<p><span style="color: #000000;"><strong>កំពត៖</strong> លោកវរៈសេនីយ៍ឯក ទិត្យ គឹមសេង មេបញ្ជាការរង តំបន់ប្រតិបត្តិការ សឹករងខេត្តកំពត ត្រូវបានសាលា ដំបូងខេត្ត សម្រេចឃុំខ្លួន ដាក់ពន្ធនាគារហើយ នាវេលាម៉ោង៤ និង៣០នាទី រសៀល ថ្ងៃទី១១ ខែធ្នូ ឆ្នាំ២០១៤នេះ ពាក់ព័ន្ធ ករណីលាក់ទុក ឈើខុសច្បាប់។</span></p>
<div>
<p><span style="color: #000000;">លោកខាន់ សុផល ព្រះរាជឣាជ្ញារង ឣមសាលាដំបូងខេត្តកំពត បានប្រាប់ឲ្យមជ្ឈមណ្ឌលព័ត៌មាន ដើមឣម្ពិលដឹងថា ករណីលោកវរៈសេនីយ៍ឯក ទិត្យ គឹមសេង ត្រូវបានចៅក្រម នៃសាលាដំបូងខេត្ត ធ្វើការសម្រេចឃុំខ្លួនដាក់ពន្ធនាគារ ដោយចោទពីបទលាក់ទុកឈើខុសច្បាប់ តាមមាត្រា៥៣៣ នៃច្បាប់ក្រមព្រហ្មទណ្ឌ។</span></p>
<p><span style="color: #000000;">គួររំលឹកថា លោកស័ក្តិ៥ទិត្យ គឹមសេង ដែលគេស្គាល់ថា មានតួនាទីជាមេបញ្ជាការរង យោធាខេត្តកំពត ត្រូវបាន កម្លាំងសមត្ថកិច្ច ចម្រុះដឹកនាំដោយព្រះរាជអាជ្ញារង ចុះទៅធ្វើការនាំខ្លួន រួមទាំងធ្វើការដកហូតឈើលេខ១ ជាច្រើន ទៀត ខណៈដែលមានបណ្តឹងចោទប្រកាន់ថា លោកមេបញ្ជាការរងរូបនេះ យកតួនាទីរបស់ខ្លួន ជាយោធា ទៅចាប់បទល្មើសព្រៃឈើ តែក្រោយ ចាប់បានមិនបានប្រគល់ឲ្យទៅសមត្ថកិច្ចជំនាញ នោះឡើយ គឺបែរជាយកទៅ លាក់ទុក នៅក្នុងផ្ទះរបស់ខ្លួនមានបំណងស៊ីដាច់ ។</span></p>
<p><span style="color: #000000;">ករណីសមត្ថកិច្ចចម្រុះដឹកនាំ ដោយព្រះរាជអាជ្ញារង គឺលោក ខាន់ សុផល ដឹកនាំកម្លាំងចុះទៅចាប់ខ្លួនលោក ទិត្យ គឹម សេងខាងលើនេះ បានប្រព្រឹត្តទៅ នៅវេលាម៉ោង ១២ និង ៣០នាទីថ្ងៃត្រង់ទី១០ ខែធ្នូ ឆ្នាំ២០១៤ ស្ថិតនៅក្នុងផ្ទះដីឡូត៍ របស់លោក ដែលមានទីតាំងនៅក្នុងភូមិទ្វីរខាងជើង សង្កាត់អណ្តូងខ្មែរ ក្រុងកំពត ខេត្ត កំពត ។</span></p>
<p><span style="color: #000000;">ក្រៅពីឃាត់ខ្លួនយកទៅ សាកសួរសមត្ថកិច្ចចម្រុះ ក៏បានធ្វើការរឹបអូសឈើប្រភេទលេខ១ ចំនួន ២៦សន្លឹក ស្មើ នឹង ០,៦២៨ម៉ែត្រគូបផងដែរ ដែលរួមមានឈើដួងចែម និងឈើថ្កូវ ។ ឈើខាងលើនេះត្រូវបានលោកទិត្យ គឹមសេង ក្នុងនាមជាមេបញ្ជាការ យោធាខេត្តបានទៅចាប់ឈើពីឈ្មួញ និងប្រជាពលរដ្ឋ ដែលចូលព្រៃកាប់អារដឹកចេញ មកយកមកលក់នៅ ទីរួមខេត្ត នៅត្រង់ចំណុចទំនប់វារីអគ្គិសនី កំចាយទឹកឈូរកាលពី វេលាម៉ោង១០ព្រឹកថ្ងៃទី៣០ ខែវិច្ឆិកា ឆ្នាំ២០១៤កន្លងទៅនេះ ។</span></p>
<p><span style="color: #000000;">ក្នុងនោះក្រោយចាប់បានឈើហើយលោក ទិត្យ គឹមសេង មិនបានធ្វើរបាយការណ៍យកទៅទុកនៅអង្គភាព ឬ ប្រគល់ ទៅឲ្យរដ្ឋបាលព្រៃឈើជំនាញ ដើម្បីចាត់ការ ទៅតាមនីតិវិធីច្បាប់នោះឡើយ បែរជាយកឈើទាំងអស់ នោះ ទៅទុកក្នុងភូមិគ្រឹះ របស់លោកទៅវិញ ដែលធ្វើឲ្យខុសទៅនឹងនីតិវិធីច្បាប់ ដូចនេះ ហើយនៅពេលបែក ធ្លាយព័ត៌មាន ខាងលើដឹងទៅដល់ព្រះរាជអាជ្ញាភ្លាម លោកព្រះរាជអាជ្ញា ឯក ឆេងហួត ក៏បានបញ្ជាឲ្យកម្លាំង សមត្ថកិច្ចដឹកនាំ ដោយព្រះរាជអាជ្ញា រង ខាន់ សុផល ចុះទៅចាប់ និងឃាត់ខ្លួនយកទៅសាកសួរនៅឯកងរាជឣាវុធហត្ថខេត្ត កាលពីថ្ងៃម្សិលមិញតែម្តងទៅ៕</span></p>
<p><span style="color: #000000;"><a class="thickbox" title="" href="/FileManager/Commons/2014/12/12/12-12-2014-8-17-19-am-12-12-2014--08-22-05.png"><img src="/FileManager/Articles/mce/2014/12/12/12-12-2014-8-17-19-am-12-12-2014--08-22-05.png" alt="" /></a></span></p>
<p><a class="thickbox" title="" href="/FileManager/Commons/2014/12/12/12-12-2014-8-17-34-am-12-12-2014--08-22-15.png"><img src="/FileManager/Articles/mce/2014/12/12/12-12-2014-8-17-34-am-12-12-2014--08-22-15.png" alt="" /></a></p>
<p><a class="thickbox" title="" href="/FileManager/Commons/2014/12/12/12-12-2014-8-17-50-am-12-12-2014--08-22-24.png"><img src="/FileManager/Articles/mce/2014/12/12/12-12-2014-8-17-50-am-12-12-2014--08-22-24.png" alt="" /></a></p>
<p><a class="thickbox" title="" href="/FileManager/Commons/2014/12/12/12-12-2014-8-18-03-am-12-12-2014--08-22-36.png"><img src="/FileManager/Articles/mce/2014/12/12/12-12-2014-8-18-03-am-12-12-2014--08-22-36.png" alt="" /></a><span style="color: #000000;"><br /></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>
</div>