<div class="article-content">
<p><strong>ភ្នំពេញ៖</strong> យុវជនជានិស្សិតម្នាក់ ត្រូវបានក្រុមគ្រួសារ ជានារីរងគ្រោះចាប់បញ្ជូន ឲ្យនគរបាលខណ្ឌទួលគោក ចាត់ការទៅ តាមច្បាប់ដោយចោទប្រកាន់ ពីបទចាប់រំលោភបានសម្រេច និងបង្ខំឲ្យកោរសក់ ធ្វើឡើងនៅក្នុងផ្ទះសំណាក់ស្រែយើង សង្កាត់ទឹកល្អក់៣។</p>
<p>ជនសង្ស័យត្រូវបានគេស្គាល់ឈ្មោះ លី លឹមហេង ភេទ ប្រុស អាយុ ២០ឆ្នាំ ស្នាក់នៅផ្ទះលេខ ៩EO ផ្លូវ ១៣៥ សង្កាត់ទួល ទំពួង១ ខណ្ឌចំការមន ហើយត្រូវបានក្រុមគ្រួសារជនរងគ្រោះ ចាប់ខ្លួនបានកាលពីរសៀលថ្ងៃទី០៥ ខែសីហា វេលាម៉ោង ១៤និង៣០នាទីរសៀល នៅចំណុចផ្ទះលេខ ៦៨EO ផ្លូវ២៦៥ សង្កាត់ទឹកល្អក់ទី៣ ខណ្ឌទួលគោក ។ </p>
<p>ចំណែកជនរងគ្រោះត្រូវបានគេស្គាល់ឈ្មោះ ស ទ ព ភេទ ស្រី អាយុ ១៨ឆ្នាំ ជាជានិស្សិត ស្នាក់នៅ ភូមិ៩ សង្កាត់ទឹកល្អក់ទី៣ ខណ្ឌទួលគោក ។</p>
<p>សមត្ថកិច្ចបានឲ្យដឹងថា នៅមុនពេលកើតហេតុនេះគឺ យុវជនសង្ស័យខាងលើនេះ បានយករូបអាក្រាតកាយរបស់នារី រងគ្រោះ មកបង្ហោះតាម Facebook និងបានគម្រាមមកជនរងគ្រោះឲ្យកោរសក់ ទើបឈប់បង្ហោះរូបភាព អាក្រាតនេះទៀត ។</p>
<p>លុះមកដល់ថ្ងៃទី៣១ ខែកក្កដា ជនសង្ស័យបានបើកបររថយន្ត មកយកជនរងគ្រោះដល់ផ្ទះ ដើម្បីទៅហូបអីនៅខាងក្រៅ ហើយក្រោយមកជនសង្ស័យ ក៏បាននាំជនរងគ្រោះ ចូលក្នុងផ្ទះសំណាក់ស្រែយើង រួចចាប់នារីរងគ្រោះវាយ ធាក់ ទាត់ ព្រម ទាំងយកដៃចងភ្ជាប់នឹងដងខ្លួន ហើយចាប់រំលោភសេពសន្ថវៈបានសម្រេច ទើបជូននារីរងគ្រោះត្រឡប់មកផ្ទះវិញ។</p>
<p>មន្ត្រីដដែលបន្តថា រហូតមកដល់ថ្ងៃទី០៥ ខែសីហា វេលាម៉ោង ១១ និង៣០នាទី ជនសង្ស័យបានទូរស័ព្ទមកណាត់ ជនរងគ្រោះម្តងទៀត ដោយនិយាយថា ដើម្បីជួបគ្នាជជែកពីការចែកផ្លូវគ្នា ក្រោយពេលជួបគ្នាហើយជនសង្ស័យ ក៏បាននាំ ជនរងគ្រោះទៅផ្ទះសំណាក់ស្រែយើងម្តងទៀត ។ តែលើកចុងក្រោយនេះ ពេលជូននារីរងគ្រោះដល់ផ្ទះ ក៏ត្រូវបានក្រុមគ្រួសារ ជានារីរងគ្រោះចាប់បញ្ជូនឲ្យនគរបាលទួលគោក ចាត់ការទៅតាមច្បាប់តែម្តង ដោយចោទប្រកាន់ពីបទបង្ខំរំលោភ សេពសន្ថវៈបានសម្រេច និងបង្ខំឲ្យកោរសក់។</p>
<p>បច្ចុប្បន្នជនសង្ស័យ កំពុងត្រូវបានឃាត់ខ្លួន នៅអធិការដ្ឋាននគរបាល ខណ្ឌទួលគោក ដើម្បីចាត់ការទៅតាមនីតិវិធី ប៉ុន្តែក្នុង ករណីនេះនគរបាល ហាក់មិនទំលាយឲ្យដឹងនោះទេ គឺមានការលាក់លៀមច្រើន ចំណែករូបភាពជនសង្ស័យ ក៏ក្រុមអ្នកយក ព័ត៌មានមិនអាចផ្តិតយករូបភាពបាននោះដែរ៕</p>
</div>
<p style="text-align: right;"><a href="http://www.dap-news.com/2011-06-14-02-39-55/92219-2014-08-06-07-16-48.html" target="_blank">ផ្តល់សិទ្ធដោយ ៖ ដើមអម្ពិល</a></p>