<p><span style="color: #000000;">ភ្នំពេញ៖ក្រុងសៀមរាប របស់ប្រទេសកម្ពុជា ពេលនេះ បានជាប់ចំណាត់ ថ្នាក់ជា ទីក្រុងគោលដៅទេសចរណ៍ លេខ១ នៅតំបន់អាស៊ី និង ជាប់ចំណាត់ថ្នាក់លេខ២ នៅលើពិភពលោកក្នុងការវាយតម្លៃទីក្រុងទាក់ទាញនៅឆ្នាំ២០១៥នេះ ។</span></p>
<p><span style="color: #000000;">ចំណាត់ថ្នាក់នេះ ត្រូវបានវាយតម្លៃ ដោយស្ថាប័ន TripAdvisor ជាភ្នាក់ងារប្រឹក្សាយោបល់ ក្នុងការធ្វើដំណើរទេសចរ នៅលើពិភពលោក ក្នុងនោះក្រុងសៀមរាប ត្រូវបានបោះឆ្នោត (តាមអនឡាញ) ជ្រើសរើសឱ្យជាប់ ចំណាត់ថ្នាក់លេខ ២ ក្នុងចំណោម ទីក្រុងស្រស់ស្អាត ប្រកបដោយភាពទាក់ទាញ ចំនួន២៥ ខណៈដែល ទីក្រុង Marrakech របស់ ប្រទេស Morocco ទទួលបាន ចំណាត់ថ្នាក់លេខ១។ ក្រុង ISTANBUL របស់ប្រទេសតួកគី បានទទួលចំណាត់ ថ្នាក់លេខ៣ ខណៈដែលក្រុងហាណូយ របស់ប្រទេសវៀតណាម ទទួលបាន ចំណាត់ថ្នាក់លេខ៤ ។</span></p>
<p><span style="color: #000000;">លោក ថោង ខុន រដ្ឋមន្រ្តីក្រសួងទេសចរណ៍ បានសាទរចំពោះលទ្ធផលនេះ។ លោកចាត់ទុកថា លទ្ធផលនេះ នឹងធ្វើឱ្យ កម្ពុជា ទទួលបានកំណើនភ្ញៀវទេសចរ កាន់តែច្រើនឡើងថែមទៀត ។</span></p>
<p><span style="color: #000000;">លោកបានថ្លែងប្រាប់ មជ្ឈមណ្ឌលព័ត៌មានដើមអម្ពិល តាមទូរស័ព្ទ នៅព្រឹកថ្ងៃទី២៤ ខែមីនា ឆ្នាំ២០១៥នេះថា «ឥឡូវ យើង បានលេខ១ នៅអាស៊ីហើយ បានលេខ២ នៅលើពិភពលោកហើយ ទាំងនេះ បានមកពីការខិតខំប្រឹងប្រែងរបស់ យើងទាំងអស់គ្នា ទាំងផ្នែកឯកជន និងផ្នែកសាធារណៈ ក្រោមការដឹកនាំរបស់សម្តេចតេជោ យើងត្រូវប្រឹងប្រែងតទៅ ទៀត ដើម្បីរក្សាជ័យលាភីនេះ ឱ្យបានព្រោះអាទិត្យក្រោយនេះ គេមកប្រកាស ជូនរង្វាន់ហើយ» ។</span></p>
<p><span style="color: #000000;">ចំណាត់ថ្នាក់នេះ ក៏ត្រូវបានវាយតម្លៃទៅលើ សណ្ឋាគារ ភោជនីយដ្ឋាន សេវាកម្ម និងភាពស្រស់ស្អាតពណ៌បៃតង របស់ ក្រុងសៀមរាប ដែលធ្វើឱ្យទាក់ទាញដល់ភ្ញៀវទេសចរ ខ្លាំងជាងទីក្រុងដទៃ។ កាលពីឆ្នាំមុន ក្រុងសៀមរាប របស់កម្ពុជា បានជាប់ចំណាត់ថ្នាក់លេខ២ នៅតំបន់អាស៊ី (បន្ទាប់ពីក្រុងក្យូតូ របស់ជប៉ុន) និង លេខ៤ នៅលើពិភពលោក ដែល ជាលទ្ធផលល្អប្រសើរ ជាងឆ្នាំ២០១៣ ៕</span></p>
<p><span style="color: #000000;"><a class="thickbox" title="" href="/FileManager/Commons/2015/3/24/60-24-03-2015--14-38-13.jpg"><img src="/FileManager/Articles/mce/2015/3/24/60-24-03-2015--14-38-13.jpg" alt="" /></a></span></p>
<p><a class="thickbox" title="" href="/FileManager/Commons/2015/3/24/61-24-03-2015--14-38-21.jpg"><img src="/FileManager/Articles/mce/2015/3/24/61-24-03-2015--14-38-21.jpg" alt="" /></a><span style="color: #000000;"><a class="thickbox" title="" href="/FileManager/Commons/2015/3/24/60-24-03-2015--14-38-13.jpg"></a><br /></span></p>
<p style="text-align: right;"><span style="color: #000000;">ផ្តល់សិទ្ធដោយ ៖ ដើមអម្ពិល</span></p>