<p><strong>រតនគិរីៈ</strong> ក្រុមគ្រួសារមួយ មានសមាជិក៧នាក់ បាននាំគ្នាពីខេត្តព្រៃវែង មកទេសចរណ៍រមណីយដ្ឋាន និងបឹងប្រវត្តិសាស្ត្រយក្សឡោម ខេត្តរតនគិរី ក្នុងនោះមានយុវតីស្រស់ស្អាតម្នាក់ ចុះហែលទឹកលេងបានលង់ស្លាប់ ហេតុការណ៍នេះ កើតឡើងកាលពីវេលាម៉ោង២និង៥០នាទី រសៀល ថ្ងៃទី៧ ខែមេសា ឆ្នាំ២០១៥ ត្រង់ចំណុចផែទី១ ដោយមានការធ្វេសប្រហែស គឺពុំបានពាក់ពោងអាវការពារសុវត្ថិភាព។</p>
<p>បើតាមសាច់ញាតិ គ្រួសារជនរងគ្រោះ ប្រាប់ឲ្យដឹងថា យុវតីនេះមានឈ្មោះ ស្រី ភា អាយុ១៧ឆ្នាំ ជាសិស្សថ្នាក់ទី១១ ក្នុងភូមិព្រៃព្នៅ ខេត្តព្រៃវែង។ ពួកគាត់ប្រាប់បន្តទៀតថា ក្រុមគ្រួសារគាត់បានទៅកម្សាន្ត នៅតំបន់រមណីយដ្ឋានមួយចំនួន ក្នុងខេត្តមណ្ឌលគិរី រួចបានបន្តដំណើរមកកម្សាន្ត នៅខេត្តរតនគិរីទៀត ពោលគឺ រមណីយដ្ឋាន និងបឹងប្រវត្តិសាស្ត្រយក្សឡោម ក៏ជួបឧប្បត្តិហេតុបែបនេះតែម្តង។</p>
<p>បន្ទាប់មកក្រុមគ្រួសារក្មេងស្រីរងគ្រោះ បានរៀបចំគ្រឿងសក្ការៈសែនព្រេន បន់ស៊្រន់ម្ចាស់ទឹកម្ចាស់ដី តាមប្រពៃណីបងប្អូនជនជាតិ ព្រមទាំងបាន ជួលក្រុមមុជទឹកខ្មែរឥស្លាម ចំណាយលុយអស់ ៨០០ដុល្លារ ចុះមុជរាវរករហូតដល់ម៉ោង ប្រមាណជិត៦ល្ងាច សាកសពក្មេងស្រីរងគ្រោះនោះប្រទះឃើញ ហើយស្រង់មកលើគោក រួចសមត្ថកិច្ចធ្វើការត្រួតពិនិត្យ ហើយបានប្រគល់ឲ្យក្រុមគ្រួសារ ដឹកយកទៅធ្វើបុណ្យ នៅឯស្រុកកំណើត ដោយក្តីទុក្ខសោកក្រៃលែង។</p>
<p>ប្រភពព័ត៌មានពីបងប្អូនជនជាតិ ដែលរស់នៅតំបន់រមណីយដ្ឋាន និងបឹងប្រវត្តិសាស្ត្រយក្សឡោម ប្រាប់ឲ្យដឹងថា ទីនេះតែងតែមានជើងកប ដោយក្នុងមួយឆ្នាំ យ៉ាងហោចណាស់ក៏មានមនុស្សពីរនាក់ រងគ្រោះផងដែរ៕</p>
<p><a class="thickbox" title="" href="/FileManager/Commons/2015/4/7/that-0158-07-04-2015--21-15-55.jpg"><img src="/FileManager/Articles/mce/2015/4/7/that-0158-07-04-2015--21-15-55.jpg" alt="" /></a></p>
<p><a class="thickbox" title="" href="/FileManager/Commons/2015/4/7/that-0159-07-04-2015--21-16-20.jpg"><img src="/FileManager/Articles/mce/2015/4/7/that-0159-07-04-2015--21-16-20.jpg" alt="" /></a></p>
<p style="text-align: right;">ផ្ដល់សិទ្ធដោយ៖ ដើមអម្ពិល</p>