<p><span style="color: #000000;"><strong>ភ្នំពេញ៖</strong> ក្រុមបាល់ទាត់ជម្រើសជាតិកម្ពុជា នៅថ្ងៃទី២៨ ខែកុម្ភៈ ឆ្នាំ២០១៥ខាងមុខនេះនឹងបើកទ្វារទទួលស្វាគមន៍ ជំនួបមិត្តភាពអន្ដរជាតិមួយ ប្រកួតជាមួយនឹងក្រុម Singapore Selection Team របស់ប្រទេសសិង្ហបុរីមុននឹងចេញ ទៅប្រទេសម៉ាកាវ ដើម្បីធ្វើការប្រកួតជាមួយក្រុមជម្រើសជាតិម្ចាស់ផ្ទះ ក្នុងវគ្គជម្រុះពានរង្វាន់បាល់ទាត់ពិភពលោក FIFA World Cup ឆ្នាំ២០១៨ ។</span></p>
<p><span style="color: #000000;">យោងតាមមន្ដ្រីព័ត៌មានរបស់សហព័ន្ធកីឡាបាល់ទាត់កម្ពុជា (FFC) បានឲ្យដឹងថា ជំនួបមិត្តភាពអន្ដរជាតិរវាងក្រុម ជម្រើសជាតិកម្ពុជា និងក្រុម Singapore Selection Team នឹងចាប់ផ្ដើមនៅថ្ងៃទី២៨ ខែកុម្ភៈខាងមុខនៅលើទីលាន ពហុកីឡដ្ឋានខេត្តស្វាយរៀងវេលាម៉ោង៤រសៀល ។</span></p>
<p><span style="color: #000000;">ប្រភពព័ត៌មានដដែលបានបន្ដថា ការប្រកួតនេះគឺជាឱកាសដ៏ល្អ សម្រាប់ធ្វើតេស្ដសមត្ថភាពកីឡាកររបស់កម្ពុជាដែល មានឈ្មោះក្នុងបញ្ជីជម្រើសជាតិ ក្រោមការដឹកនាំរបស់គ្រូបង្វឹកជនជាតិកូរ៉េខាងត្បូងលោក Lee Tae Hoon ។</span></p>
<p><span style="color: #000000;">គិតមកដល់ពេលនេះលោក Lee នៅមិនទាន់ជម្រុះកីឡាករ សម្រាប់ត្រៀមជួបជាមួយក្រុម ជម្រើសជាតិម៉ាកាវ ក្នុងវគ្គ ជម្រុះតំបន់អាស៊ីនៃពាន World Cup ឆ្នាំ២០១៨នាថ្ងៃទី១២ ខែមីនា ឆ្នាំ២០១៥ខាងមុខនៅឡើយទេ។ ដូច្នេះហើយ ក្នុងឱការប្រកួតជាមួយក្រុម Singapore Selection Team របស់សិង្ហបុរីចុងខែកុម្ភៈនេះ លោក Lee នឹងចាប់ផ្ដើមជម្រុះ កីឡាករជាបណ្ដើរៗ ខណៈកីឡាករសរុបក្នុងបញ្ជីឈ្មោះក្រុមជម្រើសជាតិកម្ពុជាឆ្នាំ២០១៥ មានរហូតដល់៣៣នាក់ ឯ ណោះ ។</span></p>
<p><span style="color: #000000;">គួរបញ្ជាក់ផងដែរថាជំនួបមិត្តភាពអន្ដរជាតិរវាងក្រុមជម្រើសជាតិកម្ពុជានិងក្រុម Singapore Selection Team ក៏នឹង មានការផ្សាយផ្ទាល់នៅលើកញ្ចក់ទូរទស្សន៍ BTV ផងដែរ ។ ប៉ុន្ដែសម្រាប់អ្នកចូលទស្សនាការប្រកួតផ្ទាល់វិញ គឺត្រូវ ទិញសំបុត្រចូលទស្សនា ដោយសំបុត្រសម្រាប់អ្នកឈរមើលមានតម្លៃ ១.០០០រៀល រីឯសំបុត្រអ្នកអង្គុយ មានតម្លៃ ៤.០០០រៀល ៕</span></p>
<p><span style="color: #000000;"><a class="thickbox" title="" href="/FileManager/Commons/2015/2/24/2-24-2015-2-10-00-pm-24-02-2015--14-15-18.png"><span style="color: #000000;"><img src="/FileManager/Articles/mce/2015/2/24/2-24-2015-2-10-00-pm-24-02-2015--14-15-18.png" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>