<p>ខាងក្រោមនេះ ជាអត្ថបទជីវប្រវត្តិរបស់និស្សិត ម៉ុង គីមស្រុង ដែលបានសរសេរដោយខ្លួនប្អូនប្រុស<br />ផ្ទាល់តែម្តង។ ប្អូនប្រុសគឺជាអតីតសិស្សពូកែផ្នែកអក្សរសិល្ប៍ ទទួលបានចំណាត់ថ្នាក់លេខបីទូទាំង<br />ប្រទេស និងហើយសព្វថ្ងៃជាប់អាហារូបករណ៍ទៅសិក្សានៅប្រទេសរុស្ស៊ីផ្នែកស្ថាបត្យកម្ម។ និស្សិត<br />ម្នាក់នេះកើតក្នុងត្រកូលកសិករក្រីក្រ ដែលបច្ចុប្បន្នកំពុងត្រូវការថវិកាជាបន្ទាន់ ដើម្បីទិញសម្ភារៈ<br />សិក្សារួមមានកុំព្យូទ័រ និងសម្ភារៈមួយចំនួនទៀតដែលចាំបាច់ ជាជំនួយក្នុងការសិក្សារបស់ប្អូនប្រុស<br />ដោយគ្រួសារពុំមានលទ្ធភាពគ្រប់គ្រាន់ដើម្បីចំណាយទៅលើសម្ភារៈទាំងអស់នោះទេ។</p>
<p>សូមប្រិយមិត្តទាំងអស់គ្នា អានជីវប្រវត្តិរបស់ប្អូនប្រុស ម៉ុង គីមស្រុង និងជួយប្អូនប្រុសផង ជាថវិកា<br />ក្តី ជាសម្ភារៈក្តី ព្រោះថាប្អូនប្រុសនឹងត្រូវធ្វើដំណើរទៅប្រទេសរុស្ស៊ីនៅថ្ងៃព្រហស្បតិ៍ ទី4 ខែតុលា<br />ខាងមុខនេះហើយ។</p>
<p><strong>«</strong>ខ្ញុំបាទឈ្មោះ ម៉ុង គីមស្រុង ភេទ ប្រុស កើតថ្ងៃទី១១ ខែមិថុនា ឆ្នាំ១៩៩១ (២១ឆ្នាំ) នៅ ភូមិសមរម្យ<br />ឃុំរកាពប្រាំ ស្រុកត្បូងឃ្មុំ ខេត្តកំពង់ចាម។ ខ្ញុំកើតក្នុងត្រកូលកសិករ ដែលមានឪពុកឈ្មោះ ម៉េង ម៉ុង<br /> អាយុ ៤២ឆ្នាំ ម្តាយឈ្មោះ ឈន ចន្នី អាយុ៤១ឆ្នាំ និងខ្ញុំមានបងប្អូនបង្កើត បីនាក់ ប្រុសទាំងបី។ ខ្ញុំជា<br />កូនប្រុសច្បង ហើយប្អូនទី១ ឈ្មោះ ម៉ុង គីមស្រ៊ាង អាយុ ១៧ឆ្នាំ និងប្អូនទី២ ឈ្មោះ ម៉ុង គីមស្រ៊ន<br /> (ទារក)។ ឪពុកខ្ញុំមានមុខរបរជាអ្នកដឹកត្រីលក់ពីបឹងឯស្រុកក្រូចឆ្មា មកលក់នៅផ្សារក្បែរផ្ទះ ចំណែក<br />ឯ ម្តាយខ្ញុំគាត់ជួយលក់ត្រីដែលឪពុកខ្ញុំរកបានពីបឹងមក ក្រៅពីនោះគាត់នៅផ្ទះ ។ តែ បច្ចុប្បន្ន ពុំសូវ <br />មានត្រីលក់ទេ ព្រោះខ្សត់ត្រីនៅបឹង ។ ទីលំនៅ បច្ចុប្បន្ន នៅ ភូមិសមរម្យ ឃុំរកាពប្រាំ ស្រុកត្បូងឃ្មុំ<br /> ខេត្តកំពង់ចាម។</p>
<p style="text-align: center;"><a class="thickbox" title="" href="/FileManager/Commons/2012/9/29/award-and-certificate3-29-09-2012--17-28-38.jpg"><img src="/FileManager/Articles/mce/2012/9/29/award-and-certificate3-29-09-2012--17-28-38.jpg" alt="" /></a></p>
<p style="text-align: center;"><span style="color: #0000ff;">វិញ្ញាបនបត្រ និងមេដៃសំរឹទ្ធសិស្សពូកែទូទាំងប្រទេសផ្នែកអក្សរសិល្ប៍</span></p>
