<p><strong>អាម៉េរិក៖</strong> ជំនួបដ៏ស្វិតស្វាញមួយ នឹងកើតមានឡើងនាម៉ោង ០៧ និង០០នាទីព្រឹកស្អែកនេះ (ម៉ោងនៅកម្ពុជា) ដែលជាជួបគ្នា រវាងក្រុមអង់គ្លេសទាំង គឺក្រុម Man Utd ប៉ះនឹងក្រុម Liverpool វគ្គផ្តាច់ព្រ័ត្រ ដើម្បីប្រជែងយក ពានអន្តរជាតិ GICC ឆ្នាំ២០១៤ របស់អាម៉េរិក ។</p>
<p>ការជួបគ្នារវាងក្រុមដែលធ្វើបានល្អ នាពេលកន្លងមកមុនរដូវកាលឆ្នាំ ២០១៤-២០១៥ ចាប់ផ្តើមនៅលើទឹកដី សហរដ្ឋអាម៉េរិក ធ្វើឲ្យគ្រូបង្វឹក Liverpool កាន់តែវិលមុខខ្លាំង ខណៈដែលអត់មាន Luis Suarez ដែលបានលក់ទៅឲ្យក្លឹប FC Barcelona ហើយនោះ តែនៅមិនទាន់ ស្គាល់ពាក្យថាចាញ់ និងស្មើនោះទេ ពី៣ប្រកួតប្រចាំពូល B បើទោះបីជាបាន ចាញ់ក្រុម AS Roma ១-០ ពី១ប្រកួតមិត្តភាព ដំបូងក៏ដោយ ។</p>
<p>កាលដែលអត់មានខ្សែប្រយុទ្ធ ជនជាតិអ៊ុយរូហ្គាយ Luis Suarez នៅតំបន់ប្រយុទ្ធ របស់ក្រុមហង្សមួយនេះ ហាក់បីដូចជា មិនសូវមុតស្រួចប៉ុន្មាន ដែលនាទីទាំងនេះត្រូវបាន Raheem Sterling, Daniel Sturridge និង Rikie Lambert ជាអ្នកទទួលខុសត្រូវវិញ តែនៅតំបន់ប្រព័ន្ធការពារ ហាក់បីដូចមានភាពរឹងមាំ ដោយទើបតែរបូត ២គ្រាប់នៅឡើយទេ ។ ៣ប្រកួតឈ្នះរបស់ Liverpool បានប្រកួតឈ្នះក្រុម Olympiacos ១-០ ឈ្នះ Man City ៣-១ ដោយបាល់ប៉េណាល់ទី ក្រោយប្រកួតពេញ ម៉ោងមានលទ្ធផលស្មើ ២-២ និងចុងក្រោយបំបាក់ AC Milan ២-០ ។</p>
<p>យ៉ាងណាមិញបើក្រឡេកមើល Man Utd វិញរឹតតែមិនធម្មតាទៅទៀត ដោយស្ថិតក្រោមការដឹកនាំ ពីសំណាក់គ្រូបង្វឹកថ្មី ជនជាតិហូឡង់ Louis van Gaal មិនទាន់ចាញ់នៅឡើយ ៤ប្រកួតកន្លង មកថែមទាំងបានបំបាក់ ក្រុមម្ចាស់ផ្ទះ LA Galaxy ៧-០ ក្នុងជំនួបមិត្តភាពអន្តរជាតិ មុនពេលឈ្នះប្រកួត ជាប់គ្នាក្នុងពូល A ដោយបានស៊ី AS Roma ៣-២ ឈ្នះ Inter Milan ៥-៣ ដោយបាល់ប៉េណាល់ទី ក្រោយប្រកួតពេញម៉ោង ០-០ មុនលត់ក្រុមការពារ តំណែងជើងឯកស្តេចស Real Madrid របស់អេស្ប៉ាញ ៣-១ មុនឡើងទៅកាន់វគ្គផ្តាច់ព្រ័ត្រ ដោយជួប Liverpool ព្រឹកស្អែកនេះ ។</p>
<p>កីឡាករដែលធ្វើមិនបាន កាលស្ថិតក្រោមការដឹកនាំ របស់លោក David Moyes ចាប់ផ្តើមធ្វើបានល្អ ឡើងវិញហើយមាន ដូចជា ខ្សែបម្រើ Ashley Young, Jevier Hernandez និងខ្សែប្រយុទ្ធជើងចាស់ Wayne Rooney ជាដើម តែក្នុងនោះ ដែរសមាជិកចំណូលថ្មី Ander Herrera និង Luke Shaw ក៏បានបញ្ចេញថ្មី ជើងគួរឲ្យចាប់អារម្មណ៍ផងដែរ ៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/July/id-140/hour-849.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/July/id-140/hour-850.jpg" alt="" width="600" /></p>
<p style="text-align: right;"><a href="http://www.lookingtoday.com/index.php/technology-business-news/32932--gicc-man-utd-liverpool-.html" target="_blank">ផ្តល់សិទ្ធដោយ ៖ ដើមអម្ពិល</a></p>