<div class="article-content">
<p><strong>កំពត ៖</strong> ចោរមានគ្នា ៣នាក់ ស្លៀកពាក់ស៊ីវិល មិនស្គាល់ ឣត្តសញ្ញាណ ប្រើប្រាស់ឣាវុធ AK មួយដើម កូនកាំបិត ២ដើម បានធ្វើសកម្មភាព ប្លន់ទៅលើប្រជាពលរដ្ឋ នៅវេលាម៉ោង ៧និង៤០នាទី ថ្ងៃទី២០ ខែមេសា ឆ្នាំ២០១៤ស្ថិតក្នុងភូមិតេជោឣភិវឌ្ឍន៍ ឃុំតេជោរឣភិវឌ្ឍន៍ ស្រុកឈូក ខេត្តកំពត។</p>
<p>សមត្ថកិច្ច មូលដ្ឋាន បានឲ្យមជ្ឈមណ្ឌល ព័ត៌មាន ដើមឣម្ពិលដឹង នាវេលាព្រឹកថ្ងៃនេះថា ជនរងគ្រោះដែល ត្រូវចោរប្លន់នោះមានឈ្មោះ ឃឹម ស៊ីថា ភេទស្រី ឣាយុ៥៥ឆ្នាំ មុខរបរ ឣ្នកលក់សាច់គោ នៅផ្សារ៣១៧"តំបន់កោះស្លា"មានទីលំនៅភូមិ ឃុំកើតហេតុខាងលើ។</p>
<p>សមត្ថកិច្ច ដដែលឲ្យដឹងទៀតថា ក្រុមចោរប្លន់ខាងលើ បានធ្វើសកម្មភាពភ្ជង់គំរាម ប្លន់ជនរងគ្រោះ និងចាក់ទៅ លើស្ត្រីជនរងគ្រោះត្រូវដៃចំនួន មួយកាំបិត ខណៈនៅជាមួយកូនចៅ ក្នុងផ្ទះរបស់ខ្លួន រួចហើយពួកវា គំរាមយកបាន លុយខ្មែរ ៧លានរៀល, លុយដុល្លារ ១៨០០$ លុយបាតថៃ ២០០០បាត និងមាស ១ដំឡឹង ។ ក្រោយពីពួកវាធ្វើ សកម្មភាពប្លន់បាន សម្រេចហើយ ក៏គេចខ្លួនបាត់ ស្រមោលតែម្តង ។</p>
<p>ដោយឡែក ចំពោះសមត្ថកិច្ចវិញ ក្រោយពីខាងជនរងគ្រោះបានប្រាប់ដំណឹង នៅក្រោយកើតហេតុភ្លាម ក៏បានចុះទៅដល់កន្លែងហេតុ និងធ្វើការស្រាវជ្រាវ រហូតបន្តសហការគ្នា ស្រាវជ្រាវ មកដល់នាវេលាព្រឹកថ្ងៃនេះបន្តទៀត ។</p>
<p>លោក ជឹម សឿន មេឃុំតេជោរឣភិវឌ្ឍន៍ បានឲ្យមជ្ឈមណ្ឌលព័ត៌មានដើមឣម្ពិលដឹងថា ករណីប្លន់ខាងលើនេះ ពិតជាកើតមានមែន ហើយបច្ចុប្បន្ន កម្លាំងនគរបាល និងឣវុធហត្ថកំពុងចុះទៅកន្លែងកើតហេតុ ដើម្បីធ្វើការស្រាវជ្រាវរុករក មុខសញ្ញានេះហើយ៕</p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>