<p><span style="color: #000000;"><strong>(ភ្នំពេញ)៖</strong> នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់អង្គភាព Fresh News ឱ្យដឹងថា ក្រសួងមហាផ្ទៃ នឹងចាត់វិធានទៅលើមន្រ្តីណា ដែលយកទ្រព្យសម្បត្តិរបស់អង្គភាព ទៅលក់បន្តឲ្យបុគ្គលផ្សេង ក្នុងនោះរាប់ទាំងការយករថយន្តពាក់ស្លាកលេខនគរបាលផងដែរ។</span></p>
<p><span style="color: #000000;">ការអះអាងបែបនេះរបស់អ្នកនាំពាក្យក្រសួងមហាផ្ទៃ បានធ្វើឡើងបន្ទាប់ពីមានករណីបែកធ្លាយ មន្រ្តីផ្កាយ២ នៅក្រសួងមហាផ្ទៃម្នាក់ឈ្មោះ រស់ ឧស្សហ៍ បានលក់រថយន្តស្លាកលេខនគរបាលរបស់ខ្លួន ទៅលក់ឱ្យបុរសម្នាក់ ដែលក្រោយមកទើបដឹងថា ជាឈ្មួញជួញដូរគ្រឿងញៀន ដែលបង្រ្កាបដោយកម្លាំងអាវុធហត្ថរាជធានីភ្នំពេញនាថ្មីៗនេះ។</span></p>
<p><span style="color: #000000;">លោក ខៀវ សុភ័គ បានថ្លែងថា<strong> «ក្រសួងមហាផ្ទៃនឹងចាត់វិធានក្តៅភ្លាម ដោយដាក់ពាក្យប្តឹងទៅតុលាការ ដើម្បីចាត់ការលើមន្រ្តីរូបណា ដែលយកទ្រព្យសម្បត្តិ របស់អង្គភាពទៅលក់បន្តឲ្យបុគ្គលផ្សេងទៀត។ ការធ្វើបែបនេះ គឺជាការបំពានទៅលើកិច្ចសន្យារបស់អង្គភាព ដែលបានចែងថា មន្រ្តីនៅក្នុងអង្គភាព គ្មានសិទ្ធ លក់ ដូរទ្រព្យសម្បត្តិរបស់អង្គភាពទៅ ឲ្យអ្នកដទៃឡើយ។ បើរកឃើញថា មន្រ្តីរូបនោះ ប្រព្រឹត្តខុសទៅនឹងកិច្ចសន្យា អង្គភាព នឹងប្តឹងទៅតុលាការ ឲ្យចាត់ការតាម ច្បាប់ភ្លាម»</strong>។</span></p>
<p><span style="color: #000000;">លោក ខៀវ សុភ័គ បានបន្តថា ករណីមន្រ្តីអង្គភាពយកសម្បត្តិរបស់អង្គភាពទៅលក់ឲ្យអ្នកដទៃ គឺនៅមានច្រើនករណី ទៀតដូចនេះ លោកស្នើឲ្យមន្រ្តីនៅក្នុងអង្គភាពរូបណា ដែលដឹងខ្លួនថា បានប្រព្រឹត្តខុស ដោយមានការលក់ទ្រព្យសម្បត្តិរបស់អង្គភាព ត្រូវប្រញាប់ទៅដោះស្រាយជាបន្ទាន់ តែបើក្រសួងរកឃើញជាក់ស្តែងថា បានប្រព្រឹត្តខុសមែន ក្រសួងនឹងប្តឹងទៅតុលាការ ឲ្យចាត់ការតាមផ្លូវច្បាប់ ដោយគ្មានការលើកលែងនោះឡើយ។</span></p>
<p><span style="color: #000000;">កាលពីរសៀលថ្ងៃទី២៧ ខែមេសា ឆ្នាំ២០១៦កន្លងទៅ មានករណីបង្រ្កាបគ្រឿងញៀន ដ៏ធំមួយ នៅក្នុងខណ្ឌទួលគោក រាជធានីភ្នំពេញ រហូតដល់មានមន្រ្តីអាវុធហត្ថម្នាក់បានស្លាប់ បន្ទាប់ពីក្រុមគ្រឿងញៀនទាំងនោះ បានបាញ់តដៃមកលើសមត្ថកិច្ច ដែលឡោមព័ទ្ធផ្ទះរបស់ពួកគេ ដែលបន្លំដាក់លក់ជ្រូកខ្វៃ។</span></p>
<p><span style="color: #000000;">ទោះជាយ៉ាងណា ប្រតិបត្តិការនេះ សមត្ថកិច្ចក៏បានបាញ់សម្លាប់មេខ្លោងគ្រឿងញៀនវិញផងដែរ។ បន្ទាប់ពីបើកប្រតិបត្តិការបង្រ្កាបដ៏កក្រើកនេះ សមត្ថកិច្ចបានចាប់ខ្លួនបក្ខពួកជួញដូរគ្រឿងញៀន៥នាក់ ជាមួយនឹងការដកហូតកាំភ្លើងវែង-ខ្លី៦ដើម រឹបអូសរថយន្ត២គ្រឿង ម៉ូតូ៤គ្រឿង។ ប៉ុន្តែអ្វីដែលធ្វើឱ្យមហាជនចាប់អារម្មណ៍នោះ គឺក្នុងចំណោមរថយន្ត២គ្រឿង ដែលរឹបអូសនោះមានរថយន្ត១គ្រឿង ម៉ាកអូឌី ដែលពាក់ស្លាកលេខនគរបាល 2-0621 ដែលជារថយន្តរបស់នគរបាល ដែលត្រូវបានគេអះអាងថា ជារបស់លោកឧត្តមសេនីយ៍ រស់ ឧស្សហ៍អគ្គាធិការរង នៃអគ្គាធិការដ្ឋានកិច្ចការនយោបាយ រដ្ឋបាលនិងនគរបាល នៃក្រសួងមហាផ្ទៃ។</span></p>
<p><span style="color: #000000;">ករណីរបស់ លោក រស់ ឧស្សហ៍ ត្រូវបាន លោក ខៀវ សុភ័គ អះអាងថា នៅមិនទាន់មានការសម្រេចបែបណានៅឡើយទេ គឺរង់ចាំរបាយការណ៍ពីអគ្គស្នងការនគរបាលជាតិសិន បន្ទាប់ពីសមត្ថកិច្ចបានសាកសួរព័ត៌មានមួយចំនួនពីឧត្តមសេនីយ៍រូបនេះ៕</span></p>
<p><a class="thickbox" title="" href="/FileManager/Commons/2016/5/2/dsgdfg-02-05-2016--15-52-24.png"><img src="/FileManager/Articles/mce/2016/5/2/dsgdfg-02-05-2016--15-52-24.png" alt="" /></a></p>
<p><img src="http://image.freshnewsasia.com/2016/019/03/fn-2016-05-02-15-33-35-1.jpg" alt="" width="730" /></p>
<p><img src="http://image.freshnewsasia.com/2016/019/03/fn-2016-05-02-15-33-35-2.jpg" alt="" width="730" /></p>
<p><img src="http://image.freshnewsasia.com/2016/019/03/fn-2016-05-02-15-33-35-3.jpg" alt="" width="730" /></p>
<p><span style="color: #000000;"><br /></span></p>
<p style="text-align: right;"><br /><span style="color: #000000;">ផ្តល់សិទ្ធិដោយ ៖ ហ្រ្វេសញ៉ូវអាសុី </span></p>
<p><br /><br /></p>