<p><strong>ព្រះវិហារ៖</strong> សិស្សស្រីវ័យ ១៦ឆ្នាំ ស្រស់ផូរផង់ បានស្លាប់ក្នុងភ្នក់ភ្លើងយ៉ាងអាណោចអាធម ដោយសារភ្លើងទៀន ដែលអុជបំភ្លឺប្រឹងរៀនត្រៀមប្រឡង បានឆេះរាលដាលដល់រូបនាងកំពុង លង់លក់ ក្នុងដំណេកកណ្តាលយប់ជ្រៅ។ គ្រោះអគ្គិភ័យដ៏កំណាចឥតក្តីមេត្តា បានកើតឡើងកាល ពីថ្ងៃទី២១ ខែមករា ឆ្នាំ២០១៤ ស្ថិតនៅក្នុងភូមិស្រឡៅទូង ឃុំពោធិ៍ ស្រុកត្បែងមានជ័យ ខេត្ត ព្រះវិហារ។</p>
<p>លោកអនុសេនីយ៍ទោ សុខ ធី មេប៉ុស្តិ៍ឃុំពោធិ៍ បានប្រាប់អ្នកយកព័ត៌មានមជ្ឍមណ្ឌលដើមអម្ពិល ថា យុវតី ណែម រចនា អាយុ ១៦ឆ្នាំ រៀនថ្នាក់ទី៨ នៃអនុវិទ្យាល័យពោធិ៍ ត្រូវបានស្លាប់ក្នុងភ្នក់ភ្លើង ដោយមិនមានអ្នកណាជួយទាន់ នោះឡើយទាំងកណ្តាលយប់ជ្រៅ គ្រារូបនាងលង់លក់ក្នុង ដំណេក។</p>
<p>បើតាមលោក សុខ ធី នៅយប់កើតហេតុយុវតីរងគ្រោះ រចនា បានអុជទៀនប្រឹងរៀន ដើម្បីត្រៀម ប្រឡង ដែលនឹង ឈានមកដល់នៅប៉ុន្មានថ្ងៃខាងមុខទៀតនេះ។ លុះរៀនដល់យប់ជ្រៅ ទៅទំនង ងងុយដេក ក៏ដេកលក់ទៅស្រាប់តែ ភ្លើងទៀន បានឆេះរាលដាលដល់មុង និងភួយបង្កជាគ្រោះ អគ្គិភ័យ ឆេះស្លាប់ទាំងយុវតី រចនា តែម្តង។</p>
<p>យុវតី ណែម រចនា មានម្តាយឈ្មោះ អ៊ុន សុផាន និង ឪពុកឈ្មោះ ប៊ុន សារ៉ែម។</p>
<p>សពរបស់យុវតីរងគ្រោះត្រូវបានគ្រួសារដង្ហែយកទៅបូជានៅឯវត្ត ដោយមានការចូលរួមដង្ហែ ក្រោមសម្រែកទុក្ខ សោកស្តាយស្រណោះជាពន់ពេកពីក្រុមគ្រួសារ សាច់ញាតិ និងមិត្តភក្តិសិស្សា នុសិស្ស រួមទាំងលោកគ្រូអ្នកគ្រូ ព្រមទាំងប្រជាពលរដ្ឋភូមិផងរបងជាមួយ៕</p>
<p style="text-align: center;"><img src="http://image.dap-news.com:81/dap-news/dap-images/2014/January/id-009/ST-053.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/January/id-009/ST-054.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/January/id-009/ST-055.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2014/January/id-009/ST-056.jpg" alt="" width="550" /></p>
<p style="text-align: right;">ផ្តល់សិទ្ធិដោយ៖ <a href="http://www.dap-news.com/2011-06-14-02-39-55/79667-2014-01-23-03-40-52.html"><span style="color: #0000ff;">ដើមអំពិល</span></a></p>