<p><strong>ភ្នំពេញៈ</strong> តារាកំប្លែងល្បីឈ្មោះ លោក ជួង ជី ហៅ នាយកុយ នៅព្រឹកនេះ បានរៀបចំពិធី បុណ្យឧទ្ទិសកុសល ជូនដល់វិញ្ញាណក្ខន្ធបារមី លោក យាយម៉ៅ និងដល់កូនប្រុស របស់លោក ដែលបានស្លាប់ នៅក្នុងគ្រោះថ្នាក់ ចរាចរណ៍ និងបារមីវត្ថុស័ក្តិសិទ្ធិ នៅជើងភ្នំពេជ្រនិល ដើម្បីសុំសេចក្តីសុខ មុខឱកាសបុណ្យ ចូលឆ្នាំខ្មែរ ។</p>
<p>ជួបជាមួយ LookingTODAY តាមទូរស័ព្ទ នៅថ្ងៃទី០៧ ខែមេសា ឆ្នាំ២០១៤ នេះ តារាកំប្លែងចាស់វស្សា នាយ កុយ បានប្រាប់ឲ្យដឹងថា នៅថ្ងៃនេះ លោក និងក្រុមគ្រួសារ បានមូលមតិគ្នារៀប ចំពិធីបុណ្យមួយ ដែលមានអ្នកចូលរួម ពីទីជិតឆ្ងាយ ប្រមាណជិត១ពាន់នាក់ នៅភ្នំពេជ្រនិល ។ ពិធីបុណ្យនេះ លោកចាប់ផ្តើមប្រារព្ធតាំងពីព្រឹក រហូតដល់ម៉ោង១២ យប់រំលងអធ្រាត្រ នៅក្នុងនោះពេលរាត្រី លោកក៏មានការសម្តែង កំប្លែងផងដែរ។</p>
<p>នាយ កុយ បានប្រាប់ឲ្យដឹងថា “ ខ្ញុំបានប្រារព្ធពិធីបុណ្យនេះ ជារៀងរាល់ឆ្នាំហើយសម្រាប់ មូលហេតុក្នុងការធ្វើបុណ្យនេះ គឺមិនមានអ្វីច្រើនទេ ពោលគឺដោយសារតែខ្ញុំ និងគ្រួសារគិតថា នៅទីកន្លែងនេះ ជាកន្លែងដែលមានបារមីស័ក្តិសិទ្ធ ផ្តល់នូវសេចក្តីសុខសប្បាយ ដល់កូនចៅ ។ ម្យ៉ាងទៀតក្រៅពី ការឧទ្ទិសបុណ្យកុសលជូន លោកយាយ ម៉ៅ ខ្ញុំក៏មានការធ្វើបុណ្យ ជូនដល់អ្នកទទួលមរណភាព នៅតាមដងផ្លូវនេះ រួមជាមួយ កូនប្រុសខ្ញុំផង ” ។</p>
<p>លោកបានប្រាប់ទៀតថា នៅក្នុងពិធីបុណ្យ តាមប្រពៃណីខ្មែរមួយនេះ លោកនិងគ្រួសារ បានចំណាយលុយពី៤-៥ពាន់ដុល្លារ ព្រោះថា ក្រៅពីការរៀបចំ បុណ្យលោក ក៏មានការចែក អំណោយ ទៅដល់បងប្អូនប្រជាពលរដ្ឋ ដែលមានជីវភាពខ្វះខាត ។ នេះគឺជាសណ្តានចិត្ត របស់លោក និងគ្រួសារ ។ សម្រាប់អ្នក ចូលរួមផ្តើមបុណ្យនោះ គឺលោកមិនបាន ដឹងច្បាស់ទេ ថាមានតារាឬ ក៏ប្រជាពលរដ្ឋណាខ្លះទេ តែមុនថ្ងៃបុណ្យលោកធ្លាប់ប្រកាសជា សាធារណៈថា ប្រសិនបើមានសប្បុរសជន ណាចង់ចូលរួមធ្វើបុណ្យ គឺអាចមកជួបជុំ នៅកន្លែងយាយម៉ៅបាន ៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/April/id-099/v_0188.jpg" alt="" width="600" /></p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/April/id-099/v_0189.jpg" alt="" width="600" /></p>
<p style="text-align: right;"><a href="http://lookingtoday.com/index.php/entertainment-general-news/29263-2014-04-07-08-23-52.html" target="_blank">ផ្តល់សិទ្ធដោយ ៖ ដើមអម្ពិល</a></p>