<p><span style="color: #000000;"><strong>ភ្នំពេញ៖</strong> ក្រុមហ៊ុនចែកចាយប្រេងឥន្ធនៈនៅកម្ពុជា បានព្រមព្រៀង ទម្លាក់តម្លៃរបស់ខ្លួនទៀតហើយ ក្នុងនោះក្រុម ហ៊ុន SOKIMEX និង TELA បានទម្លាក់ តម្លៃមកនៅត្រឹម ៣.៩០០រៀលក្នុងមួយលីត្រ PTT បញ្ចុះមកនៅត្រឹម ៤.០៥០រៀល ខណៈក្រុមហ៊ុនបរទេស ដូចជាតូតាល់ និងកាល់តិច រង់ចាំការឯកភាពពីថ្នាក់ដឹកនាំ។ ដោយឡែក តម្លៃប្រេង SAVIMEX និង LHR តម្លៃទាបជាងគេគឺ SAVIMEX ៣.៥០០រៀលក្នុង១លីត្រ, LHR ៣.៣០០ក្នុង ១លីត្រ។</span></p>
<p><span style="color: #000000;">យោងតាមការចេញផ្សាយតាមគេហទំព័ររបស់ក្រសួងពាណិជ្ជកម្ម បានឲ្យដឹងថា នៅថ្ងៃទី២០ ខែមករា ឆ្នាំ២០១៥ ទេសរដ្ឋមន្រ្តី រដ្ឋមន្រ្តីក្រសួង ពាណិជ្ជកម្ម លោក ស៊ុន ចាន់ថុល បានអញ្ជើញតំណាងក្រុមហ៊ុនចែកចាយប្រេងឥន្ធនៈធំៗនៅកម្ពុជា ជួបប្រជុំគ្នាជាលើកទី៣ ដើម្បីពិនិត្យ និងពិភាក្សាបន្ថែម អំពីតម្លៃប្រេងឥន្ធនៈនាពេលបច្ចុប្បន្ន និង បញ្ហាប្រឈមនានា។</span></p>
<p><span style="color: #000000;">ក្រុមហ៊ុនចែកចាយប្រេងឥន្ធនៈធំៗ ដែលចូលរួមជជែកពិភាក្សានោះរួមមាន ក្រុមហ៊ុន SOKIMEX, TELA, PTT (កម្ពុជា), CALTEX, Bright Victory Mekong Petroleum, TOTAL, SAVIMEX និងក្រុមហ៊ុន LHR ។</span></p>
<p><span style="color: #000000;">ក្នុងជំនួបពិភាក្សាទេសរដ្ឋមន្រ្តី ស៊ុន ចាន់ថុល បានស្នើឲ្យក្រុមហ៊ុនចែកចាយប្រេងឥន្ធនៈ ពិនិត្យលទ្ធភាពបញ្ចុះថ្លៃ លក់រាយរបស់ខ្លួនក្រោម ៤.០០០ រៀលក្នុងមួយលីត្រ ឲ្យស្របទៅនឹងថ្លៃប្រេងពិភពលោក ដើម្បីធ្វើឲ្យជីវភាព របស់ប្រជាពលរដ្ឋកម្ពុជាកាន់តែប្រសើរឡើង ។</span></p>
<p><span style="color: #000000;">ឆ្លើយតបទៅនឹងសំណើ តំណាងក្រុមហ៊ុន SOKIMEX និង TELA បានសម្រេចបញ្ចុះថ្លៃ ប្រេងសាំងធម្មតាពី ៤.០០០រៀល មកនៅ ៣.៩០០រៀល ក្នុងមួយលីត្រ, ក្រុមហ៊ុន PTT បញ្ចុះមកនៅ ៤.០៥០រៀល ក្នុងមួយលីត្រ គិតចាប់ពីថ្ងៃទី២១ ខែមករា ឆ្នាំ២០១៥ ។</span></p>
<p><span style="color: #000000;">តំណាងរបស់ក្រុមហ៊ុនចែកចាយប្រេងបរទេសផ្សេងទៀត នឹងបញ្ជាក់ពីការបញ្ចុះតម្លៃ បន្ទាប់ពីទទួលបានការឯកភាព ពីថ្នាក់ដឹកនាំ ប្រចាំតំបន់របស់ខ្លួន ។ ក្រុមហ៊ុនចែកចាយប្រេងឥន្ធនៈទាំងនេះ ក៏បានបញ្ជាក់ផងដែរថា អតិថិជនណា ដែលមានប័ណ្ណសមាជិក ឬ E-Card នឹងទទួលបាន ការបញ្ចុះថ្លៃបន្ថែមទៀតចាប់ពី ៥% ទៅ ១០% លើតម្លៃដាក់លក់ ។</span></p>
