<p><span style="color: #000000;"><strong>ភ្នំពេញ ៖</strong> ក្រសួង សុខាភិបាលកម្ពុជា បានបញ្ជាក់ឲ្យដឹងថា ខណៈដែលពិភពលោក កំពុងតែព្រួយ បារម្មណ៍ ពីការរាតត្បាតជំងឺអេបូទ្បា នៅក្នុងប្រទេសទាំង៥ នៃទ្វីបអាហ្រ្វិក តែឥទ្បូវនេះ បាននឹងកំពុង ប្រឈមនឹងជំងឺ ផ្លូវដង្ហើមមជ្ឈឹមបូព៌ា (MERS) ដែលសម្លាប់មនុស្ស សរុបចំនួន ៣១៧នាក់ និង ៧៥០ នាក់ទៀត កំពុងតែមានជំងឺនេះផងដែរ។</span></p>
<p><span style="color: #000000;">ប្រធាននាយកដ្ឋាន ប្រយុទ្ធនឹងជំងឺឆ្លង លោក លី សូវ៉ាន់ បានមានប្រសាសន៍ប្រាប់មជ្ឈ មណ្ឌលព័ត៌មាន ដើមអម្ពិល នៅថ្ងៃសុក្រ ទី២៦ ខែកញ្ញា ឆ្នាំ២០១៤នេះ ឲ្យដឹងថា នៅក្នុងកំឡុងពេល ដែលពិភពលោក យើងនេះ កំពុងតែព្រួយបារម្មណ៍ ពីការរាតត្បាតនៃជំងឺអេបូឡានោះ តែបែរជាត្រូវប្រឈមមុខនឹង ជំងឺផ្លូវដង្ហើមមជ្ឈិមបូព៌ាមួយទៀតដែលបណ្ដាលឲ្យមានអ្នកស្លាប់ រហូតមកទល់នឹងពេលនេះ ចំនួន ៣១៧នាក់ និងកំពុងតែឈឺចំនួន ៧៥០នាក់។</span></p>
<p><span style="color: #000000;">លោកវេជ្ជបណ្ឌិត បានមានប្រសាសន៍បន្ថែមថា «ជំងឺផ្លូវដង្ហើមមជ្ឈិមបូព៌ា(MERS) នេះបង្កទ្បើង ដោយមេរោគឈ្មោះ កូរ៉ូណាវីរុស(Corona Virus) ដែលអ្នកវិទ្យាសាស្រ្ដ សង្ស័យថាចម្លង មកពីសត្វអូដ្ឋ និងសត្វព្រៃដទៃទៀត និងអាចឆ្លងពីមនុស្សម្នាក់មកមនុស្សម្នាក់ទៀត តាមរយៈការប៉ះពាល់ផ្ទាល់ ជាពិសេសការបរិភោគសត្វព្រៃដែលស្លាប់ និងផ្ទុកនូវជំងឺនេះ»។</span></p>
<p><span style="color: #000000;">លោកវេជ្ជបណ្ឌិត លី សូវ៉ាន់ បានបន្ដទៀតថា បើសិនជាអ្នកធ្វើដំណើរទៅឧបទ្វីបមជ្ឈិមបូព៌ា ហើយ មានអាការៈមិនស្រួលដែលមានរោគសញ្ញា គ្រុនក្ដៅ ក្អក ពិបាកដកដង្ហើម និងរាគ អ្នកត្រូវតែទៅ រកគ្រូពេទ្យជាបន្ទាន់។ តែសម្រាប់អ្នកដែលមកពីទីនោះវិញ ដែលមានរោគសញ្ញាដូចខាង លើនេះ កំទ្បុង១៤ថ្ងៃ អ្នកត្រូវតែទៅកាន់មន្ទីរពេទ្យភ្លាមៗ តែម្ដងដើម្បីពិគ្រោះនិង ពិសោធន៍ឲ្យបានច្បាស់លាស់ ដោយសារតែជំងឺនេះ មិនទាន់មានថ្នាំណាអាចព្យាបាល ជានៅទ្បើយនោះទេ ។</span></p>
<p><span style="color: #000000;">លោកវេជ្ជបណ្ឌិត បានមានប្រសាសន៍ឲ្យដឹងទៀតថា ក្រសួងសុខាភិបាល នឹងខិតខំប្រឹងប្រែង ឲ្យអស់ពីសមត្ថភាព ដើម្បីការពារ និងរក្សានូវសុវត្ថិភាពជូនដល់ប្រជាពលរដ្ឋកម្ពុជាយើង ជាពិសេស សម្រាប់បងប្អូនទាំងអស់ ដែលបានធ្វើដំណើរទៅមជ្ឈិមបូព៌ា ដោយក្រសួងកំពុងតែតាមដាន ជំងឺនេះ យ៉ាងយកចិត្តទុកដាក់ ទាំងនៅឧបទ្វីបមជ្ឈិមបូព៌ា ទាំងច្រកព្រំដែនអន្តរជាតិ និងពង្រឹងប្រព័ន្ធតាម ដានក្នុងប្រទេសផងដែរ។</span></p>
<p><span style="color: #000000;">លោកវេជ្ជបណ្ឌិត បានអំពាវនាវថា សូមឲ្យសាធារណជនទាំងអស់ មេត្ដាការពារ និងអនុវត្ដតាមការត្រួត ពិនិត្យរបស់ក្រសួងសុខាភិបាល និងជួយផ្សព្វផ្សាយនូវវិធានការនៃការបង្ការរបស់ក្រសួង ដោយមាន ទាំងប័ណ្ណពិនិត្យសុខភាព និងសារឲ្យបានគ្រប់គ្នាផង៕</span></p>
<p><span style="color: #000000;"><img src="http://image.dap-news.com:81/dap-news/dap-images/2014/September/id-011/Hong-0446.jpg" alt="" /></span></p>
<p style="text-align: right;"><br /><span style="color: #000000;">ផ្ដល់សិទ្ធិដោយ៖ ដើមអម្ពិល</span></p>