<div class="article-content">
<p><strong>ភ្នំពេញ៖</strong> ប្រធានសមាគមគ្រូបង្រៀនកម្ពុជាឯករាជ្យ និងប្រធានសហភាពសហជីពកម្ពុជា លោក រ៉ុង ឈុន បានប្រកាសថា លោកនឹងដឹកនាំកម្មករ-កម្មការិនី គ្រូបង្រៀន និងប្រជាពលរដ្ឋ ១ម៉ឺន នាក់ នឹងធ្វើបាតុកម្មនៅថ្ងៃទី២៦ ខែមករា ឆ្នាំ២០១៤ខាងមុខនេះ ដើម្បីទាមទារលក្ខខណ្ឌ ៣ចំណុច។</p>
<p>លោក រ៉ុង ឈុន បានមានប្រសាសន៍ប្រាប់ មជ្ឈមណ្ឌលព័ត៌មានដើមអម្ពិល នៅព្រឹកថ្ងៃទី២២ ខែមករា ថា លោកបានដាក់លិខិតជូនដំណឹង ទៅសាលារាជធានីភ្នំពេញរួចហើយ កាលពីប៉ុន្មាន ថ្ងៃមុន ដើម្បីធ្វើបាតុកម្ម ប៉ុន្តែរហូមកដល់ថ្ងៃទី២២ ខែមករានេះ មិនទាន់មានការឆ្លើយតបនៅ ឡើយទេ។</p>
<p>លោកបន្តថា “ខ្ញុំនឹងធ្វើបាតុកម្មនៅទីលានប្រជាធិបតេយ្យ ដោយមានអ្នកចូលរួម ប្រមាណជា ១ម៉ឺននាក់ ក្នុងគោលបំណង ៣យ៉ាង គឺទី១-ទាមទារឲ្យមានដោះលែង លោក វន់ ពៅ និងកម្មករ ២២នាក់ផ្សេងទៀត , ទី២- ទាមទារប្រាក់ឈ្នួលកម្មករ ១៦០ដុល្លារ ក្នុងមួយខែ និងទី៣-ស្នើ ឲ្យ វែកមុខឃាតកដែលបាញ់សម្លាប់កម្មករ នៅលើកំណាត់ផ្លូវវ៉េងស្រេង នាពេលកន្លងមក”។</p>
<p>មជ្ឈមណ្ឌលព័ត៌មានដើមអម្ពិល បានទាក់ទងសុំការអធិប្បាយពី លោក ឡុង ឌីម៉ង់ អ្នកនាំពាក្យ សាលារាជធានីភ្នំពេញ ប៉ុន្តែលោក មិនលើកទូរស័ព្ទ។</p>
<p>សូមបញ្ជាក់ថា សាលារាជធានីភ្នំពេញ បានហាមឃាត់មិនឲ្យមានការជួបជុំ ឬការប្រមូលផ្តុំនោះទេ ដោយបានប៉ះពាល់ដល់សន្តិសុខ សណ្តាប់ធ្នាប់សាធារណៈ ព្រោះក្នុងអំឡុងពេលនេះ ស្ថានភាព មិនទាន់មានលក្ខណៈល្អប្រសើរនៅឡើយ ហើយខ្លាចមានជនឱកាសនិយមមួយចំនួន កេង ចំណេញផ្នែកនយោបាយ៕</p>
<p style="text-align: right;">ផ្តល់សិទ្ធិដោយ៖ <a href="http://www.dap-news.com/2011-06-14-02-39-55/79612-2014-01-22-05-56-26.html"><span style="color: #0000ff;">ដើមអំពិល</span></a></p>
</div>