<p><span style="color: #000000;"><strong>(ហ្សាការតា)៖</strong> អាជ្ញាធរឥណ្ឌូណេស៊ី បានចាត់វិធានការយ៉ាងបន្ទាន់បំផុត ដើម្បីឆ្លើយតបទៅនឹងការឆ្លង រីករាលដាល នៃវីរុស Zika នៅប្រទេសសិង្ហបុរី ដោយក្នុងនោះស្ត្រីមានផ្ទៃពោះដែលមានបំណង ធ្វើដំណើរទៅសិង្ហបុរី ត្រូវតែបង្កើតការប្រុងប្រយ័ត្នខ្ពស់ ចំពោះសត្វមូស និងស្ត្រីមានផ្ទៃពោះ ដែលត្រឡប់ពីសិង្ហបុរីវិញ ត្រូវតែទទួលការត្រួតពិនិត្យ ដោយម៉ាស៊ីនស្គែន នៅគ្របច្រកចូលទាំងអស់ ជាពិសេសព្រលានយន្តហោះ។ នេះបើតាមសារព័ត៌មានស៊ិនហួរ ចេញផ្សាយនៅមុននេះបន្តិច នាព្រឹកថ្ងៃសុក្រ ទី០២ ខែកញ្ញា ឆ្នាំ២០១៦។</span></p>
<p><span style="color: #000000;">ការចាត់វិធានការជាបន្ទាន់បំផុត ពីសំណាក់រដ្ឋាភិបាលឥណ្ឌូណេស៊ីនេះ បានកើតឡើងបន្ទាប់ពីប្រទេសសិង្ហបុរី ដែលប្រភេទជិតខាងបំផុត របស់ខ្លួនបានប្រកាសថា នៅថ្ងៃព្រហស្បតិ៍ អ្នកឆ្លងវីរុស Zika ៣១ករណីទៀត ត្រូវបានក្រុមគ្រូពេទ្យរកឃើញ ដែលជាហេតុនាំឲ្យចំនួនអ្នកឆ្លងវីរុស ដែលមានដើមកំណើតមកពីសត្វមូស និង កំពុងវាយប្រហារខ្លាំង នៅអាមេរិកឡាទីននេះ កើនឡើងដល់ ១៥១នាក់ហើយនៅប្រទេសសិង្ហបុរី ក្នុងចំណោម នោះក៏មានជនជាតិចិន និងឥណ្ឌា ជាច្រើននាក់ផងដែរ។</span></p>
<p><span style="color: #000000;">គួរបញ្ជាក់ថា ម៉ាស៊ីនស្គែន ត្រូវបានបំពាក់នៅតាមច្រកចូលនៅកំពង់ផែ និងព្រលានយន្តហោះរបស់ ឥណ្ឌូណេស៊ី ដែលគេដឹងថានឹងមានអ្នកដំណើរ មកពីពីប្រទេសសិង្ហបុរីទាំងអស់។ វីរុស Zika មានឥទ្ធិពល អាក្រក់ទៅលើស្ត្រីមានផ្ទៃពោះ ហើយប្រសិនបើស្ត្រីមានផ្ទៃពោះ ឆ្លងជំងឺប្រភេទនេះ វានឹងធ្វើឲ្យទារកកើតមក មានក្បាលតូចខុសធម្មតា ហើយផ្នែកប្រាជ្ញាស្មារតី ក៏នឹងអន់ខ្សោយ ទៅតាមនោះដែរ៕</span></p>
<p><span style="color: #000000;"><a class="thickbox" title="" href="/FileManager/Commons/2016/9/3/03b-03-09-2016--09-26-09.jpg"><span style="color: #000000;"><img src="/FileManager/Articles/mce/2016/9/3/03b-03-09-2016--09-26-09.jpg" alt="" /></span></a></span></p>
<p style="text-align: right;"><span style="color: #000000;">ប្រភព ៖ ស៊ិនហួរ</span></p>