<p><span style="color: #000000;"><strong>ភ្នំពេញ៖</strong> បន្ទាប់ពីទទួលបានជោគជ័យ ក្នុងការដឹកនាំសមាជិក អានព្រះត្រៃបិដកខ្នាតអន្តរជាតិ នៅប្រទេសឥណ្ឌានោះ នៅក្នុងឆ្នាំ២០១៥ ខាងមុខនេះ ព្រះសង្ឃ និងពុទ្ធបរិស័ទកម្ពុជា នឹងបន្តដឹកនាំសកម្មភាពនេះទៀត។</span></p>
<p><span style="color: #000000;">បន្ទាប់ពីបានដឹកនាំធម្មយាត្រា អានព្រះត្រៃបិដកថ្នាក់អន្តរជាតិ នៅប្រទេសឥណ្ឌាវិញ នៅម៉ោង៩ និង៣០យប់ ថ្ងៃទី២៤ ខែធ្នូ ឆ្នាំ២០១៤ នាព្រលាន យន្តហោះអន្តរជាតិភ្នំពេញ ព្រះអង្គ ពឿយ មេត្តា ប្រធានគណៈធម្មយាត្រា បានមានថេរៈដីកាថា កម្ពុជាបានរៀបចំ ធ្វើជាម្ចាស់ផ្ទះអានព្រះត្រៃបិដក ថ្នាក់អន្តរជាតិនេះ បានជោគជ័យខ្លាំងណាស់ ព្រោះមានព្រះសង្ឃ ចូលរួមជាច្រើនប្រទេសរាប់ពាន់អង្គ និងមានពុទ្ធបរិស័ទចូលរួមជាច្រើនពាន់ផងដែរ។</span></p>
<p><span style="color: #000000;">ព្រះអង្គមានថេរៈដីកាបន្តថា “កម្ពុជាធ្វើជាម្ចាស់ផ្ទះ ២ឆ្នាំជាប់គ្នា ឆ្នាំ២០១៤-២០១៥ ដែលជាការអានព្រះត្រៃបិដក ថ្នាក់អន្តរជាតិលើកទី១០ និងទី១១នៅប្រទេសឥណ្ឌា ហើយកិច្ចការនេះ បានសហការជាមួយក្រុមហ៊ុន ស្កាយអង្គរអ៊ែឡាញ (Sky Angkor Air Line) និងមហាអង្គរទេសចរណ៍ ដែលមានអាត្មាផ្ទាល់ និងមានគណៈកម្មការ ទាំង១០ប្រទេស បានដឹកនាំសូត្រព្រះត្រៃបិដកអន្តរជាតិ អីចឹងយើងបានឱកាស ហោះទៅតំបន់ពុទ្ធគយាជាលើកទីមួយ”។</span></p>
<p><span style="color: #000000;">ព្រះអង្គ ពឿយមេត្តា បានបញ្ជាក់ថា គណៈធម្មយាត្រានេះ មិនត្រឹមតែបានដឹកនាំ អានព្រះត្រៃបិដកនោះទេ គឺថែមទាំងបានទៅចូលថ្វាយបង្គំ នៅតាមទីឋានពុទ្ធស្ថាន មានកន្លែងព្រះប្រសូត្រ, ត្រាស់ដឹង, បរិនិព្វាន និងសម្តែងព្រះធម្មចក្រជាដើម។</span></p>
<p><span style="color: #000000;">ជាមួយគ្នានេះ ព្រះអង្គបានក៏បាន សូមថ្លែងអំណរគុណដល់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលបានបរិច្ចាកថវិកា ២០០០ដុល្លារ សម្រាប់រៀបចំកម្មវិធី និង១០.០០០ដុល្លារទៀត សម្រាប់កសាងវត្តនៅក្នុងប្រទេសឥណ្ឌា និងពុទ្ធបរិស័ទក្នុង និងក្រៅប្រទេសជាច្រើនទៀត ដែលបានបរិច្ចាទាំងកម្លាំងកាយ និងថវិកាជាច្រើនដើម្បីចូលរួមក្នុងកម្មវិធីនេះផងដែរ។</span></p>
<p><span style="color: #000000;">ឆ្លៀតក្នុងឱកាសនោះ ក៏បានអំពាវនាវដល់ពុទ្ធបរិស័ទទាំងក្នុង និងក្រៅប្រទេស សូមជួយចូលរួមបរិច្ចាកថវិកាបន្ថែមទៀត ដើម្បីរៀបចំកម្មវិធីអានព្រះត្រៃបិដក នៅឆ្នាំ២០១៥បន្តទៀត។ និងនៅក្នុងថ្ងៃទី២០ ខែមករា ឆ្នាំ២០១៥ខាងមុខនេះ នឹងដឹកនាំគណៈធម្មយាត្រ ទៅថ្វាយបង្គំតាមពុទ្ធស្ថានបន្ត ប៉ុន្តែទាន់ទៅរៀបចំកម្មវិធី អានព្រះបិដកនោះទេ បើពុទ្ធបរិស័ទ ណាមួយ ចង់ទៅចូលរួមអាចទំនាក់ទំនង នៅកុដិលេខ៣៥ វត្តបទុមតី រាជធានីភ្នំពេញ ឬទូរស័ព្ទលេខ ០១៧ ២៩៣ ០៥៩។</span></p>
