<div class="article-content">
<p><span style="color: #000000;"><strong>ភ្នំពេញ ៖</strong> យុត្តិធម៌ពិតជាមាន ទីបំផុតអតីតឧត្តមសេនីយ៍ យោធាផ្កាយ២ ឈ្មោះ គីម ម៉ារិន្ថា ត្រូវបានតុលាការ រាជធានីភ្នំពេញ សម្រេចឃុំខ្លួន ជាបណ្តោះអាសន្ន នៅពន្ធនាគារព្រៃស ពីបទឃាតកម្មដ៏សាហាវព្រៃផ្សៃសម្លាប់ ប្រពន្ធចុង និងកូនស្រីអាយុ ៦ឆ្នាំរបស់ខ្លួន ហើយយកសពពួកគេទាំងពីរនាក់ ទៅបោះចោលនៅជ្រោះពេជ្រនិល ។</span></p>
<p><span style="color: #000000;">ជនសង្ស័យជាទាហានពាក់ផ្កាយ២ រូបនេះ និងជាប្រធានក្រុមហ៊ុន រថយន្តក្រុងដឹកជញ្ជូន GST ត្រូវបាននគរបាល ព្រហ្មទណ្ឌក្រសួងមហាផ្ទៃ បញ្ជូនខ្លួនទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី១៤ ខែកញ្ញា ឆ្នាំ២០១៤ បន្ទាប់ពីត្រូវចាប់ខ្លួន កាលពីម្សិលមិញ នៅក្នុងទឹកដីថៃជាប់ព្រំដែនប្រទេសឡាវ ។</span></p>
<p><span style="color: #000000;">ក្រោយពីបញ្ជូនខ្លួនទៅដល់សាលាដំបូងរាជធានីភ្នំពេញ រួចមក ជនសង្ស័យរូបនេះ ត្រូវបានព្រះរាជអាជ្ញារងអម សាលាដំបូងរាជធានីភ្នំពេញ លោក កែវ សុជាតិ បានធ្វើការសាកសួរ ហើយឈានទៅដល់ការចោទប្រកាន់ រួច បញ្ជូនសំណុំរឿងទៅកាន់លោកចៅក្រមស៊ើបសួរ ធី ឆៃ ហើយចេញដីកាឃុំខ្លួនតែម្តង នៅព្រឹកថ្ងៃដដែលនោះ ។</span></p>
<p><span style="color: #000000;">ថ្លែងប្រាប់មជ្ឈមណ្ឌលព័ត៌មានដើមអម្ពិលតាមទូរស័ព្ទ នៅរសៀលថ្ងៃទី១៤ ខែកញ្ញា ឆ្នាំ២០១៤ នេះ ព្រះរាជអាជ្ញា រង លោក កែវ សុជាតិ បានបញ្ជាក់ថា " ខ្ញុំបានចោទប្រកាន់ជននេះ ពីបទឃាតកម្មគិតទុកជាមុន យោងតាមមាត្រា ២០០ ហើយទោសហ្នឹងប្រឈមការជាប់ពន្ធនាគារអស់មួយជីវិត" ។</span></p>
<p><span style="color: #000000;">មន្រ្តីសាលាដំបូងរាជធានីភ្នំពេញ មួយរូបបានថ្លែងឲ្យដឹងថា បន្ទាប់ពីព្រះរាជអាជ្ញារង កែវ សុជាតិ ធ្វើការចោទ ប្រកាន់រួចហើយនោះ សំណុំរឿងដែលធ្វើឲ្យមានការចាប់អារម្មណ៍ពីមហាជនទូទៅមួយនេះ ត្រូវបានបញ្ជូនទៅ កាន់ចៅក្រមស៊ើបសួរ ហើយចេញដីកាឃុំខ្លួនដាក់ពន្ធនាគារតែម្តងទៅ ។</span></p>
<p><span style="color: #000000;">គួរបញ្ជាក់ថា អតីតឧត្តមសេនីយ៍នៅក្រសួងការពាររូបនេះ រួមជាមួយកូនប្រសាប្រុសរបស់ខ្លួន បានរៀបចំគម្រោង សម្លាប់ស្ត្រីជាប្រពន្ធចុង និងកូនស្រីអាយុ ៦ឆ្នាំ នៅទីស្នាក់ការក្រុមហ៊ុនរថយន្តក្រុង GST ក្បែរផ្សារធំថ្មី ខណ្ឌ ដូនពេញ កាលពីអំឡុងខែមីនា ឆ្នាំ២០១៤ កន្លងទៅ ហើយជនសង្ស័យបានប្រើកូនប្រសាយកសពពួកគេទាំង ពីរនាក់ ដាក់ចូលវ៉ាលី ដឹកតាមរថយន្តលុច្សស៊ីសទៅទម្លាក់ចោលនៅជ្រោះពេជ្រនិល រួចត្រូវបានអ្នកកាប់អុស ប្រទះឃើញ ។</span></p>
<p><span style="color: #000000;">ក្រោយធ្វើសកម្មភាពដ៏សាហាវព្រៃផ្សៃនេះ កម្លាំងនគរបាលព្រហ្មទណ្ឌ ក្រសួងមហាផ្ទៃសហការជាមួយកម្លាំង នគរបាលព្រហ្មទណ្ឌរាជធានីភ្នំពេញ ដោយមានការដឹកនាំបញ្ជាតាមផ្លូវច្បាប់ ពីសំណាក់ព្រះរាជអាជ្ញារង កែវ សុជាតិ បានបើកការស្រាវជ្រាវយ៉ាងយកចិត្តទុកដាក់ ហើយឈានទៅដល់ការចាប់ខ្លួនពួកគេទាំងពីរនាក់ជាបន្ត បន្ទាប់ ។</span></p>
