<div class="article-content">
<p><strong>កណ្តាល៖</strong> ប្តី-ប្រពន្ធវ័យក្មេង រួមនិងកូនស្រីតូច វ័យទើប ១១ខែ បានស្លាប់ភ្លាមៗមួយរំពេច យ៉ាង អាណោចអាធ័ម នៅលើផ្លូវជាតិលេខ៤ ស្ថិតក្នុងភូមិពងទឹក ឃុំដំណាក់អំពិល ស្រុកអង្គស្នួល ខេត្ត កណ្តាល កាលពីវេលាម៉ោង ៤ និង៥៥នាទីរសៀល ថ្ងៃទី២៣ ខែធ្នូ ឆ្នាំ២០១៣ ដោយសាររថយន្ត សាំយ៉ុងរបស់គ្លីនិកសម្ពព ថ្នល់ទទឹងបុកពេញ ទំហឹង ខណៈជនរងគ្រោះកំពុងជិះម៉ូតូឌុបគ្នា។</p>
<p>បើតាមនគរបាលស្រុកអង្គស្នួល បានឲ្យដឹងថា ជនរងគ្រោះក្នុងគ្រោះថ្នាក់ចរាចរដ៏រន្ធត់ខាងលើនេះ មានឈ្មោះ សាន ចន្ធី អាយុ ២៨ឆ្នាំ ជាប្តី, ឈ្មោះ ទក សុធារី ជាប្រពន្ធ និងកូនស្រីឈ្មោះ ចន្ធី វណ្ណៈកា អាយុ ១១ខែ។ ជនរង គ្រោះអ្នកទាំង៣រស់នៅភូមិក្បាលថ្នល់ ឃុំត្នោត ស្រុកកំពង់រោទ៍ ខេត្តស្វាយរៀង ជិះម៉ូតូម៉ាហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ 1AN-0466 ក្នុងទិស ដៅពីកើតទៅលិច។</p>
<p>ចំណែករថយន្តបង្កហេតុម៉ាកសាំយ៉ុង ពណ៌ស ពាក់ស្លាកលេខភ្នំពេញ 2A-7185 ជារថយន្តរបស់ គ្លីនិកសម្ពពថ្នល់ទទឹង បើកបរដោយបុរសម្នាក់មិនស្គាល់អត្តសញ្ញាណ ក្រោយកើតហេតុបាន រត់គេចខ្លួនបាត់។</p>
<p>បើតាមប្រភពពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុរថយន្តបង្កហេតុ បានបើកបញ្ច្រាស ទិសជាមួយម៉ូតូ។ លុះដល់កន្លែងហេតុ ក៏ជ្រុលទៅបុកនឹងម៉ូតូជនរងគ្រោះ ដែលកំពុងឌុបប្រពន្ធ និងកូនតូចជិះពីក្រោយ បណ្តាលឲ្យស្លាប់ភ្លាមៗនៅនឹងកន្លែង កើតហេតុគួរ ឲ្យសង្វេក ។</p>
<p>ក្រោយកើតហេតុនគរបាលចរាចរណ៍ បានចុះវាស់វែង និងនាំយកទាំងម៉ូតូជនរងគ្រោះ និងរថយន្ត បង្កហេតុទៅរក្សាទុកនៅអធិការដ្ឋាននគរបាលស្រុកអង្គស្នួល ដើម្បីរង់ចាំដោះស្រាយតាមច្បាប់៕</p>
<p style="text-align: center;"><img src="http://image.dap-news.com:81/dap-news/dap-images/2013/November/id-009/S-306.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2013/November/id-009/S-307.jpg" alt="" width="550" /></p>
<p style="text-align: center;"><img src="http://image.dap-news.com:81/dap-news/dap-images/2013/November/id-009/S-308.jpg" alt="" width="550" /></p>
<p style="text-align: right;">ផ្តល់សិទ្ធិដោយ៖ <a href="http://www.dap-news.com/2011-06-14-02-39-55/78019-2013-12-23-14-49-54.html"><span style="color: #0000ff;">ដើមអំពិល</span></a></p>
</div>