<p>ទ្រព្យសម្បត្តិសកម្មសុទ្ធរបស់មហាសដ្ឋី Lui Che-Woo ស្ថាបនិកក្រុមហ៊ុនគ្រប់គ្រងបនស្បែង Galaxy Entertainment Group បានកើនឡើងបន្ថែម ១ម៉ឺន ២ពាន់លាន ដុល្លារអាមេរិក ក្នុងឆ្នាំនេះ ធ្វើឱ្យគាត់ក្លាយជាអ្នកមានបំផុតលំដាប់ទីពីរនៅអាស៊ី។ ដោយឡែកនៅក្នុងថ្ងៃទី ៣ខែតុលា ឆ្នាំ ២០១៣ នេះ លោក Lui Che-Woo រកបាន ១ពាន់លានដុល្លារ។</p>
<p style="text-align: center;"><a class="thickbox" title="" href="/FileManager/Commons/2013/10/7/casino-07-10-2013--15-53-41.jpg"><img src="/FileManager/Articles/mce/2013/10/7/casino-07-10-2013--15-53-41.jpg" alt="" /></a></p>
<p style="text-align: center;"><em>មហាសដ្ឋី Lui Che-Woo ស្ថាបនិកក្រុមហ៊ុនគ្រប់គ្រងបនស្បែង Galaxy Entertainment Group</em></p>
<p>យោងតាមគេហទំព័រ Bloomberg កម្រិតនៃការមានបានរបស់លោក Lui Che-Woo បានកើនឡើងយ៉ាងឆាប់រហ័សបែបនេះ គឺដោយសារ កាស៊ីណូ នៅ Macau រកប្រាក់ចំណូលបានច្រើនបំផុតមិនធ្លាប់មានពីមុនមក នាំឱ្យតម្លៃភាគហ៊ុនរបស់ Galaxy Entertainment ឡើងខ្ពស់។<br /><br />បញ្ជីចំណាត់ថ្នាក់មហាសេដ្ឋី Bloomberg Billionaires Index បានបង្ហាញថា តម្លៃទ្រព្យសកម្មសុទ្ធរបស់លោក Lui Che-Woo បច្ចុប្បន្ន មានចំនួន ២២,១០០លានដុល្លារ។ នៅក្នុងតំបន់អាស៊ី មានតែមហាសេដ្ឋីមួយរូបប៉ុណ្ណោះដែលមានទ្រព្យច្រើនជាង លោក Lui Che-Woo នោះគឺ មហាសេដ្ឋី Li Ka-Shing ចិនហុងកុង។ ដោយឡែកក្នុងឆ្នាំនេះ លោក Lui Che-Woo បានលោតទៅឈរលំដាប់ខ្ពស់ជាងមហាសេដ្ឋីមួយចំនួន របស់អាស៊ី អំពីទ្រព្យសម្បត្តិ រួមមានមហាសេដ្ឋី Lee Shau-Kee និង Cheng Yu-Tung របស់ហុងកុង កំពូលអ្នកមាន Mukesh Ambani របស់ឥណ្ឌា និងមហាសេដ្ឋីនី Gina Rinehart របស់ Australia ។<br /><br />នៅក្នុងលំដាប់ពិភពលោក មានតែមហាសេដ្ឋីពីររួបប៉ុណ្ណោះ គឺលោក Mark Zuckerberg ស្ថាបនិក Facebook និង Ingvar Kamprad ស្ថាបនិករបស់បណ្ដាញលក់រាយគ្រឿងសង្ហារឹម Ikea ដែលរកបានប្រាក់ច្រើនជាង លោក Lui Che-Woo ក្នុងរយៈពេលពីដើមឆ្នាំរហូតមកដល់ពេលនេះ។<br /><br />សូមបញ្ជាក់ថា ឆ្នាំនេះ លោក Lui Che-Woo មានអាយុ ៨៤ឆ្នាំ ជាមហាសេដ្ឋីម្នាក់ដែលកំពុងកាន់កាប់អាជ្ញាបណ្ណបនល្បែងចំនួន ៦ នៅ Macau ហើយគាត់ក៏ជាគូប្រជែងដ៏ធំ របស់មេបនល្បែងលំដាប់កំពូលនានាក្នុងតំបន់នេះ រួមមាន Steve Wynn, Sheldon Adelson, ពុក និងកូន Stanley Ho និង Lawrence Ho រួមនឹង James Packer ផងដែរ។ លោក Lui Che-Woo និងកូនប្រុស Francis កំពុងពង្រីកបណ្ដាញបនល្បែងធំបំផុតរបស់ Galaxy Entertainment នោះគឺGalaxy Macau នៅ Cotai ក្នុងតំបន់ Macau ដើម្បីឆ្លើយតបនឹងចំនួនភ្ញៀវដែលបានកើនឡើងខ្ពស់បំផុត ក្នុងនោះ ភាគច្រើនគឺភ្ញៀវមកពីចិនដីគោក។<br /><br />យោងតាមការព្យាករណ៍របស់ធនាគារ Deutsche Bank AG នៅហុងកុង ប្រាក់ចំណូលក្នុងវិស័យបនល្បែងនៅ Macau ឆ្នាំនេះនឹងកើនឡើង ១៧% ធៀបនឹងឆ្នាំកន្លង ដោយមានប្រាក់ចំណូល ៤៤,៥០០ លានដុល្លារ ខ្ពស់ជាងច្រើន ធៀបនឹង ៣៨,០០០លានដុល្លារ ក្នុងឆ្នាំ ២០១២ ។<br /><br />មហាសេដ្ឋី Lui Che-Woo កើតឆ្នាំ ១៩២៩ ក្នុងក្រុង Jiangmen ខេត្រ Guangdong ប្រទេសចិនបន្ទាប់ពីគ្រួសាររបស់គាត់ត្រឡប់មកពី San Francisco អាមេរិក ជាកន្លែងដែលគ្រួសារគាត់រកបានប្រាក់មួយចំនួនពីមុខរបរបោកគក់។ ឆ្នាំ ១៩៣៤ លោកក៏បានមកកាន់ហុងកុងជាមួយគ្រួសារ។ នៅពេលលោកមានអាយុ ១៣ឆ្នាំ លោកបានជួយគ្រួសារដោយការលក់អាហារនៅតាមដងផ្លូវ។<br /><br />នៅពេលសង្គ្រាមលោកលើកទីពីរបានបញ្ចប់ លោក Lui Che-Woo ក៏បានទិញយកឧបករណ៍សាងសង់ចាស់ៗពីកងទ័ពអាមេរិក នៅ Okinawa ប្រទេសជប៉ុន នាំមកហុងកុង ដើម្បីលក់ ខណៈដែលតម្រូវការនៃការសាងសង់កើនឡើងខ្ពស់។ លោកក៏បានចាប់ផ្ដើមមានប្រាក់ចំណូលច្រើន ចាប់ពីពេលនោះ។ ពេលមានទុន លោកក៏បានបែរមកសាងសង់គម្រោងអចលនទ្រព្យ ដូចជាផ្ទះ និងសណ្ឋាគារ។<br /><br />ឆ្នាំ ២០០២ ពេលដែល Macau បានបញ្ចប់សិទ្ធិផ្ដាច់មុខរយៈពេល ៤ទសវត្សរបស់បនល្បែង Stanley Ho ក្រុមហ៊ុន Galaxy Casino របស់លោក Lui Che-Woo រួមនឹង Las Vegas Sands របស់ Adelson សហការណ៍គ្នា និងទទួលបានអាជ្ញាបណ្ណ កាស៊ីណូ មួយ។ បីឆ្នាំក្រោយ សម្ព័ន្ធមិត្តនេះ បានបែកបាក់ ដោយសារតែ Lui Che-Woo និង Adelson ខ្វែងគំនិតគ្នា។</p>
<p style="text-align: center;"><a class="thickbox" title="" href="/FileManager/Commons/2013/10/7/casino1-07-10-2013--15-55-29.jpg"><img src="/FileManager/Articles/mce/2013/10/7/casino1-07-10-2013--15-55-29.jpg" alt="" /></a></p>
<p style="text-align: center;"><em>មហាសេដ្ឋី Lui Che-Woo (ឆ្វេង) អគ្គនាយកនៃក្រុមហ៊ុន Galaxy Entertainment Group និងកូនប្រុស Francis Lui ជាអគ្គនាយករង</em></p>
<p>ឆ្នាំ ២០០៦ Lui Che-Woo បានបើក កាស៊ីណូ StarWorld Macau នៅក្បែរបនល្បែង Grand Lisboa របស់ Stanley Ho ។ មកដល់ឆ្នាំ ២០១១ លោកក៏បានពង្រីកបន្ថែម បនល្បែង និងសណ្ឋាគារ ២,២០០បន្ទប់ ដែលមានតម្លៃ ១,៩០០លានដុល្លារ ឈ្មោះ Galaxy Macau ។ <br /><br />ក្នុងរយៈពេល ១២ខែកន្លង តម្លៃភាគហ៊ុនរបស់ Galaxy Macau បានកើនឡើង ១២២% ។ កាលពីថ្ងៃទី ៣ ខែតុលាឆ្នាំ ២០១៣ តម្លៃភាគហ៊ុននេះ បានកើនខ្ពស់បំផុត ជួយឱ្យលោក Lui Che-Woo រកបាន ១ពាន់លានដុល្លារ ក្នុងរយៈពេលត្រឹមតែមួយថ្ងៃ។ បច្ចុប្បន្ន Lui Che-Woo កាន់កាប់ភាគហ៊ុន ចំនួន ៦៥% នៅ Galaxy Casino ។</p>
<p style="text-align: right;"><br /><br />ដោយ ៖ តារា<br />ប្រភព ៖ Bloomberg</p>