<p><span style="color: #000000;">សូមបញ្ជាក់ថា សពជនរងគ្រោះ ស្ដ្រីជាម្ដាយឈ្មោះ រ៉ា ដារី អាយុ៣០ឆ្នាំ និងកូនស្រី ឈ្មោះ គឹម ដាវិចដា អាយុ៦ឆ្នាំ ដែលរស់នៅផ្ទះលេខ ២០ ផ្លូវលេខ២៦៧ សង្កាត់ទឹកល្អក់ ខណ្ឌទួលគោក ត្រូវបានអ្នកកាប់អុសនៅក្នុងព្រៃ ប្រទះ ឃើញស្លាប់ដោយធុំក្លិនស្អុយនៅក្នុងថង់បា្លស្ទិចរុំបិទជិត កាលពីថ្ងៃទី២១ ខែមីនា ឆ្នាំ២០១៤ ស្ថិតនៅតាមបណ្ដោយ ផ្លូវជាតិលេខ ៤ ក្នុងភូមិទី៦ ឃុំត្រែងត្រយឹង ស្រុកភ្នំស្រួច ខេត្ដកំពង់ស្ពឺ ៕</span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/September/id-068/HOU-0520.jpg" alt="" width="550" /></span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/September/id-068/HOU-0505.jpg" alt="" width="550" /></span></p>
<p style="text-align: center;"><span style="color: #000000;"><img title=" " src="http://image.dap-news.com:81/dap-news/dap-images/2014/September/id-068/HOU-0506.jpg" alt="" width="550" /></span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/September/id-068/HOU-0507.jpg" alt="" width="550" /></span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/September/id-068/HOU-0508.jpg" alt="" width="550" /></span></p>
<p style="text-align: center;"><span style="color: #000000;"><img title=" " src="http://image.dap-news.com:81/dap-news/dap-images/2014/August/id-011/Hong-0245.jpg" alt="" width="550" /></span></p>
<p style="text-align: center;"><span style="color: #000000;"><img title=" " src="http://image.dap-news.com:81/dap-news/dap-images/2014/August/id-067/CH-00626.jpg" alt="" width="550" /></span></p>
<p style="text-align: center;"><span style="color: #000000;"><img title=" " src="http://image.dap-news.com:81/dap-news/dap-images/2014/August/id-067/CH-00627.jpg" alt="" width="550" /></span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/August/id-067/CH-00628.jpg" alt="" width="550" /></span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/August/id-067/CH-00629.jpg" alt="" width="550" /></span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/August/id-067/CH-00630.jpg" alt="" width="550" /></span></p>
<p style="text-align: center;"><span style="color: #000000;"><img src="http://image.dap-news.com:81/dap-news/dap-images/2014/August/id-067/CH-00631.jpg" alt="" width="550" /></span></p>
</div>
<p style="text-align: right;"><a href="http://www.dap-news.com/2011-06-14-02-39-55/95139-2014-09-14-10-31-24.html" target="_blank"><span style="color: #000000;">ផ្តល់សិទ្ធដោយ ៖ ដើមអម្ពិល</span></a></p>