<p><span style="color: #000000;">ព្រះអង្គ ក៏បានថ្លែងអំណរគុណ ដល់រដ្ឋាភិបាលប្រទេសឥណ្ឌា ដែលបានរៀបចំកម្លាំងការពារ ក្នុងកម្មវិធីនេះ បានយ៉ាងល្អ និងសុវត្ថិភាពជាទីបំផុត មិនមានអ្វីអាកខាននោះទេ។</span></p>
<p><span style="color: #000000;">សូមបញ្ជាក់ថា គណៈធម្មយាត្រា ដែលដឹកនាំដោយព្រះអង្គ ពឿយ មេត្តា ទៅប្រទេសឥណ្ឌានេះ កាលពីថ្ងៃទី២៨ ខែវិច្ឆិកា ឆ្នាំ២០១៤ ដើម្បីទៅចូលរួមកម្មវិធី អានព្រះត្រៃបិដកអន្តរជាតិ រយៈពេល២៦ថ្ងៃ ចាប់ពីថ្ងៃទី២៨ ខែវិច្ឆិកា ដល់ថ្ងៃទី២៤ ខែធ្នូ៕</span></p>
<p><span style="color: #000000;"><a class="thickbox" title="" href="/FileManager/Commons/2014/12/25/12-25-2014-2-45-55-pm-25-12-2014--14-51-24.png"><img src="/FileManager/Articles/mce/2014/12/25/12-25-2014-2-45-55-pm-25-12-2014--14-51-24.png" alt="" /></a></span></p>
<p><a class="thickbox" title="" href="/FileManager/Commons/2014/12/25/12-25-2014-2-45-30-pm-25-12-2014--14-51-34.png"><img src="/FileManager/Articles/mce/2014/12/25/12-25-2014-2-45-30-pm-25-12-2014--14-51-34.png" alt="" /></a></p>
<p><a class="thickbox" title="" href="/FileManager/Commons/2014/12/25/12-25-2014-2-46-25-pm-25-12-2014--14-51-50.png"><img src="/FileManager/Articles/mce/2014/12/25/12-25-2014-2-46-25-pm-25-12-2014--14-51-50.png" alt="" /></a></p>
<p><a class="thickbox" title="" href="/FileManager/Commons/2014/12/25/12-25-2014-2-46-11-pm-25-12-2014--14-52-01.png"><img src="/FileManager/Articles/mce/2014/12/25/12-25-2014-2-46-11-pm-25-12-2014--14-52-01.png" alt="" /></a></p>
<p><a class="thickbox" title="" href="/FileManager/Commons/2014/12/25/12-25-2014-2-46-41-pm-25-12-2014--14-52-15.png"><img src="/FileManager/Articles/mce/2014/12/25/12-25-2014-2-46-41-pm-25-12-2014--14-52-15.png" alt="" /></a><span style="color: #000000;"><br /></span></p>
<p style="text-align: right;"><span style="color: #000000;"><span>ផ្ដល់សិទ្ធដោយ៖ ដើមអម្ពិល</span><br /></span></p>