<div class="article-content">
<p><strong>ភ្នំពេញ៖</strong> មន្រ្តីសាធារណការ បានឱ្យដឹងថា រថយន្តក្រុង ៤០គ្រឿង ត្រូវបាន នាំចូលពីប្រទេសកូរ៉េ ខាងត្បូង មក ដល់ប្រទេសកម្ពុជាហើយ នៅព្រឹកមិញ ថ្ងៃអង្គារ៍ទី១៩ ខែសីហានេះ ដើម្បីត្រៀម ដាក់ឱ្យដំណើរការ ដឹកជញ្ជូន ប្រជាពលរដ្ឋភ្នំពេញ តាមផ្លូវចំនួន៣ខ្សែថ្មីទៀត។</p>
<p>លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានប្រាប់មជ្ឈមណ្ឌល ព័ត៌មាន ដើមអម្ពិល ឱ្យដឹងថា រថយន្តទាំង៤០គ្រឿងនេះ បាននាំមកដល់ប្រទេសកម្ពុជាហើយ ក្នុងនោះ ១១គ្រឿង បាននាំមកដល់ក្រុងភ្នំពេញ ហើយ២៩គ្រឿងថែមទៀត ដឹកជាបណ្តើរៗ ចេញពីកំពង់ផែ ក្រុងព្រះសីហនុ ។</p>
<p>បើតាមការអះអាងរបស់អាជ្ញាធរក្រុងភ្នំពេញ នាពេលកន្លងមក បានឱ្យដឹងថា រថយន្តក្រុងថ្មីនេះ នឹងត្រៀម ដាក់ឱ្យដំណើរការ តាមផ្លូវ៣ខ្សែ នាដើមខែកញ្ញា ខាងមុខ ក្នុងនោះរួមមាន ខ្សែទី១ពីគីឡូម៉ែតលេខ ១១ទៅ ដល់វត្តក្តីតាកុយ (ផ្លូវជាតិលេខ១) ខ្សែទី២ពីផ្លូវគីម អ៊ីលស៊ុង កាត់តាមផ្លូវម៉ៅសេទុង រហូតដល់តាខ្មៅ និង ខ្សែទី៣ចាប់ពីផ្សាររាត្រី ផ្សារចាស់ ឡើងមកផ្លូវកម្ពុជាក្រោម មកផ្លូវសហព័ន្ធរុស្សីរហូតដល់ចោមចៅ ។ ប៉ុន្តែទោះជាយ៉ាងនេះក្តី តម្លៃសម្រាប់ការដឹកជញ្ជូនពលរដ្ឋម្នាក់ៗ មិនទាន់បញ្ជាក់ ឱ្យដឹងនៅឡើយ ។</p>
<p>សូមបញ្ជាក់ថា ក្រោមជំនួយរបស់ អង្គការ Jica របស់ជប៉ុន សាលារាជធានីភ្នំពេញ ធ្លាប់បានដាក់ប្រើប្រាស់រ ថយន្តក្រុងខ្សែដំបូង កាលពីដើមខែកុម្ភៈ ឆ្នាំ២០១៤ ចេញដំណើរពីមុខស្ថានទូតបារាំង ឆ្ពោះទៅស្ពានមុនីវង្ស ច្បារអំពៅ រាជធានីភ្នំពេញ ហើយថ្លៃឈ្នួលលើកដំបូង សម្រាប់ពលរដ្ឋម្នាក់ មានតម្លៃ ត្រឹមតែ ១៥០០រៀល ប៉ុណ្ណោះ ។ ការដាក់ឱ្យដំណើរការរថយន្តក្រុងនេះ មិនត្រឹមតែជួយសម្រួល ដល់ការធ្វើដំណើររបស់ប្រជាពលរដ្ឋ នោះទេ ថែមទាំង កាត់បន្ថយការស្ទះចរាចរណ៍ថែមទៀត ៕</p>
<p style="text-align: center;"><img src="http://image.dap-news.com:81/dap-news/dap-images/2014/August/id-010/chanroth014-aug-194.jpg" alt="" width="500" /></p>
<p style="text-align: center;"><img src="http://image.dap-news.com:81/dap-news/dap-images/2014/August/id-010/chanroth014-aug-195.jpg" alt="" width="500" /></p>
<p style="text-align: center;"><img src="http://image.dap-news.com:81/dap-news/dap-images/2014/August/id-010/chanroth014-aug-196.jpg" alt="" width="500" /></p>
<p style="text-align: center;"><img src="http://image.dap-news.com:81/dap-news/dap-images/2014/August/id-010/chanroth014-aug-197.jpg" alt="" width="500" /></p>
</div>
<p style="text-align: right;"><a href="http://www.dap-news.com/2011-06-14-02-39-55/93136-2014-08-19-05-15-15.html" target="_blank">ផ្តល់សិទ្ធដោយ ៖ ដើមអម្ពិល</a></p>