<p><strong>ជីវិតកុមារភាព</strong></p>
<p>កាលពីកុមារ ខ្ញុំបានរស់នៅជាមួយម្តាយ‑ឪពុករហូតដល់ថ្ងៃ ដែលខ្ញុំត្រូវចូលរៀន។ ដោយសារ<br />កង្វះខាតជីវភាពក្នុងបន្ទុកគ្រួសារខ្លាំងពេក ខ្ញុំត្រូវបាន ម្តាយ‑ឪពុក បញ្ជូនឲ្យទៅរស់នៅជាមួយ<br />តាយាយ នៅស្រុកកំនើតរបស់ម្តាយរបស់ខ្ញុំដើម្បីចូលរៀននៅទីនោះ។ ខ្ញុំបានចូលរៀនថ្នាក់ទី១<br />នៅឆ្នាំ១៩៩៨ នៅសាលា បឋមសិក្សា រំចេកនៅភូមិរំចេក ឃុំរំចេក ស្រុកកំពង់សៀម ខេត្តកំពង់<br />ចាម។ ក្នុងវ័យកំពុងរៀននៅ បឋមសិក្សា ខ្ញុំបានទៅស៊ីឈ្នួល ដកសំណាបដើម្បីយកលុយ ចូល<br />រៀនព្រោះពេលនោះជីវភាព គ្រួសារខ្ញុំលំបាកយ៉ាងខ្លាំង ហើយការចូលរៀនត្រូវបង់លុយទៀត។<br /> ក្នុងមួយថ្ងៃ ខ្ញុំទទួលបាន<strong></strong>លុយ១០០៛ ពីយាយយកទៅចាយនៅ ឯសាលារៀន ប៉ុន្តែជួនកាលក៏អត់<br />លុយសូម្បីតែ១០០៛។ នៅចុងឆ្នាំ រៀបនឹងប្រលងបញ្ចប់ថ្នាក់ទី១ ខ្ញុំបានកើតជំងឺគ្រុនឈាម កំរិតធ្ងន់<br />ដែលជាហេតុធ្វើឲ្យខ្ញុំត្រូវរៀនត្រួតថ្នាក់ ។ មកដល់ឆ្នាំ២០០០ ទើបខ្ញុំបានឡើងថ្នាក់ទី២ ។ ខ្ញុំបាន<br />រៀនចប់ថ្នាក់ទី២ ហើយដោយសារឪពុកខ្ញុំ ឃើញខ្ញុំរស់នៅលំបាក គាត់ក៏បានយកខ្ញុំទៅរស់នៅ<br />ជាមួយពួកគាត់វិញ នៅភូមិសមរម្យ ឃុំរកាពប្រាំ ស្រុកត្បូងឃ្មុំ ខេត្តកំពង់ចាម ។</p>
<p>ពូកគាត់បានបញ្ចូន ខ្ញុំឲ្យទៅរៀនបន្តក្នុងថ្នាក់ទី៣ នៅសាលាបឋមសិក្សា តាប៉ាវ ក្នុងឆ្នាំ២០០១<br /> នៅក្នុងភូមិចំរើន ឃុំទួលស្នួល ស្រុកក្រូចឆ្មា ខេត្តកំពង់ចាម។ ខ្ញុំបានដើរទៅរៀន ចំងាយប្រមាណ<br /> ៣គីឡូម៉ែត្រពីផ្ទះជារៀងរាល់ថ្ងៃ រហូតដល់ថ្នាក់ទី៤ ឪពុកខ្ញុំក៏បានទិញកង់មួយ ឲ្យខ្ញុំជិះទៅរៀន។<br /> ការរៀននៅបឋមសិក្សា ខ្ញុំបានមានទំនាក់ទំនងល្អជាមួយលោកគ្រូ អ្នកគ្រូ និង មិត្តរួមថ្នាក់។</p>
<p style="text-align: center;"><a class="thickbox" title="" href="/FileManager/Commons/2012/9/29/kimsrong-family-at-front-of-house-29-09-2012--17-32-08.jpg"><img src="/FileManager/Articles/mce/2012/9/29/kimsrong-family-at-front-of-house-29-09-2012--17-32-08.jpg" alt="" /></a></p>
<p style="text-align: center;"><a class="thickbox" title="" href="/FileManager/Commons/2012/9/29/kimsrong-with-his-parents-and-brothers-at-home-29-09-2012--17-32-34.jpg"><img src="/FileManager/Articles/mce/2012/9/29/kimsrong-with-his-parents-and-brothers-at-home-29-09-2012--17-32-34.jpg" alt="" /></a></p>
