<div class="article-content">
<p><strong>ភ្នំពេញ ៖</strong> ក្រសួងសុខាភិបាល នៃប្រទេសកម្ពុជា នៅថ្ងៃទី២៤ ខែតុលា ឆ្នាំ២០១៣ បានធ្វើការ ផ្សព្វផ្សាយពីវិធានការ កាត់បន្ថយការរីករាលដាល នៃជំងឺភ្នែកក្រហម ទៅដល់ប្រជាពលរដ្ឋ នៅ ទូទាំងប្រទេស ដើម្បីឲ្យពួកគេ ចេះមានអនាម័យ ជៀសវាងកើតជំងឺប្រភេទនេះ។</p>
<p>សេចក្តីប្រកាសព័ត៌មានរួម រវាងក្រសួងសុខាភិបាលកម្ពុជា និងអង្គការសុខភាពពិភពលោក បាន ឲ្យដឹងថា នៅតាមមន្ទីរពេទ្យ មណ្ឌលសុខភាព និងគ្លីនិកនានា នៅកម្ពុជា សង្កេតឃើញថា មានការ កើនឡើង នូវចំនួនករណីជំងឺភ្នែកក្រហម។</p>
<p>ជំងឺភ្នែកក្រហម បណ្តាលមកពីមេរោគបាក់តេរី ឬវីរុស ដែលមានការចម្លងខ្ពស់ និងអាចឆ្លង រាលដាលយ៉ាងងាយ ពីមនុស្សម្នាក់ទៅមនុស្សម្នាក់ទៀត ប៉ុន្តែវាមិនបណ្តោយឲ្យមាន គ្រោះថ្នាក់ សុខភាពធ្ងន់ធ្ងរនោះទេ។ ហានិភ័យនៃការចម្លង ពីមនុស្សម្នាក់ទៅមនុស្សម្នាក់ទៀត ត្រូវបាន កាត់បន្ថយជាអតិបរមា ដោយអនុវត្តជំហាន អនាម័យសាមញ្ញ។</p>
<p>លោក ម៉ម ប៊ុនហេង រដ្ឋមន្រ្តីក្រសួងសុខាភិបាល មានប្រសាសន៍ នៅក្នុងសេចក្តីប្រកាសថា “ការ បង្កើនដ៏មានប្រសិទ្ធិភាព គឺអនាម័យ ជាពិសេសការលាងដៃ ជាមួយសាប៊ូនិងទឹកក្តៅអ៊ុនៗ និងមិន ជូតភ្នែកដោយដៃ ដែលមានប្រលាក់មេរោគ”។</p>
<p>ដើម្បីកាត់បន្ថយ ការរាលដាលនៃជំងឺនេះ ត្រូវអនុវត្តនូវចំណុចដូចខាងក្រោម<br />-ជានិច្ចកាលត្រូវលាងដៃ ជាមួយសាប៊ូនិងទឹកក្តៅអ៊ុនៗ<br />-ជៀសវាប៉ះឬត្រដុសភ្នែក<br />-លាងសំអាតកាកសំណល់ ដែលចេញពីភ្នែក ឲ្យបានច្រើនដងក្នុងមួយថ្ងៃ ដំបូងត្រូវលាងសំអាតដៃ បន្ទាប់មកទៀត ប្រើក្រណាត់ ឬកន្សែងស្អាត ឬដុំសំឡី សំអាតតំបន់ជុំវិញភ្នែក<br />-បោះចោលដុំសំឡី បន្ទាប់ពីប្រើ បើប្រើក្រណាត់ ឬកន្លែងត្រូវបោកគក់សំអាតជាមួយទឹកក្តៅ និងសាប៊ូ<br />-លាងសំអាតដៃបន្ទាប់ពីបន្តក់ថ្នាំភ្នែកទឹក ឬប៉ូម៉ាត<br />-ជៀសវាងប្រើកន្សែង ឬក្រមា ភួយនិងខ្នើយរួមគ្នា<br />-បោកគក់ស្រោមខ្នើយ ស្រោមពូក ក្រណាត់ និងកន្សែងក្នុងទឹកក្តៅនិងសាប៊ូ។ ត្រូវលាងសំអាតដៃ បន្ទាប់ពីកាន់សម្ភារទាំងនេះ។<br />-មិនត្រូវចែករំលែក គ្រឿតុបតែងមុខ ដូចជា ប្រដាប់គូសចិញ្ចើម ប្រដាប់គូសរង្វង់ភ្នែក ម្សៅលាប មុខ ច្រាសដុសធ្មេញ វ៉ែនតា<br />-ផ្អាកហែលទឹកក្នុងអាងហែលទឹក៕</p>
<p style="text-align: center;"><img title=" " src="http://image.dap-news.com:81/dap-news/dap-images/2013/October/id-014/that-0357.jpg" alt="" width="500" /></p>
<p style="text-align: right;">ដោយ៖ ដើមអំពិល<br />ផ្តល់សិទ្ធិដោយ៖ ដើមអំពិល</p>
</div>