<p><span style="color: #000000;">បើតាមព័ត៌មានដែលចេញផ្សាយពីគេហទំព័រក្រសួងពាណិជ្ជកម្ម បានបញ្ជាក់ថា លោកទេសរដ្ឋមន្រ្តី ស៊ុន ចាន់ថុល និងតំណាងក្រុមហ៊ុន ចែកចាយ ប្រេងឥន្ធនៈធំៗ ទាំងអស់ នឹងបន្តជួបប្រជុំគ្នាជារៀងរាល់១០ថ្ងៃម្តង ដើម្បីពិនិត្យ មើលបន្ថែមទៀត លើថ្លៃប្រេងឥន្ធនៈ ដើម្បីធានាថាតម្លៃ ប្រេងនៅ ពិភពលោក ត្រូវបានឆ្លុះបញ្ចាំងតាមរយៈ តម្លៃ ប្រេងដែលដាក់លក់នៅក្នុងប្រទេសកម្ពុជា ។</span></p>
<p><span style="color: #000000;">សូមបញ្ជាក់ថា ក្រុមហ៊ុនប្រេងឥន្ធនៈធំៗទាំង៧នៅកម្ពុជា កាលពីខែវិច្ឆិកា ឆ្នាំ២០១៤ បានធ្វើការបញ្ចុះតម្លៃប្រេង ពីតម្លៃជាង ៥ពាន់រៀល មកនៅត្រឹមជាង៤ពាន់រៀល។ ក្នុងនោះក្រុមហ៊ុនសូគីមិច, តេលា, ភីធីធី, ប៊ីវីអឹម និង សាវីមិច បានបញ្ចុះតម្លៃប្រេងសាំងពី ៥.០៥០រៀល មកនៅត្រឹម ៤.៧៥០រៀល ។ ប្រេងម៉ាសូត បញ្ចុះតម្លៃពី ៤.៧៥០រៀល មកនៅ ៤.៥០០រៀល ។ ក្រុមហ៊ុនតូតាល់ ប្រេងសាំងធម្មតា បញ្ចុះតម្លៃពី ៥.០៥០រៀល មកនៅ ៤.៨៥០រៀល ។ ប្រេងម៉ាសូតបញ្ចុះតម្លៃពី ៤.៧៥០រៀល មកនៅ ៤.៦០០រៀល ។ ក្រុមហ៊ុនកាល់តិច ប្រេងសាំងធម្មតា បញ្ចុះតម្លៃពី ៥.០៥០រៀល មកនៅ ៤.៨០០រៀល ។ ប្រេងម៉ាសូតបញ្ចុះតម្លៃពី ៤.៧៥០រៀល មកនៅ ៤.៥៥០រៀល ។</span></p>
<p><span style="color: #000000;">ដោយឡែកក្រុមហ៊ុន សាវីមិច បញ្ចុះតម្លៃច្រើនជាងគេ ពោលបានបញ្ចុះតម្លៃប្រេងសាំងពី ៥.០៥០រៀល មកនៅ ៤.៤៥០រៀល ។ ប្រេងម៉ាសូត បញ្ចុះតម្លៃពី ៤.៧៥០រៀល មកនៅត្រឹម ៤.៣៥០រៀល ៕</span></p>
<p><span style="color: #000000;"><a class="thickbox" title="" href="/FileManager/Commons/2015/1/21/1-21-2015-2-37-38-pm-21-01-2015--14-43-04.png"><img src="/FileManager/Articles/mce/2015/1/21/1-21-2015-2-37-38-pm-21-01-2015--14-43-04.png" alt="" /></a></span></p>
<p><a class="thickbox" title="" href="/FileManager/Commons/2015/1/21/1-21-2015-2-38-08-pm-21-01-2015--14-43-20.png"><img src="/FileManager/Articles/mce/2015/1/21/1-21-2015-2-38-08-pm-21-01-2015--14-43-20.png" alt="" /></a></p>
<p><a class="thickbox" title="" href="/FileManager/Commons/2015/1/21/1-21-2015-2-38-24-pm-21-01-2015--14-43-33.png"><img src="/FileManager/Articles/mce/2015/1/21/1-21-2015-2-38-24-pm-21-01-2015--14-43-33.png" alt="" /></a></p>
<p><a class="thickbox" title="" href="/FileManager/Commons/2015/1/21/1-21-2015-2-38-37-pm-21-01-2015--14-43-47.png"><img src="/FileManager/Articles/mce/2015/1/21/1-21-2015-2-38-37-pm-21-01-2015--14-43-47.png" alt="" /></a></p>
<p style="text-align: right;"><span style="color: #000000;"> ផ្ដល់សិទ្ធដោយ៖ ដើមអម្ពិល</span></p>