<p style="text-align: center;"><span style="color: #0000ff;">គីមស្រុង និងក្រុមគ្រួសារថតនៅក្នុងផ្ទះ </span></p>
<p><strong>វ័យសិក្សានៅអនុ និង វិទ្យាល័យហ៊ុន សែនត្រពាំងឫស្សី</strong></p>
<p>នៅឆ្នាំ២០០៥ ខ្ញុំបានប្រលងបញ្ចប់ថ្នាក់ទី៦ ហើយក៏បានជាប់បន្តទៅរៀននៅអនុវិទ្យាល័យក្នុង<br />ថ្នាក់ទី៧។ ការធ្វើដំណើរទៅអនុវិទ្យាល័យ ដោយជិះកង់ដដែល ដែលចំងាយប្រហែលប្រមាណ<br /> ៧គីឡូម៉ែត្រ ពីផ្ទះ។ នៅក្នុងថ្នាក់ដំបូងនៃអនុវិទ្យាល័យនេះ គ្រូមានបើកបង្រៀនគួបន្ថែម។ សិស្ស<br />ដទៃទៀតភាគច្រើន ទៅ រៀនគួបន្ថែម ចំនែកខ្ញុំមិនមានលុយទៅរៀនគួនឹងគេឡើយ។ ដោយខ្ញុំជា<br />សិស្សឧស្សាហ៍ព្យាយាម ក្នុងការសិក្សា លោកគ្រូ អ្នកគ្រូអាណិត ក៏ផ្តល់ឱកាស់ ឲ្យខ្ញុំបានចូលរៀន<br />គួនឹងគេ ដោយមិនចាំបាច់ បង់លុយទេ។ នៅពេលបានចូលរៀនគួបន្ថែមធ្វើឲ្យចំណេះដឹងរបស់ខ្ញុំ<br /> កាន់តែរីកចំរើនជាងមុនថែម ទៀត។ នៅឆ្នាំ២០០៦ ខ្ញុំបានចូលរៀនថ្នាក់ទី៨ ជីវភាពសិក្សារបស់ខ្ញុំ<br />នៅដដែល។</p>
<p>នៅក្នុងថ្នាក់នេះហើយ ដែលខ្ញុំបានស្គាល់លិខិតសរសើរដំបូងរបស់ខ្ញុំ ព្រោះពេលនោះលោកនា<br />យកបានរៀបចំពិធីជប់លៀង ប្រគល់លិខិតសរសើរដល់សិស្សពូកែប្រចាំថ្នាក់ពីលេខ១ ដល់លេខ<br />៣ ដែលចំពេលដែលខ្ញុំបានប្រលង ជាប់ចំណាត់ថ្នាក់លេខ១ប្រចាំថ្នាក់។ នៅឆ្នាំ២០០៧ ខ្ញុំបានបន្ត<br />ចូលរៀនក្នុងថ្នាក់ទី៩ដែលក្នុងថ្នាក់នេះខ្ញុំ មានទំនាក់ទំនងយ៉ាងល្អជាមួយអ្នកគ្រូផ្នែកអក្សរសិល្ប៍ខ្មែរ<br />គាត់ក៏បានជួយណែនាំខ្ញុំឲ្យរៀនបានពូកែ ផ្នែកអក្សរសិល្ប៍ខ្មែរ ហើយពេលនោះត្រូវនឹងថ្នាក់ដែល<br />ត្រូវចូលរួមប្រលងជ្រើសរើសសិស្សពូកែទៀតនោះ ខ្ញុំក៏បានចូលរួមប្រលងជ្រើសរើសសិស្សពូកែ<br />ប្រចាំអនុវិទ្យាល័យ។</p>
<p style="text-align: center;"><a class="thickbox" title="" href="/FileManager/Commons/2012/9/29/kimsrong-at-his-house-1-29-09-2012--17-34-31.jpg"><img src="/FileManager/Articles/mce/2012/9/29/kimsrong-at-his-house-1-29-09-2012--17-34-31.jpg" alt="" /></a></p>
<p style="text-align: center;"><span style="color: #0000ff;">គីមស្រុង អង្គុយនៅក្នុងផ្ទះ</span></p>
