<p>នៅវេលាម៉ោង ១៣ និង ៤៥នាទី ថ្ងៃទី ១៣ តុលានេះ ក្បួនដង្ហែសពអតីតអគ្គមេបញ្ជាកងទ័ពវៀតណាម Vo Nguyen Giap ដែលបានចាកចេញពីហាណូយ បានធ្វើដំណើរជិតដល់គោលដៅ គឺតំបន់ Vung Chua ជាទីកន្លែងចុងក្រោយរបស់លោក។</p>
<p style="text-align: center;"><a class="thickbox" title="" href="/FileManager/Commons/2013/10/13/vo3-13-10-2013--15-19-02.jpg"><img src="/FileManager/Articles/mce/2013/10/13/vo3-13-10-2013--15-19-02.jpg" alt="" /></a></p>
<p>សពអតីតអគ្គមេបញ្ជាការកងទ័ពរបស់ វៀតណាម ដែលធ្លាប់បានច្បាំងឈ្នះ បារាំង និងអាមេរិក គឺលោក Vo Nguyen Giap ត្រូវបានដង្ហែចាកចេញពីក្រុងហាណូយ តាមយន្ដហោះ ឆ្ពោះទៅកាន់ព្រលានយន្ដហោះ Dong Hoi ខេត្រ Guang Binh ។ បន្ទាប់ពីមកដល់គោលដៅទីមួយ(ព្រលានយន្ដហោះ Dong Hoi) នៅវេលាម៉ោង ១២ និង ៤៥នាទី ក្បួនដង្ហែសព ក៏បានបន្ដដំណើរ ចាកពីព្រលានយន្ដហោះ Dong Hoi ឆ្ពោះត្រង់ទៅកាន់តំបន់ Vung Chua នៅលើកោះ Dao Yen របស់ខេត្រ Guang Binh ដែលជាកន្លែងចុងក្រោយបំផុត របស់សព លោក Vo Nguyen Giap ។</p>
<p style="text-align: center;"><a class="thickbox" title="" href="/FileManager/Commons/2013/10/13/vo5-13-10-2013--15-19-29.jpg"><img src="/FileManager/Articles/mce/2013/10/13/vo5-13-10-2013--15-19-29.jpg" alt="" /></a></p>
<p>នាំមុខក្បួនដង្ហែសពនេះ គឺរថយន្ដបើកផ្លូវ បន្ទាប់មក គឺកងនគរបាលចរាចរណ៍ ក្បួនរថយន្ដកងកម្លាំងសន្ដិសុខ។ ចំណែករថយន្ដដឹកសព គឺនៅកណ្ដាលក្បួន។ សាកសពរបស់លោក Vo nguyen Giap ត្រូវបានគេដាក់នៅលើរថយន្ដដឹកកាំភ្លើងធំ និងគ្របដណ្ដប់ពីលើ ដោយទង់ជាតិ។</p>
<p style="text-align: center;"><a class="thickbox" title="" href="/FileManager/Commons/2013/10/13/vo6-13-10-2013--15-19-57.jpg"><img src="/FileManager/Articles/mce/2013/10/13/vo6-13-10-2013--15-19-57.jpg" alt="" /></a></p>
<p>គេឃើញមានប្រជាជនរាប់សែននាក់ បាននាំគ្នាមកឈរនៅតាមសងខាងផ្លូវ ដើម្បីចូលរួមជូនដំណើរសព និងដើម្បីសម្ដែងការដឹងគុណ វីរបុរសជាតិ របស់ពួកគេ។ មនុស្សមួយចំនួន ក៏បានលើកដៃតាមរបៀបទាហាន ដើម្បីគោរព។ ក្រៅពីមនុស្សរាប់សែននាក់ ដែលឈរអមសងខាងផ្លូវ គេក៏ឃើញប្រជាជនមួយចំនួន ឡើងដើមឈើខ្ពស់ៗ ក្នុងបំណង បានឃើញទិដ្ឋភាពដ៏កម្រនេះ។</p>
<p style="text-align: center;"><a class="thickbox" title="" href="/FileManager/Commons/2013/10/13/vo1-13-10-2013--15-20-27.jpg"><img src="/FileManager/Articles/mce/2013/10/13/vo1-13-10-2013--15-20-27.jpg" alt="" /></a></p>
<p>ក្បួនដង្ហែសព ធ្វើដំណើរតាមផ្លូវជាតិ ឆ្ពោះត្រង់ទៅតំបន់ Vung Chua ដែលមានចម្ងាយពីព្រលានយន្ដហោះ Dong Hoi ប្រមាណ ៦០គីឡូម៉ែត្រ។</p>
<p style="text-align: center;"><a class="thickbox" title="" href="/FileManager/Commons/2013/10/13/vo2-13-10-2013--15-20-55.jpg"><img src="/FileManager/Articles/mce/2013/10/13/vo2-13-10-2013--15-20-55.jpg" alt="" /></a></p>
<p style="text-align: center;"><a class="thickbox" title="" href="/FileManager/Commons/2013/10/13/vo7-13-10-2013--15-21-18.jpg"><img src="/FileManager/Articles/mce/2013/10/13/vo7-13-10-2013--15-21-18.jpg" alt="" /></a></p>
<p>គួររំឭកថា មុននេះ យន្ដហោះដែលមានស្លាកលេខ VN103 ដែលបានដឹកសពលោក Vo Nguyen Giap បានចុះចតនៅព្រលានយន្ដហោះ Dong Hoi ខេត្រ Guang Binh នៅវេលាម៉ោង ១១ និង ៥០នាទី។ ក្រុមមន្ដ្រីដែលបានមកទទួលសព នៅព្រលានយន្ដហោះ មានដូចជា ប្រធានាធិបតី Truong Tan Sang (ប្រធានគណកម្មការបុណ្យសពជាតិ) , ឧបនាយករដ្ឋមន្ដ្រី Nguyen Xuan Phuc , រដ្ឋមន្ដ្រីការពារជាតិ ឧត្តមសេនីយ៍ Phung Quang Thanh រួមនឹងមន្ដ្រីកំពូលៗរបស់បក្សកុម្មុយនិស្ដវៀតណាម ផងដែរ។ល។</p>
<p style="text-align: right;"><br /><br />ប្រែសម្រួលដោយ ៖ តារា<br />ប្រភព ៖ VE<br /><br /></p>