<div class="article-content">
<p><strong>ភ្នំពេញ ៖</strong> កម្លាំងនគរបាល ការិយាល័យ ប្រឆាំងការ ជួញដូរគ្រឿងញៀន នៃស្នងការដ្ឋាន នគរបាល រាជធានីភ្នំពេញ កាលពីយប់ ថ្ងៃទី២១ ខែកុម្ភៈ ឆ្នាំ២០១៤ បានបើកប្រតិបត្តិការធ្វើការ ស្រាវជ្រាវ ហើយឈានទៅដល់ ការចាប់ខ្លួន មុខសញ្ញា ចែកចាយ គ្រឿងញៀន ដ៏សកម្ម២នាក់ នៅក្នុងទឹកដី ខណ្ឌចំការមន រួចហើយនាំ ទៅឃាត់ខ្លួន ជនសង្ស័យ ម្នាក់ទៀត នៅទឹកដីខណ្ឌទួលគោក ។</p>
<p>ក្នុងប្រតិបត្តិការ ខាងលើនេះ កម្លាំងសមត្ថកិច្ច បានរឹបអូស រថយន្ត មួយគ្រឿង ម៉ូតូមួយគ្រឿង និងថ្នាំញៀន ប្រមាណ៦ជី (១ជី តម្លៃប្រហែល៣០០ដុល្លារ) ផងដែរ។</p>
<p>លោកវរសេនីយ៍ទោ ប៊ន សំអាត នាយការិយាល័យ ប្រឆាំងការជួញដូរ គ្រឿងញៀន នៃស្នងការដ្ឋាន នគរបាល រាជធានីភ្នំពេញ បានឲ្យដឹងថា ជនសង្ស័យ ទាំង២នាក់ ខាងលើនេះ ដែលត្រូវកម្លាំង សមត្ថកិច្ច របស់លោកចាប់ខ្លួននេះ គឺជាមុខសញ្ញា ចែកចាយគ្រឿងញៀន ដ៏សកម្ម ជាពិសេសនោះ ពួកគេបានប្រើប្រាស់ រថយន្ត ចែកចាយតាមខេត្ត និងក្នុងរាជធានីភ្នំពេញ គឺប្លុកត្រពាំងឈូក សង្កាត់ទឹកថ្លា ខណ្ឌសែនសុខ ច្រើនជាងគេ ។</p>
<p>លោក ប៊ន សំអាត បានបញ្ជាក់ថា ក្រោយពីមានបទបញ្ជាពី សំណាក់ស្នងការ នគរបាល រាជធានីភ្នំពេញ លោកឧត្តមសេនីយ៍ ជួន សុវណ្ណ និងមានការសម្របសម្រួល តាមផ្លូវច្បាប់ ពីតំណាងអយ្យការ អមសាលាដំបូងរាជធានីភ្នំពេញនោះ លោកបានដឹកនាំកម្លាំង នគរបាល ជំនាញ ធ្វើការស្រាវជ្រាវ ទើបឈានទៅដល់ ការចាប់ខ្លួន សង្ស័យទាំងនេះ។</p>
<p>បើតាមលោក ប៊ន សំអាត ជនសង្ស័យទី១ឈ្មោះ សាន សិត អាយុ៣៦ឆ្នាំ រស់នៅ ខេត្តកំពង់ធំ ដែលត្រូវចាប់ខ្លួន នៅខណ្ឌចំការមន ដោយរឹបអូសរថយន្ត មួយគ្រឿង ម៉ាកឆ្លាម ពាក់ស្លាកលេខ កណ្តាល 2A-2515 ។</p>
<p>ក្រោយការចាប់ខ្លួន ជនសង្ស័យរូបនេះ កម្លាំងសមត្ថកិច្ច បានឈានទៅដល់ ការចាប់ខ្លួនជនសង្ស័យម្នាក់ទៀត មានឈ្មោះ ឃុំ សុធា អាយុ៣១ នៅម្តុំរង្វង់ មូលទួលគោក កាលពីវេលាម៉ោងប្រមាណ ១១យប់ថ្ងៃទី២១ ខែកុម្ភៈ ឆ្នាំ២០១៤ ដោយរឹបអូសម៉ូតូធន់ធំ មួយគ្រឿង។</p>
<p>បច្ចុប្បន្ន ជនសង្ស័យទាំង២នាក់ ត្រូវបានឃុំខ្លួន ជាបណ្តោះអាសន្ន នៅការិយាល័យ ប្រឆាំងការជួញដូរ គ្រឿងញៀន ដើម្បីកសាងសំណុំរឿង បញ្ជូនទៅតុលាការចាត់ការ តាមផ្លូវច្បាប់៕</p>
<p style="text-align: center;"><img src="http://111.92.240.170:81//dap-news/dap-images/2014/February/id-007/Pheak-0068.jpg" alt="Photo by DAP-NEWS" width="500" /></p>
<p style="text-align: center;"><img src="http://111.92.240.170:81//dap-news/dap-images/2014/February/id-007/Pheak-0069.jpg" alt="Photo by DAP-NEWS" width="500" /></p>
<p style="text-align: center;"><img src="http://111.92.240.170:81//dap-news/dap-images/2014/February/id-007/Pheak-0070.jpg" alt="Photo by DAP-NEWS" width="500" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>