<p>ខ្ញុំបានមានអារម្មណ៍ភ័យអរយ៉ាងខ្លាំង ព្រោះវាជាលើកដំបូងរបស់ខ្ញុំហើយ ដែលចូលរួមការប្រលង<br />ប្រជែងយ៉ាងស្វិតស្វាញយ៉ាងនេះ។ លទ្ធផល ប្រលងរបស់ខ្ញុំ បានផ្តល់ផលយ៉ាងជាទីគាប់ចិត្តគឺ ខ្ញុំ<br />បានជាប់ចំណាត់ថ្នាក់លេខ១ ផ្នែកអក្សរសិល្ប៍ខ្មែរ ប្រចាំអនុវិទ្យាល័យ នេះជាលទ្ធផលដែលផ្តល់<br />ឱកាសឲ្យខ្ញុំបានចូលរួមប្រលងជ្រើសរើសសិស្សពូកែ ថ្នាក់ស្រុកត្រៀមប្រលងនៅថ្នាក់ខេត្តទៀត។<br /> ការប្រលងថ្នាក់ស្រុក មានភាពលំបាកណាស់ ដែលសិស្ស មកពីគ្រប់ឃុំទាំងអស់ដែលជាប់ចំណាត់<br />ថ្នាក់ប្រចាំអនុវិទ្យាល័យ ត្រូវប្រកួតប្រជែងគ្នាដើម្បីឋិតក្នុងជំរើស៨នាក់ ដែលត្រូវចូលរួមប្រលងថ្នាក់<br />ខេត្ត ។ នៅពេលនោះ ខ្ញុំបានជាប់ចំណាត់ថ្នាក់លេខ៧ក្នុងជំរើស ៨នាក់។ ខ្ញុំក៏មានឱកាស បានចូល<br />រួមប្រលងថ្នាក់ខេត្តទៀត នេះជាដំណាក់កាលមួយយ៉ាងញាប់ញ័របំផុត ព្រោះវាជាឱកាសចុងក្រោយ ដែលសិស្សជាប់ចំណាត់ថ្នាក់ប្រចាំស្រុកទាំងអស់ត្រូវប្រកួតប្រជែងគ្នា ដើម្បីយកជ័យលាភីថ្នាក់ខេត្ត<br /> ទៅចូលរួមប្រលងថ្នាក់ជាតិនៅខេត្តសៀមរាបនាឆ្នាំនោះ ដែលជា ដំណាក់កាលចុងក្រោយបំផុត។</p>
<p>លទ្ធផល នៃការប្រលងថ្នាក់ខេត្ត ខ្ញុំបានជាប់ចំណាត់ថ្នាក់លេខ៧ ក្នុងជំរើស៩នាក់ ដែលត្រូវបាន<br />ចូលរួមប្រលងថ្នាក់ជាតិនៅខេត្តសៀមរាប នៅថ្ងៃទី០៥-០៦-០៧ ខែឧសភា ឆ្នាំ២០០៨។ លទ្ធផល<br />ប្រលងលើកនោះ ខ្ញុំមិនបានជាប់ចំណាត់ថ្នាក់ជ័យលាភីជាសិស្សពូកែទូទាំងប្រទេសទេ។ ខ្ញុំបាន<br />មានអារម្មណ៍អន់ចិត្តបន្តិច ប៉ុន្តែខ្ញុំមិនបោះបង់ទេ។ ខ្ញុំបានត្រលប់មកខេត្តកំពង់ចាមវិញ ហើយធ្វើ<br />ដំណើរ ត្រលប់ទៅអនុវិទ្យាល័យ វិញដែរ ខ្ញុំបានប្រឹងរៀនតទៅទៀត ដើម្បីត្រៀមប្រលងសញ្ញា<br />បត្រ មធ្យម សិក្សាបឋមភូមិនៅថ្ងៃទី១៨-១៩ ខែកញ្ញាឆ្នាំ២០០៨។ បន្ទាប់ពីថ្ងៃប្រលង ខ្ញុំរងចាំមើល<br />លទ្ធផលរបស់ខ្លួន។ នៅពេលនោះលទ្ធផលរបស់ខ្ញុំ គឺ ខ្ញុំទទួលបាននិទ្ទេស ល្អ ។</p>
<p style="text-align: center;"><a class="thickbox" title="" href="/FileManager/Commons/2012/9/29/kimsrongs-bed-room-29-09-2012--17-45-37.jpg"><img src="/FileManager/Articles/mce/2012/9/29/kimsrongs-bed-room-29-09-2012--17-45-37.jpg" alt="" /></a></p>
<p style="text-align: center;"><span style="color: #0000ff;">គ្រែ និងកន្លែងរៀនរបស់ គីមស្រុង</span></p>
