<p><span style="color: #000000;"><strong>ភ្នំពេញ៖</strong> នាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋានជនអន្តោប្រវេសន៍ក្រសួងមហាផ្ទៃ បានថ្លែងថា លំហូរចូលរបស់ជនបរទេសមករស់នៅក្នុងប្រទេសបានកើតឡើងគួរឲ្យគត់សម្គាល់ ដែលក្នុងនោះមាន ជនជាតិវៀតណាមរហូតដល់ទៅ ៩៥ភាគរយ។ របាយការណ៍ជំរឿនក្នុងឆ្នាំ២០១៤ បានបង្ហាញថា ជនជាតិវៀតណាម ដែលកំពុងរស់នៅក្នុងប្រទេសកម្ពុជា មានរហូតដល់ទៅ ១៦ម៉ឺននាក់ ចំនួននេះ គិតត្រឹមអត្រា ៧០ភាគរយប៉ុណ្ណោះ។</span></p>
<p><span style="color: #000000;">ក្នុងកិច្ចប្រជុំផ្សព្វផ្សាយផែនការអនុវត្តការគ្រប់គ្រងទៅលើជនអន្តោប្រវេសន៍ ដែលធ្វើឡើងនៅក្រសួងមហាផ្ទៃនា ព្រឹកថ្ងៃទី០១ ខែកក្កដា ឆ្នាំ២០១៥នេះ នាយឧត្តមសេនីយ៍ សុខ ផល បានឲ្យដឹងថា ជំរឿនឆ្នាំ២០០២ មានជន ជាតិវៀតណាមរស់នៅក្នុងប្រទេសកម្ពុជាចំនួន ៧ម៉ឺននាក់ ឆ្នាំ២០១០ មានចំនួន ១០ម៉ឺននាក់ ហើយរហូតដល់ ឆ្នាំ២០១៤នេះ បានកើនរហូតដល់ ១៦ម៉ឺននាក់។ នាយឧត្តមសេនីយ៍ បានបញ្ជាក់បន្តថា ចំនួននេះ គឺគិតក្នុងអត្រា ៧០ភាគរយប៉ុណ្ណោះ បើគិតក្នុងអត្រា ១០០ភាគរយ អាចមានចំនួនច្រើនជាងនេះ។</span></p>
<p><span style="color: #000000;">លោក សុខ ផល ក៏បានឲ្យដឹងផងដែរ ពីប្រតិបត្តិការគ្រប់គ្រង និងស្វែងរកជនអន្តោប្រវេសន៍ខុសច្បាប់នៅកម្ពុជា ដែលជាលទ្ធផលនៅឆ្នាំ២០១៤ រកឃើញជនអន្តោប្រវេសន៍គ្មានលិខិតស្នាមចំនួន ១.៨០០នាក់ ក្នុងនោះជនជាតិវៀតណាម ជាង ១.៥០០នាក់ ហើយពួកគេក៏ត្រូវបានបណ្តេញចេញពីប្រទេសកម្ពុជាផងដែរ។ សម្រាប់៦ខែ ឆ្នាំ២០១៥នេះ បានរកឃើញជនអន្តោប្រវេសន៍ខុសច្បាប់ ១.២០០នាក់ ក្នុងនោះ ៩៨ភាគរយ ជាជនជាតិវៀតណាម ហើយពួកគេក៏ត្រូវបានបណ្តេញពីកម្ពុជាដូចគ្នា។</span></p>
<p><span style="color: #000000;">អគ្គនាយក នៃអគ្គនាយកដ្ឋានអន្តោប្រវេសន៍រូបនេះ បានទទួលស្គាល់ថា ជនជាតិវៀតណាម បានហូរចូលតាមប៉ុស្តិ៍ព្រំដែន ប្រមាណ ២០-៣០ភាគរយ ក្រៅពីនោះ ហូរចូលតាមច្រករបៀងផ្សេង។</span></p>
<p><span style="color: #000000;">លោក សុខ ផល បានបង្ហើបឲ្យដឹងថា នៅក្នុងប៉ុន្មានថ្ងៃខាងមុខកម្លាំងអន្តោប្រវេសន៍របស់លោក នឹងចុះប្រតិបត្តិ ការធ្វើជំរឿនស្វែងរកជន អន្តោប្រវេសន៍នៅទូទាំងប្រទេសកម្ពុជា។ លោក ក៏បានស្នើឲ្យអភិបាលខេត្ត កម្លាំងសមត្ថកិច្ចគ្រប់រាជធានី-ខេត្ត ជួយសហការ ដើម្បីស្វែងរក និងគ្រប់គ្រងទៅលើជនអន្តោប្រវេសន៍នេះផងដែរ៕</span></p>
<p><span style="color: #000000;"><a class="thickbox" title="" href="/FileManager/Commons/2015/7/1/7-1-2015-10-41-32-am-01-07-2015--10-47-18.png"><span style="color: #000000;"><img src="/FileManager/Articles/mce/2015/7/1/7-1-2015-10-41-32-am-01-07-2015--10-47-18.png" alt="" /></span></a></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>