<p>កម្មកររថភ្លើងម្នាក់នៅក្រុង Madrid ប្រទេសអេស្ប៉ាញ ស្ទើរតែមិនជឿលើភ្នែកខ្លួនឯង នៅពេលបានប្រទះឃើញសែកមួយសន្លឹកដែលមានតម្លៃរហូតដល់ ២លានដុល្លារអាមេរិក ត្រូវបានគេភ្លេចចោលនៅក្នុងរថភ្លើង។</p>
<p style="text-align: center;"><br /> <a class="thickbox" title="" href="/FileManager/Commons/2013/9/28/orange-28-09-2013--21-30-35.jpg"><img src="/FileManager/Articles/mce/2013/9/28/orange-28-09-2013--21-30-35.jpg" alt="" /></a><br /><em>នៅក្នុងរថភ្លើងមួយ នៅអេស្ប៉ាញ។ រូប ៖ Orange</em></p>
<p>ប្រភពព័ត៌មាន បានឱ្យដឹងថា សន្លឹកសែកមួយសន្លឹកដែលមានតម្លៃ ២លានដុល្លារ របស់ធនាគារអាមេរិកនេះ ត្រូវបានកម្មករម្នាក់ មានឈ្មោះថា Emilio Guerra ប្រទះឃើញនៅក្នុងកាបូបដៃមួយដែលជាប់នៅក្នុងចន្លោះទ្វារ នៅការ៉ាសជួសជុលរថភ្លើងមួយកន្លែងក្នុងក្រុង Madrid ។ <br /><br />Emilio Guerra បានថ្លែងថា តាមការស្មាន ប្រហែលជាក្រុមចោរបានប្រមូលយកប្រាក់ទាំងអស់ដែលនៅក្នុងកាបូបដៃ ប៉ុន្ដែមិនចាប់អារម្មណ៍ទៅលើក្រដាសសែកដ៏មានតម្លៃនេះ ដែលត្រូវបានគេជឿថា ជារបស់បុរសវ័យ ៤៩ឆ្នាំម្នាក់ នៅ California អាមេរិក។ ក្រៅពីក្រដាសសែក Emilio Guerra ក៏បានរកឃើញប័ណ្ណបើកបរ និងប័ណ្ណឥណទានជាច្រើនទៀតក្នុងកាបូបនោះ មុនពេលប្រគល់វាទៅឱ្យអ្នកគ្រប់គ្រងរបស់គាត់។<br /><br />Jose Manuel del Cura ដែលជាអ្នកគ្រប់គ្រងរបស់ Emilio Guerra និយាយប្រាប់សារព័ត៌មាន El Pais ថា ៖ “យើងមានការភ្ញាក់ផ្អើលជាខ្លាំង! យើងបាននាំគ្នារាប់លេខសូន្យដែលមាននៅលើសន្លឹកសែកនេះ ព្រោះមិនហ៊ានជឿទៅលើអ្វីដែលពួកយើងបានឃើញ។ ពិតជាមិនគួរឱ្យជឿសោះថា នៅក្នុងសង្គមនេះ មានមនុស្សដែលមានប្រាក់ដ៏ច្រើន ចំណែកមនុស្សខ្លះមិនមានអ្វីទាំងអស់។<br /><br />ក្រោយមក កាបូបដែលពេញដោយរបស់មានតម្លៃនោះ ត្រូវបានគេបញ្ជូនទៅកាន់ស្ថាប័ននគរបាល ហើយបច្ចុប្បន្ន សមត្ថកិច្ចកំពុងតាមរកម្ចាស់របស់នេះ។</p>
<p style="text-align: center;"><a class="thickbox" title="" href="/FileManager/Commons/2013/9/28/13801845098223971380210482noticianormal-28-09-2013--21-31-06.jpg"><img src="/FileManager/Articles/mce/2013/9/28/13801845098223971380210482noticianormal-28-09-2013--21-31-06.jpg" alt="" /></a></p>
<p style="text-align: center;"><em>កម្មកររថភ្លើង គឺលោក Emilio Guerra និង José Manuel del Cura ដែលបានរើសបានកាបូប</em><br /><em>ដែលមានសែកតម្លៃ ២លានដុល្លារអាមេរិក</em></p>
<p><br />តំណាងស្ថាប័ននគរបាល បានថ្លែងថា ៖ “យើងខ្ញុំកំពុងតាមរកអាស័យដ្ឋានម្ចាស់របស់នេះ។ ប៉ុន្ដែយើងនឹងមិនប្រគល់កាបូបនេះភ្លាមនោះទេ ដោយយើងត្រូវធ្វើការបញ្ជាក់នូវប្រភពរបស់ប្រាក់ក្នុងសែកនោះ ថាតើវាស្របច្បាប់ដែរ ឬអត់។</p>
<p style="text-align: right;"><br /><br />ដោយ ៖ តារា<br />ប្រភព ៖ Nydailynews/El Pais<br /><br /><br /></p>