<p><span style="color: #000000;"><strong>បាត់ដំបង៖</strong> ព្រះមហាក្សត្រខ្មែរ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី នាព្រឹកថ្ងៃទី០៦ ខែ ឧសភា ឆ្នាំ២០១៥នេះ បានយាងជាព្រះរាជាធិបតី ដ៏ខ្ពង់ខ្ពស់ក្នុងព្រះរាជពិធីបុណ្យច្រត់ព្រះនង្គ័ល ដែលបានប្រា រព្ធធ្វើឡើងនាខេត្តបាត់ដំបង ជាខេត្តជង្រុកស្រូវដ៏ធំជាងគេនៅកម្ពុជា។</span></p>
<p><span style="color: #000000;">នៅក្នុងព្រះរាជពិធី ដែលជាការដាស់ស្មារតីដល់ប្រជាកសិករខ្មែរថា រដូវបង្កបង្កើនផលឈានចូលមកដល់នោះ ក៏ មានការអញ្ជើញចូលរួមផងដែរ ពីសម្តេច ហេង សំរិន ប្រធានរដ្ឋសភា ព្រមទាំងមន្រ្តីជាន់ខ្ពស់រដ្ឋសភា ព្រឹទ្ធសភា មន្រ្តីជាន់ខ្ពស់រាជរដ្ឋាភិបាល ព្រះរាជ វង្សានុវង្ស មន្រ្តីអង្គទូតតំណាងបណ្តាប្រទេសនានា មន្រ្តីរាជការ និង ប្រជាពលរដ្ឋនៅក្នុងខេត្តបាត់ដំបង យ៉ាងច្រើនកុះករ។</span></p>
<p><span style="color: #000000;">ព្រះរាជពិធីច្រត់ព្រះនង្គ័លនាដឹកដីខេត្តបាត់ដំបងឆ្នាំ លោក ច័ន្ទ សុផល អភិបាលខេត្តបាត់ដំបង ត្រូវបានព្រះមហា ក្សត្ររា ជានុញ្ញាតដ៏ខ្ពង់ខ្ពស់ឲ្យធ្វើជាតំណាងរបស់ព្រះអង្គកាន់នង្គ័លទី២ ឬហៅថា ស្តេចមាឃ ឬឯភរិយារបស់ លោក ជាព្រះមេហួ។ ដោយឡែកនង្គ័លទី១ តំណាងឲ្យវិស័យកសិកម្ម កាន់ដោយលោក លី ផល្លា រដ្ឋលេខាធិការ ក្រសួង កសិកម្ម ខណៈលោក កែវ សិរីវុធ គណៈកម្មការបុណ្យជាតិ កាន់នង្គ័លទី៣ តំណាងព្រះបរមរាជវាំង។</span></p>
<p><span style="color: #000000;">ព្រះរាជពិធីបុណ្យច្រត់ព្រះនង្គ័លនាព្រឹកនេះ ត្រូវបានប្រារព្ធឡើងយ៉ាងមហោឡារឹក ដោយការតុបតែងលំអរយ៉ាង ស្រស់ស្អាតនៅលើវាលព្រះស្រែត្រូវបានដាំស្មៅយ៉ាងខៀវស្រងាត់ រីឯនៅបរិវេណជុំវិញ ក៏មានការសាងសង់រោង ពិព័រណ៍ផលិតផលនានានៅក្នុងខេត្តផងដែរ។ ក្រៅពីព្រះរាជពិធីច្រត់ព្រះនង្គ័ល នៅពេលរាត្រី ក៏មានពិធីបង្ហោះ គោម បាញ់កាំជ្រួច និង ប្រគំតន្រ្តី បង្កភាពសប្បាយរីករាយជូនពលរដ្ឋក្នុងខេត្តបាត់ដំបង ក៏ដូចជាភ្ញៀវទេសចរជាតិ អន្តរជាតិផងដែរ។</span></p>
<p><span style="color: #000000;">ព្រះរាជពិធីបុណ្យច្រត់ព្រះនង្គ័ល មានមកតាំងពីបុរាណកាល តាំងពីក្នុងសម័យនគរភ្នំ (ហ្វូណន) និង ក្នុងសម័យនគរធំ (យសោធរបុរៈ) តាមទម្លាប់ពិធីនេះធ្វើឡើងក្នុងការផ្សងមើលប្រថ្នូលរបស់ស្រុកទេស ជាពិសេសផ្សងចង់ ដឹងទៅលើទិន្នផលកសិផល ទៅតាមការ ស៊ីផឹក របស់ «គោឧសភរាជ»។</span></p>
<p><span style="color: #000000;">គោ ១នឹម ដែលទឹមច្រត់ព្រះនង្គ័លនោះ គេហៅថា «គោឧសភរាជ» ក៏មានកំណត់ក្នុងលក្ខណៈតាមបែបនិយមបច្ចុប្បន្ន គឺសម្បុរខ្មៅ ស្នែងរាងជ្រពាស់ ឈ្នក់ ឬ ប្រក់នាគ គឺរាងខុបទៅមុខបន្ដិច ហើយវាត់ចុងទៅលើបន្ដិច។ គោ ២ នឹមទៀត ហែមុខហែរក្រោយឃើញថា មិនទាន់កំណត់លក្ខណៈ តែតាមដែលធ្លាប់ប្រើមក ហើយឃើញច្រើនតែសម្បុរក្រហម។</span></p>