<p>ឆ្នាំ២០០៨ ខ្ញុំបានបន្ត ចូលរៀនថ្នាក់ទី១០ នៅវិទ្យាល័យ ដំណាក់កាលនេះ ជាដំណាក់កាល ដែល<br />ត្រូវត្រៀមខ្លួន សំរាប់ ការប្រលងជ្រើសរើសសិស្សពូកែម្តងទៀត រួមទាំងប្រលងសញ្ញា បត្រមធ្យម<br />សិក្សា ទុតិយភូមិនៅ ថ្នាក់ទី១២ខាងមុខ។ នៅចុងឆ្នាំសិក្សាថ្នាក់ទី១០ លោកនាយកបា នរៀបចំ <br />ពិធីជប់លៀងប្រគល់ លិខិតសរសើរ ដល់សិស្សពូកែ សំរាប់ឆ្នាំចាស់ និងឆ្នាំថ្មី។ នៅឆ្នាំ២០០៩<br /> ក្រសួងបានផ្លាស់ប្តូរកម្មវិធីសិក្សាសំរាប់ថ្នាក់ទី១១ថ្មី ដោយបែងចែកសិស្សជាពីរកំរិត គឺកំរិតខ្ពស់<br />(វិទ្យាសាស្ត្រពិត) និងកំរិតមូលដ្ឋាន (វិទ្យាសាស្ត្រសង្គម)។ លោកនាយក បានរៀបចំការប្រលង<br />ជ្រើសរើសកំរិតសិក្សា។</p>
<p>នៅថ្ងៃទី ១៤ ខែ កុម្ភៈ ឆ្នាំ ២០១១ មានកម្មវិធីសម្ភាសន៍ពិសេសមួយ នៅផ្ទះពេទ្យ ចា ភូមិច័ន្ទនិមិត្ត<br /> គឺជាកម្មវិធីជ្រើសរើសយកសិស្សថ្នាក់ទី១០ ដើម្បីទទួលអាហារូបករណ៍មួយឈ្មោះ ស៊ូប្រា(Supra) <br />ដែលរៀបចំឡើងដោយប្អូនរបស់ពេទ្យចា គឺលោកគ្រូ អ៊ុំ ពន្លឺ ។ ខ្ញុំមិនមែនជាគោលដៅជ្រើសរើស<br />របស់កម្មវិធីនោះទេ ប៉ុន្តែ ខ្ញុំត្រូវបានគាត់លើកទឹកចិត្តឱ្យចូលសម្ភាសន៍ ជាមួយជនជាតិអាមេរិក<br />២នាក់ ដែលលោកគ្រូពន្លឺ នាំទៅទីនោះ ។ ការសម្ភាសន៍បានធ្វើឡើងចប់ ក៏ពុំទាន់បានដឹងលទ្ធផល<br />អ្វីដែរនាថ្ងៃនោះ។</p>
<p>ចំណែកឯនៅសាលាវិញ សិស្សដែលមានសមត្ថភាពអាចរៀនក្នុងថ្នាក់កំរិតខ្ពស់បាន មានតែ១១នាក់<br /> ប៉ុណ្ណោះ ក្នុងនោះរួមទាំងរូបខ្ញុំផងដែរ។ ក្នុងការសិក្សាក្នុងថ្នាក់កំរិតខ្ពស់នេះ មានការប្រកួតប្រជែងគ្នា <br />យ៉ាងខ្លាំងក្លា រហូតមកដល់ថ្នាក់ទី១២ ក្រសួងបានផ្លាស់ប្តូរកម្មវិធីម្តងទៀត ដោយបំបាត់ចោលកំរិត<br />ខ្ពស់ ប៉ុន្តែនៅ រក្សាថ្នាក់ផ្តោតលើវិទ្យាសាស្ត្រពិត និង វិទ្យាសាស្ត្រសង្គម។</p>
<p style="text-align: center;"><a class="thickbox" title="" href="/FileManager/Commons/2012/9/29/certificate-of-3rd-place-grade-12-for-nationwide2011-29-09-2012--17-53-43.jpg"><img src="/FileManager/Articles/mce/2012/9/29/certificate-of-3rd-place-grade-12-for-nationwide2011-29-09-2012--17-53-43.jpg" alt="" /></a></p>
<p style="text-align: center;"><span style="color: #0000ff;">វិញ្ញាបនបត្រ សិស្សពូកែទូទាំងប្រទេសផ្នែកអក្សរសិល្ប៍</span></p>
