រូវបានជ្រើសរើសចូលក្នុងក្រុម All-Stars នៅឆ្នាំ២០០០។ លោកស្រីក៏បាន ទទួលរង្វាន់ Kim Perrot Sportsmanship Award ក្នុងឆ្នាំ២០០០ ផងដែរ៕</span></p>
<p><span style="color: #000000;"><img src="https://scontent-kul1-1.xx.fbcdn.net/v/t1.0-9/13592328_1772885216261438_8797505800305704303_n.png?oh=88f124c276dc533e28c2ca28fa8b5910&oe=582FD547" alt="" width="730" /></span></p>
<p style="text-align: center;"><span style="color: #000000;">កីឡាករ Ellington (ឆ្វេង) និងកីឡាការិនី Wicks</span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ខ្មែរថកឃីង</span></p>