<p><span style="color: #000000;">«គោឧសភរាជ» ក្នុងវេលាទឹមច្រត់ព្រះនង្គ័ល គេប្រដាប់ដោយគ្រឿង គឺពាក់ស្រោមមុខស្រោមស្នែង និងពាក់សំ ពត់កម្រាល សម្បុរក្រហមលើខ្នងផង។ ឯព្រះនង្គ័លទាំង៣ គេលាបថ្នាំពណ៌ខ្មៅកាត់ខ្សែក្រហមដោយអន្លើៗ ឯចន្ទោលព្រះនង្គ័ល សម្រាប់អ្នកតំណាងព្រះអង្គនោះ មានលក្ខណៈពិសេស គឺធ្វើជារូបនាគ លាបថ្នាំពណ៌មាស។ នៅត្រង់កនាគមានភូ ធ្វើពីរោមសត្វសម្បុរ បែបភូទួន។</span></p>
<p><span style="color: #000000;">ទាក់ទិននឹងការផ្សងគោឧសភរាជ គឺព្រាហ្មណ៍ព្រះរាជគ្រូ សូត្រពាក្យអធិដ្ឋានផ្សងគោឧសភរាជ ដែលទឹមច្រត់ព្រះ នង្គ័លនោះ ឱ្យស៊ីផឹកអាហារ ៧យ៉ាង ដែលភ្នាក់ងាររៀបដាក់តុប្រាក់ធំៗ តាំងទុកនៅទីមុខព្រះពន្លា គឺគ្រាប់ស្រូវ១តុ គ្រាប់សណ្ដែក ១តុ គ្រាប់ពោត ១តុ គ្រាប់ល្ង ១តុ ស្មៅស្រស់ ១តុ ទឹក ១តុ ស្រា ១តុ ។</span></p>
<p><span style="color: #000000;">ពេលសូត្រចប់ព្រាហ្មណ៍ព្រះរាជគ្រូ យកទឹក មន្ដប្រោះក្បាលព្រះគោទាំងពីរ ហើយមន្ដ្រីម្នាក់ ដែលកាន់នង្គ័លស្ដេចមាឃ ដឹកគោឧសភរាជទាំងពីរទៅឱ្យស៊ីផឹក របស់ទាំង ៧យ៉ាង។ នៅពេលគោឧសភរាជចូលចិត្ដស៊ីផឹកអ្វី ក៏ស៊ីផឹកទៅគេមិនបង្ខំឱ្យស៊ីផឹកចំពោះអាហារណានីមួយៗទេ កាលព្រះគោស៊ីផឹកអ្វីមួយយ៉ាង ឬពីរយ៉ាងព្រាហ្មណ៍ក៏ទាយផលប្រផ្នូលទៅខាងមុខតាមនោះ រីឯទំនាយមិនជាការប្រាកដប៉ុន្មានទេ គឺថាបើព្រះគោស៊ីអ្វី ក៏ទាយថា ក្នុងឆ្នាំនេះរបស់នោះសំបូរប្លែក តែបើស៊ី ស្មៅទាយថា និងកើតជំងឺគោ បើផឹកស្រានឹងកើតមនុស្សពាល ចោរលួច ចោរប្លន់ជាច្រើន។</span></p>
<p><span style="color: #000000;">លំដាប់នោះ ស្ដេចមាឃ និង មេហួ ចូលទៅថ្វាយបង្គំព្រះទេវរូបនៅក្នុងរោងមណ្ឌលទិសខាងកើត «ជាទីតាំងព្រះកច្ចាយនទេវរូប» នោះពួកបារគូ ក៏ចូលផ្លុំស័ង្ខ ព្រះរាជគ្រូយកទឹកមន្ដ ប្រោះព្រំឱ្យអ្នកទាំងពីរ ព្រមទាំងឱ្យស័ព្ទសាធុ ការពរ ឱ្យបានប្រកបដោយសេរីសួស្ដីនូវសេចក្ដីសុខ មហាប្រសើររៀងទៅសម្រាប់ប្រទេសជាតិ និង ប្រជាពលរដ្ឋ ខ្មែរ ហើយព្រះរាជពិធីច្រត់ព្រះនង្គ័ល ក៏ត្រូវបានបិទបញ្ចប់៕</span></p>
<p><span style="color: #000000;"><a class="thickbox" title="" href="/FileManager/Commons/2015/5/6/5-6-2015-8-43-33-am-06-05-2015--08-49-54.png"><img src="/FileManager/Articles/mce/2015/5/6/5-6-2015-8-43-33-am-06-05-2015--08-49-54.png" alt="" /></a></span></p>
<p><a class="thickbox" title="" href="/FileManager/Commons/2015/5/6/5-6-2015-8-43-59-am-06-05-2015--08-50-05.png"><img src="/FileManager/Articles/mce/2015/5/6/5-6-2015-8-43-59-am-06-05-2015--08-50-05.png" alt="" /></a></p>
<p><a class="thickbox" title="" href="/FileManager/Commons/2015/5/6/5-6-2015-8-44-18-am-06-05-2015--08-50-15.png"><img src="/FileManager/Articles/mce/2015/5/6/5-6-2015-8-44-18-am-06-05-2015--08-50-15.png" alt="" /></a><span style="color: #000000;"><br /></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>