<p>ក្នុងថ្នាក់ទី១២នេះ ខ្ញុំមានតួនាទី ជាច្រើន បន្ទាប់ពីជាសិស្សម្នាក់ក្នុងវិទ្យាល័យ ខ្ញុំក៏ជាប្រធានថ្នាក់<br /> ជាប្រធានក្រុមប្រឹក្សាកុមារ ប្រចាំនៅ វិទ្យាល័យ និង ជាអ្នកប្រឹក្សាដល់លោកនាយកផងដែរ។<br /> ម្យ៉ាងទៀត ថ្នាក់ទី១២នេះ ជាថ្នាក់ដែលខ្ញុំត្រូវមាន ការប្រលងជាច្រើន ទាំងការប្រលងជ្រើសរើស<br />សិស្សពូកែលំនាំដូចថ្នាក់ទី៩ និងទាំងការត្រៀមខ្លួន ប្រលង សញ្ញាបត្រមធ្យមសិក្សាទុតិយភូមិ។ <br />ចំពោះការប្រលងជ្រើសរើស សិស្សពូកែ ខ្ញុំបានឆ្លងកាត់ ការប្រលង គ្រប់ដំណាក់កាល រហូតដល់<br />ការប្រលងថ្នាក់ជាតិ ដែលធ្វើនៅ រាជធានីភ្នំពេញនៅថ្ងៃទី ០១-០២-០៣ ខែមេសា ឆ្នាំ២០១១ ។ <br />លទ្ធផលលើកនេះគឺ ខ្ញុំបានទទួល ជ័យលាភីលេខ ៣ ក្នុងចំណោម សិស្សជាជំរើស ទាំង១០នាក់ <br />និងក្នុងចំណោមបេក្ខជនប្រលង ផ្នែកអក្សរសិល្ប៍ខ្មែរ ទាំង៨០នាក់ មកពីទូទាំងប្រទេស។</p>
<p>នៅថ្ងៃប្រកាសជ័យលាភី ខ្ញុំបានទទួលនូវវិញ្ញាបនបត្រជយលាភីសិស្សពូកែថ្នាក់ជាតិ និងបំពាក់<br />មេដាយ សំរឹទ្ធិដោយផ្ទាល់ ពីសំណាក់ ឯកឧត្តម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា។ <br />នេះជាជ័យលាភីមួយ ដែលលើកទឹកចិត្តខ្ញុំបំផុតសំរាប់ត្រៀមប្រលងសញ្ញាបត្រទុតិយភូមិនាពេល<br />ខាងមុខ។ នៅពេលខ្ញុំត្រលប់មកវិញ ចំពេលដែលក្រសួងអប់រំ បានផ្តល់ឱកាសឲ្យសិស្សនៅវិទ្យា<br />ល័យថ្នាក់ ទី១២ ដាក់ពាក្យយកអាហារូបករណ៍រដ្ឋ។ នៅពេលនោះ ខ្ញុំសំរេចចិត្តមិនដាច់ទេ ថាត្រូវ<br />ជ្រើសរើសមុខវិជា្ជ ដែលខ្លួនចូលចិត្តមួយណានោះ ខ្ញុំបានដេកគិតអស់រយៈពេលយ៉ាងយូរ ទើបខ្ញុំ<br />សំរេចចិត្តមិនដាក់អាហា រូបករណ៍ ចំពោះមុខវិជ្ជាដែលខ្ញុំចូលចិត្តនោះទេ ថែមទាំងមិនដាក់អាហា<br />រូបករណ៍ពីវិទ្យាល័យទៀតផង ពីព្រោះខ្ញុំខ្លាចបើសិនជាខ្ញុំដាក់អាហារូបករណ៍ហើយ ខ្ញុំមិនបានជាប់<br />នោះ ខ្ញុំពិតជាសោកស្តាយណាស់ ដោយហេតុជីវភាពគ្រួសារខ្ញុំគ្មានលទ្ធភាពផ្គត់ផ្គង់ដល់ការបន្តការ<br />សិក្សានៅសាកលវិទ្យាល័យទេ ហើយ បើខ្ញុំដាក់អាហារូបករណ៍ពី វិទ្យាល័យនោះ អាហារូបករណ៍<br />ស្វ័យប្រវត្តិរបស់ខ្ញុំ ដែលកើតចេញពីជ័យលាភីសិស្សពូកែនោះត្រូវបាត់បង់ ដូច្នេះខ្ញុំក៏សំរេចចិត្តមិន<br />ដាក់អាហារូបករណ៍ពីវិទ្យាល័យ ហើយទៅដាក់អាហារូបករណ៍ស្វ័យប្រវត្តិតែម្តង។</p>
<p><strong>ថ្ងៃប្រឡងបាក់ឌុប</strong></p>
<p>នៅថ្ងៃប្រលងបានមកដល់អារម្មណ៍ ខ្ញុំមិនសូវភិតភ័យទេ ប៉ុន្តែខ្លាចលទ្ធផលមិនបាននិទ្ទេសល្អ។ <br />នៅថ្ងៃប្រកាសលទ្ធផល ជាថ្ងៃមួយ ដែលមិត្តភក្តិខ្ញុំនិងរូបខ្ញុំភ័យអរបំផុត នៅពេលនោះការប្រកាស<br />លទ្ធផល បានបង្ហាញថា មានមិត្តភក្តិខ្ញុំជាច្រើនបានជាប់និទ្ទេស B ធ្វើឲ្យខ្ញុំបារម្ភពីលទ្ធផលរបស់<br />ខ្លួនឯងមិនដឹងយ៉ាងណា។ ជាសំណាងល្អ បំផុតសំរាប់ខ្ញុំដែលខ្ញុំបានដឹងថាលទ្ធផលរបស់ខ្លួនគឺ<br />និទ្ទេស A ។</p>
