<div class="article-content">
<p><strong>ភ្នំពេញ៖</strong> យ៉ាងហោចណាស់ មនុស្សបីនាក់ បានរងរបួស ធ្ងន់និងស្រាល នៅក្នុងហេតុការណ៍ គ្រោះថ្នាក់ចរាចរណ៍មួយ បង្កឡើងដោយ បុរសម្នាក់ ដែលគេដឹងថាជាម្ចាស់ ភោជនីយដ្ឋាននិងខារ៉ាអូខេ បុប្ផាជាយដែន ដែលបានបើករថយន្ត ទាំងស្រវឹង។</p>
<p>ហេតុការណ៍នេះ កើតឡើងនាវេលាម៉ោង១០និង១០នាទីយប់ ថ្ងៃទី២៩ ខែសីហា ឆ្នាំ២០១៤ ស្ថិតនៅចំណុចជិតច្រកចូល ខ្លោងទ្វារវត្ដសន្សំកុសល លើបណ្ដោយផ្លូវលេខ២៧១ ក្នុងសង្កាត់ ផ្សារដើមថ្កូវ ខណ្ឌចំការមន ។</p>
<p>ប្រភពព័ត៌មាន ឱ្យដឹងថា រងគ្រោះទាំង៣នាក់ ដែលជាប្តី-ប្រពន្ធ និងកូន មានឈ្មោះ ភា អាយុ២៧ឆ្នាំ ប្រពន្ធឈ្មោះ ឆវី អាយុ២៦ឆ្នាំ និងកូន ឈ្មោះ ម៉េងហុង អាយុ២ឆ្នាំ អ្នកទាំង៣ រងរបួសធ្ងន់និងស្រាល ជិះម៉ូតូមួយគ្រឿង ម៉ាកហុងដាXR ពណ៌ខ្មៅ ពាក់ស្លាកលេខភ្នំពេញ 1BQ-4531 ធ្វើដំណើរតាមបណ្ដោយផ្លូវ លេខ២៧១ ក្នុងទិសដៅពីលិចទៅកើត។ លុះមកដល់ចំណុច កើតហេតុជនរងគ្រោះ បានឈប់ម៉ូតូអែប នៅចិញ្ចើមផ្លូវដើម្បី ទិញសាច់កាប់យកទៅ ផ្ទះហូបបាយ ក៏ត្រូវបានអ្នកបើក រថយន្ដស៊េរីទំនើប មួយគ្រឿងម៉ាកហាយប្រ៊ីដ ពណ៌ស ពាក់ស្លាកលេខ ភ្នំពេញ 2AA-6116ខាងលើនេះ បុកចំពីមុខយ៉ាងពេញទំហឹង បណ្ដាលឱ្យ រងរបួសធ្ងន់និងស្រាល ទាំង៣នាក់តែម្តងទៅ។</p>
<p>យ៉ាងណាក៏ដោយ ជនបង្កជាអ្នកបើករថយន្ដ ត្រូវគេអះអាងថា បានបញ្ជាយានយន្តក្នុងកម្រិត ជាតិអាល់កុល ០,៦៩មីលីក្រាម ក្នុង១លីត្រខ្យល់ ហើយនិងត្រូវបញ្ជូន ទៅតុលាការចាត់ការតាមច្បាប់ ៕</p>
<p><a class="thickbox" title="" href="/FileManager/Commons/2014/9/1/01-01-09-2014--10-08-56.jpg"><img src="/FileManager/Articles/mce/2014/9/1/01-01-09-2014--10-08-56.jpg" alt="" /></a></p>
<p><a href="https://www.facebook.com/video.php?v=1459227347677779&set=vb.100007715824149&type=2&theater" target="_blank">បញ្ជាក់ ៖ ចុចទីនេះ ដើម្បីទស្សនា វីដេអូ</a></p>
</div>
<p style="text-align: right;"><a href="http://www.dap-news.com/2011-06-14-02-39-55/94114-2014-09-01-02-12-45.html" target="_blank">ផ្តល់សិទ្ធដោយ ៖ ដើមអម្ពិល</a></p>