<div class="ja-content-main">
<div class="article-content">
<p><strong>ភ្នំពេញ៖</strong> ចៅក្រមសាលាដំបូងរាជធានីភ្នំពេញ នៅព្រឹកថ្ងៃអង្គារ ទី២៧ ខែឧសភា បានបើកសវនាការជំនុំជម្រះ លើ បុរសជាប់ចោទប្រើអំពើហិង្សា ដោយច្របាច់-ក និងយកកាំបិតចុងស្រួចអារ-ក ភរិយា ព្រោះភ្លើងប្រច័ណ្ឌ និងខឹង មិនព្រមរួមភេទជាមួយខ្លួន។</p>
<p>អំពើហិង្សាច្របាច់ និងយកកាំបិតអារ-ក ភរិយា តែមិនបានសម្រេចពីសំណាក់ស្វាមីចិត្តកំណាចនេះ បានកើតឡើង កាលពីខែធ្នូ ឆ្នាំ២០១៣ នៅក្នុងផ្ទះជួលមួយកន្លែង ស្ថិតក្នុងភូមិទួលសង្កែ សង្កាត់ទួលសង្កែ ខណ្ឌឬស្សីកែវ។</p>
<p>លោក អ៊ុំ ឋាវរៈ ចៅក្រមជំនុំជម្រះ នៃសាលាដំបូងរាជធានីភ្នំពេញ បានឲ្យដឹងថា បុរសជាប់ចោទខាងលើ មាន ឈ្មោះ សុខ សុវណ្ណារុន ភេទប្រុស អាយុ ៤៤ឆ្នាំ មានមុខមិនពិតប្រាកដ។ ចំណែកឯភរិយាជាអ្នករងគ្រោះ និងជា ដើមបណ្តឹងនោះ មានឈ្មោះ ឈុន សុភាព អាយុ ៣៣ឆ្នាំ មានកូន ៤នាក់ ជាមួយប្តីមុន។</p>
<p>បើតាមលោក អ៊ុំ ឋាវរៈ ជនជាប់ចោទ សុខ សុវណ្ណារុន ត្រូវបានចាប់ខ្លួន កាលពីថ្ងៃទី១៨ ខែធ្នូ ឆ្នាំ២០១៣ តាម ពាក្យបណ្តឹងរបស់ស្រ្តីជាភរិយា។</p>
<p>អំឡុងពេលសវនាការជនជាប់ចោទ សុខ សុវណ្ណារុន បានសារភាពពីកំហុសរបស់ខ្លួនទាំងអស់។ ប៉ុន្តែ លោក សុខ សុវណ្ណារុន បានអាះអាងថា មូលហេតុដែលរូបលោកគំរាមអារ-កសម្លាប់ប្រពន្ធនោះ ដោយសារតែមានកម្រោល ចូលខ្លួន និងដោយសារភ្លើងប្រច័ណ្ឌ ខឹងភរិយារបស់លោកសុំចែកផ្លូវគ្នា និងមិនឲ្យរួមសង្វាសអស់រយៈពេលជា ច្រើនខែ។</p>
<p>សាលក្រម នៃរឿងក្តីនេះ នឹងត្រូវប្រកាសនៅថ្ងៃទី៤ ខែមិថុនា ឆ្នាំ២០១៤ ខាងមុខនេះ៕</p>
<p><img src="http://image.dap-news.com:81/dap-news/dap-images/2014/May/id-009/ST-136.jpg" alt="" width="550" /></p>
<p style="text-align: right;"><br />ផ្តល់សិទ្ធិដោយ៖ ដើមអម្ពិល</p>
<div></div>
</div>
</div>