<p style="text-align: center;"><a class="thickbox" title="" href="/FileManager/Commons/2012/9/29/back-ii-certificate-29-09-2012--17-59-30.jpg"><img src="/FileManager/Articles/mce/2012/9/29/back-ii-certificate-29-09-2012--17-59-30.jpg" alt="" /></a></p>
<p style="text-align: center;"><span style="color: #0000ff;">វិញ្ញាបនបត្របណ្តោះអាសន្ន មធ្យមសិក្សាទុតិយភូមិ</span></p>
<p>ជីវិតរស់នៅភ្នំពេញបន្ទាប់ពីលទ្ធផលប្រលងបាក់ឌុបបានចេញ ខ្ញុំក៏បានធ្វើដំណើរមករៀននៅ<br />ភ្នំពេញរស់នៅក្នុងបន្ទប់ជួល ជាមួយមិត្តភក្តិ។ ខ្ញុំបានដាក់ពាក្យ ចូលរៀននូវជំនាញអាហារូប<br />ករណ៍ស្វ័យប្រវត្តិរបស់ខ្ញុំ គឺនីតិសាស្ត្រ នៅសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រ<br />សេដ្ឋកិច្ច (RULES) ក្រោមការជួយជ្រោមជ្រែងទាំង ស្មារតី និង សម្ភារៈមួយចំនួនធំពីលោកគ្រូ<br />ពន្លឺ ។ លោកគ្រូបានជួយ ឧបត្ថម្ភ នូវថ្លៃឈ្នូលសិក្សា ភាសា អង់គ្លេស នៅវិទ្យាស្ថានញីវវើល <br />(New World Institute) ថ្លៃសាំង និង ថ្លៃសម្ភារៈសិក្សាផ្សេងៗទៀត ។</p>
<p>ក្នុងខណៈពេល កំពុងសិក្សានៅមហាវិទ្យាល័យនោះដែរ ដោយសារជីវភាពគ្រួសារខ្សត់ខ្សោយ <br />លោកគ្រូបាននាំខ្ញុំឱ្យបានឆ្លៀតចូលធ្វើការជាបុគ្គលិកផ្នែកបំពងសាច់មាន់នៅ KFC ដើម្បីយក<br />លុយទៅរៀនបង់ថ្លៃឈ្នួលបន្ទប់ និងទិញអាហារប្រចាំថ្ងៃ។ ការតស៊ូក្នុងការងារផង រៀនច្រើន<br />ម៉ោងផង អស់រយៈពេលជិត ៦ខែ ខ្ញុំពុំសូវមានពេលសំរាកឡើយ ធ្វើឱ្យមានការសម្រេចចិត្តមួយ<br /> ពីលោកគ្រូពន្លឺ ឱ្យខ្ញុំឈប់ធ្វើការពី KFC ហើយគាត់ជាអ្នកឧបត្ថម្ភបន្ថែមចំនួន ៦៥ ដុល្លារ ក្នុង១ខែ<br /> គឺច្រើនជាង ថ្លៃប្រាក់ខែខ្ញុំនៅពេលធ្វើការទៅទៀត ក្នុងគោលបំណងរក្សាសុខភាព និង ឱ្យខ្ញុំផ្តោត<br />លើ ការសិក្សា ឱ្យបានច្រើនបន្ទាប់មក ខ្ញុំបានទៅដាក់ពាក្យប្រលងអាហារូបករណ៍ទៅសិក្សានៅ<br />សហពន្ធរុស្ស៊ី ខ្ញុំក៏បានប្រលងជាប់ចំណាត់ថ្នាក់លេខ ៤ ក្នុងចំណោមនិស្សិត១៧៦នាក់ ដែលដាក់<br />ពាក្យប្រលង។ ដូច្នេះ ខ្ញុំក៏បាន សំរេចបំណងចំពោះមុខវិជ្ជា ដែលខ្ញុំស្រឡាញ់បំផុត គឺខ្ញុំដាក់ជំនាញ<br /> ស្ថាបត្យកម្ម ទៅបន្តការសិក្សានៅ ប្រទេសរុស្ស៊ី រយៈពេល៥ឆ្នាំ ប៉ុន្តែជាអកុសលការផ្តល់អាហារូប<br />ករណ៍របស់ប្រទេសរុស្ស៊ី និស្សិតខ្មែរត្រូវចំណាយអស់លុយយ៉ាងច្រើនព្រោះប្រាក់ឧបត្ថម្ភក្នុងការ<br />រស់នៅប្រទេសរុស្ស៊ីបានតែ ៤៥ដុល្លារ ក្នុង១ខែ តែប៉ុណ្ណោះ។</p>
