<div class="article-content">
<p>ញូយ៉ក៖ ប្រភពព័ត៌មាន ពីគេហទំព័រ CNN បានឲ្យដឹងថា មានហេតុការណ៍ផ្ទុះដ៏ធំមួយ បានកើតឡើងនៅថ្ងៃពុធនេះ បណ្តាលឲ្យស្រ្ដី ២នាក់បានស្លាប់ និងមនុស្ស ១៨នាក់ រងរបួស ហើយជាលទ្ធផលបណ្តាលឲ្យអគារ ២ខ្នងត្រូវដួលរលំ និងអណ្តាតភ្លើង បានឆាបឆេះឡើង នៅក្នុងតំបន់ Manhattan ភាគខាងលិចក្រុង Harlem។ នេះបើយោង តាមការលើកឡើង របស់អាជ្ញាធរនៅកន្លែងកើតហេតុ។</p>
<p>លោក Bob McGee អ្នកនាំពាក្យម្នាក់បាននិយាយថា អ្នកផ្គត់ផ្គង់ឧស្ម័នបានទទួលទូរសព្ទមួយ ដែលបាន ផ្តល់ដំណឹងពីការធ្លាយចេញនូវឧស្ម័ន នៅវេលាម៉ោងប្រមាណ៩និង១៣នាទីព្រឹក។ ដោយទូរសព្ទនេះ មានប្រភពមកពីប្រជាពលរដ្ឋដែលរស់នៅក្នុងអគារមួយទើបសាងសង់ថ្មីនៅតាមបណ្តោយវិថី Park។ ក្រុមការងារបានទៅកន្លែងកើតហេតុ ក្រោយពេលការផ្ទុះនេះកើតឡើងបានរយៈពេលពីរនាទី។</p>
<p>ផ្សែងពពកខ្មៅបានហោះហើរគ្របដណ្តប់លំនៅដ្ឋានរបស់ប្រជាពលរដ្ឋដែលកំពុងរស់នៅទីនោះ បន្ទាប់ពី ហេតុការណ៍ផ្ទុះនេះកើតឡើង។ ក្រុមអ្នកពន្លត់អគ្គីភ័យរាប់រយនាក់ បានប្រើប្រាស់បំពង់ទឹកពន្លត់ភ្លើង។ គួរបញ្ជាក់ថា ការដឹកអ្នកដំណើរតាមផ្លូវក្រោមដីត្រូវបានផ្អាកមួយរយៈដោយសារការរំខានពីកំទេចនានា ដែលកើតចេញពីការផ្ទុះនេះ។</p>
<p>បន្ទាប់ពីមានហេតុការណ៍នេះកើតឡើង មន្ត្រីប៉ូលីសប្រចាំទីក្រុង ញ៉ូវយកបានប្រញ៉ាប់ប្រញ៉ាល់ទៅកាន់កន្លែងកើតហេតុ។ កម្មករម្នាក់ដែលធ្វើការនៅក្បែរកន្លែងកើតហេតុបានឲ្យដឹងថា អគារចំនួនពីរបានដួលរលំ ហើយលោកសង្ឃឹមថា គ្មានមនុស្សស្ថិតនៅក្នុងអគារនោះចុះ ព្រោះវាបានដួលរលំក្លាយជាកំទេចកំទីអស់ទៅហើយ៕</p>
<p style="text-align: center;"><img src="http://image.dap-news.com:81/dap-news/dap-images/2014/March/id-067/CH-00549.jpg" alt="" width="550" /></p>
<p style="text-align: right;">ផ្តល់សិទ្ធិដោយ៖ ដើមអម្ពិល</p>
</div>