<div class="article-content">
<p><strong>ភ្នំពេញ </strong> ៖ វេជ្ជបណ្ឌិតនៅមន្ទីរពេទ្យមិត្ដ ភាពកម្ពុជា-សូវៀត ហៅមន្ទីរពេទ្យរុស្ស៊ី ម្នាក់ បានរង<br />របួសធ្ងន់ រីឯភរិយារបស់ខ្លួន បានស្លាប់ បន្ទាប់ពីរថយន្ដបាឡែន មួយគ្រឿង បើកបុកប៉ើងដូចសី<br /> កាលពីវេលាម៉ោង៥និង៤៥នាទី ព្រឹកថ្ងៃទី១៦ ខែមីនា ឆ្នាំ២០១៣ ស្ថិតនៅទល់មុខចំណតរថយន្ដ<br />ក្រុងនាគក្រហម ខាងជើងផ្សាររាត្រី តាមបណ្ដោយផ្លូវលេខ១០៨ សង្កាត់វត្ដភ្នំ ខណ្ឌដូនពេញ ។</p>
<p>សេចក្ដីរាយការណ៍ពីសមត្ថកិច្ចមូលដ្ឋាន ៍បានឱ្យដឹងថា មុនពេលកើតហេតុ ជនរងគ្រោះទាំងពីរ<br />នាក់ប្ដីប្រពន្ធ ដែលត្រូវបានគេដឹងថា ប្ដីជាគ្រូពេទ្យនៅមន្ទីរពេទ្យរុស្ស៊ី អាយុជាង៥០ឆ្នាំ បាននាំគ្នា<br />ដើរហាត់ប្រាណ នៅតាមមាត់ទន្លេ លុះដើរដល់ចំណុចកើតហេតុ ស្រាប់តែមានរថយន្ដបាឡែន<br />មួយគ្រឿង អត់ពាក់ស្លាកលេខ បើកយ៉ាងលឿន តាមបណ្ដោយផ្លូវព្រះស៊ីសុវត្ថិ រួចហើយបុកជន<br />រងគ្រោះពេញមួយទំហឹង ប៉ើងដូចសី បណ្ដាលឱ្យរងរបួសធ្ងន់ទាំងពីរនាក់។</p>
<p>ក្រោយកើតហេតុ ជនរងគ្រោះទាំងពីរ នាក់ប្ដីប្រពន្ធ ត្រូវបានដឹកបញ្ជូនទៅសង្គ្រោះ នៅមន្ទីរពេទ្យ<br />រុស្ស៊ី ប៉ុន្ដែជាអកុសលស្ដ្រីជាប្រពន្ធ ដែលរងរបួសធ្ងន់បានស្លាប់ ពេលបញ្ជូនទៅដល់មន្ទីរពេទ្យ ។</p>
<p>បច្ចុប្បន្នសពស្ដ្រីរងគ្រោះ ត្រូវបានក្រុម គ្រួសារយកមកធ្វើបុណ្យនៅផ្ទះរបស់ខ្លួន ស្ថិតនៅផ្ទះលេខ<br />៣២AE0 តាមបណ្ដោយផ្លូវលេខ១០៨ សង្កាត់វត្ដភ្នំ ខណ្ឌដូនពេញ ដោយមានការស្រែកយំយ៉ាង ខ្លាំងពីសំណាក់កូនៗនិងក្រុមគ្រួសារទាំងមូល ដោយឡែករថយន្ដបង្ក គ្មាននរណាម្នាក់ ស្គាល់ច្បាស់<br />នោះឡើយ និងមិនដឹងថា បើក រត់ទៅដល់ទីណាដែរ ៕</p>
<p style="text-align: center;"><img src="http://111.92.240.170:81/dap-news/dap-images/2013/March/id-011/Hong-0275.jpg" alt="Photo by DAP-NEWS" width="400" /></p>
<p style="text-align: right;">ផ្តល់សិទ្ធិដោយ៖ ដើមអំពិល</p>
</div>