<p style="text-align: center;"><a class="thickbox" title="" href="/FileManager/Commons/2012/9/29/kimsrong-reads-books-29-09-2012--18-04-24.jpg"><img src="/FileManager/Articles/mce/2012/9/29/kimsrong-reads-books-29-09-2012--18-04-24.jpg" alt="" /></a></p>
<p style="text-align: center;"><span style="color: #0000ff;">គីមស្រុង មានការតស៊ូខំប្រឹងរៀនសូត្រយ៉ាងខ្លាំង បើទោះជាជួបបញ្ហាលំបាកខ្លាំងយ៉ាងណាក៏ដោយ</span></p>
<p style="text-align: left;">នៅពេលនេះ ខ្ញុំសូមស្នើសុំពីសំណាក់ ឯកឧត្តម លោកឧកញ្ញា លោកជំទាវ លោក លោកស្រី <br />នាងកញ្ញា ដែលជាសប្បុរសជនទាំងអស់ មេត្តជួយឧបត្ថម្ភជាថវិកាក្តី ជាសម្ភារៈក្តី ដល់រូបខ្ញុំបាទ<br /> ដើម្បីបាន បន្តការសិក្សានៅប្រទេសរុស្សីនេះ តាមទឹកចិត្តសទ្ធា ជ្រះថ្លារបស់អស់លោកអ្នក ។<br /> អំណោយដ៏មានតម្លៃ របស់លោកអ្នក ពិតជាមានតម្លៃមិនអាចកាត់ថ្លៃបានឡើយ គឺនឹងបានជួយ<br />និស្សិតក្រីក្រ ហើយមាន ការសិក្សាយ៉ាងវិជ្ជមាន ដូចរូបខ្ញុំដល់ត្រើយដូចបំណង ហើយខ្ញុំសន្យា<br />នឹងប្រឹង តស៊ូសិក្សានៅទីនោះ លុះបានសម្រេចលទ្ធផលចុងក្រោយជាទីគាប់ចិត្ត ខ្ញុំនឹងតបស្នង<br />គុណវិញ ខ្ញុំនឹងមិនភ្លេចគុណរបស់លោកអ្នកឡើយ ពេញមួយជីវិតនៃខ្ញុំ ។</p>
<p style="text-align: left;"><strong>សម្ភារៈនិងថវិកា ចាំបាច់សម្រាប់ការសិក្សា ត្រូវស្នើសុំ ៖</strong></p>
<p style="text-align: left;">1- Laptop : 1 unit = $ 600.00<br /> 2- Hard Disk Memory : 1 unit = $ 70.00<br /> 3- Drawing Materials : 1 set = $ 40.00<br />4- Meal Allowance : (if supported)<strong></strong></p>
<p style="text-align: left;"><strong>លោកអ្នកអាចទំនាក់ទំនងឧបត្ថមប្អូនប្រុស គីមស្រុង តាមរយះ ៖</strong></p>
<p style="text-align: left;">1-ខ្ញុំបាទផ្ទាល់ ម៉ុង គីមស្រុង លេខទូរស័ព្ទ ០៨៩-៦៨០ ៨១៣ និងe-mail: kimsrongmong@gmail.com<br />2-អ៊ុំ ពន្លឺ, H/P ០១២-៩៧០ ០៩៤ និង e-mail : punlieuum@yahoo.com</p>
<p>ឬលោកអ្នកអាចទំនាក់ទំនងមកខាងគេហទំព័រ Camnews តាមរយៈទូរស័ព្ទលេខ ០១៥ ៥៥៣៣៧៧<br /> សូមអរគុណ…!</p>
<p style="text-align: right;">ដោយ៖ សិលា<br />អត្ថបទ និងរូបភាព៖ លោកគ្រូ អ៊ុំ ពន្លឺ</p>