<p>តាំងតែពីតូច ជនជាតិកូរ៉េខាងជើង ត្រូវបានបង្រៀនឱ្យមានការគោរពចំពោះមេដឹកនាំប្រទេសរបស់ខ្លួន ជាងគោរពពុកម្ដាយ ប្រសិនមិនអាចធ្វើបានល្អនូវប្រការនេះ ពួកគេប្រាកដជាត្រូវទទួលទោស។</p>
<p style="text-align: center;"><a class="thickbox" title="" href="/FileManager/Commons/2013/10/21/kkk1-21-10-2013--17-59-19.jpg"><img src="/FileManager/Articles/mce/2013/10/21/kkk1-21-10-2013--17-59-19.jpg" alt="" /></a></p>
<p><br /><strong>យំ “មិនស្មោះត្រង់” ក៏ត្រូវនាំខ្លួនទៅរៀនសូត្រ?</strong></p>
<p>ទំព័រ NBC News របស់អាមេរិក ធ្លាប់បានដកស្រង់ព័ត៌មាន ពី Daily NK ឱ្យដឹងថា ប្រជាជនកូរ៉េខាងជើង ប្រសិនមិនយំ ឬក៏យំមិនស្មោះត្រង់ ក្នុងអំឡុងពិធីបុណ្យសពអតីតមេដឹកនាំ Kim Jong Il គឺសុទ្ធតែត្រូវបានចាប់ខ្លួន និងបញ្ជូនទៅរៀនសូត្រ ធ្វើពលកម្ម នៅតំបន់ដាច់ស្រយាលនិងរស់នៅឆ្ងាយពីក្រុមគ្រួសារ។<br /><br />ប្រភពព័ត៌មានពីខេត្រ Hamkyung ខាងត្បូង ឱ្យដឹងថា ៖ “ក្រុមសមត្ថកិច្ចបានចេញបញ្ជាឱ្យចាប់ខ្លួន និងដាក់ពិន័យឱ្យទៅពលកម្ម យ៉ាងតិច ៦ខែ ចំពោះអ្នកណាដែលមិនបានចូលរួមពិធីបុណ្យសពរបស់មេដឹកនាំជាតិ ឬបានចូលរួម ប៉ុន្ដែមិនយំ ឬមួយយំ តែយំមិនស្មោះត្រង់។<br /> <br />យ៉ាងនេះក្ដី កូរ៉េខាងជើង បានបញ្ចេញប្រតិកម្ម បដិសេធព័ត៌មាននេះ ហើយថា វាគ្រាន់តែជាល្បិចរបស់ក្រុមសារព័ត៌មានកំសាក ស្ថិតក្រោមការគ្រប់គ្រង់របស់ក្រុមក្បត់ ដែលមានទំនាក់ទំនងជាមួយប្រធានាធិបតីកូរ៉េខាងត្បូង ដែលពេលនោះ គឺលោក Lee Myung Bak ។<br /><br />លោក Hwang Jang Yop អតីតមន្ដ្រីម្នាក់របស់កូរ៉េខាងជើង បច្ចុប្បន្ន រស់នៅបរទេស បានបង្ហើបឱ្យដឹងថា ការដាក់ទោសប្រហាក់ប្រហែលនេះ បានកើតឡើងចំពោះប្រជាជនកូរ៉េខាងជើង កាលពីជំនាន់មេដឹកនាំ Kim Il Sung ទទួលមរណភាព ឆ្នាំ ១៩៩៤ ។ លោកបន្ដថា ៖ “បក្សនឹងធ្វើការស្រាវជ្រាវ រកឱ្យឃើញថា អ្នកណាមានទុក្ខព្រួយបំផុត ហើយថា នោះគឺជាគោលការណ៍សំខាន់ដើម្បីវាយតម្លៃលើការស្មោះត្រង់របស់បក្សជន។ ចំណែកអ្នកផឹកស្រា និងបង្ហាញអំពីការសប្បាយរីករាយ បន្ទាប់ពីបានឮដំណឹងមេដឹកនាំទទួលមរណភាព សុទ្ធតែត្រូវបានដាក់ទោស” ។</p>
<p style="text-align: center;"><a class="thickbox" title="" href="/FileManager/Commons/2013/10/21/kkk3-21-10-2013--18-03-03.jpg"><img src="/FileManager/Articles/mce/2013/10/21/kkk3-21-10-2013--18-03-03.jpg" alt="" /></a></p>
<p><br /><strong>ត្រូវកាត់ទោសប្រហារជីវិត ព្រោះផឹកស្រាក្នុងអំឡុងពេលកាន់ទុក្ខមេដឹកនាំប្រទេស</strong></p>
<p>អ្វីដែលលោក Hwang Jang Yop បាននិយាយ ប្រហែលជាមិនមែនបំផ្លើសនោះទេ។ កាលពីខែមករា ឆ្នាំ ២០១២ សារព័ត៌មានកូរ៉េខាងត្បូង និងអឺរ៉ុប បានរាយការណ៍ថា អនុរដ្ឋមន្ដ្រីនៃក្រសួងការពារជាតិកូរ៉េខាងជើង លោក Kim Chol ត្រូវបានប្រហារជីវិត ដោយសារតែផឹកស្រាក្នុងអំឡុងពេលកាន់ទុក្ខ ១០០ថ្ងៃ នៃសពលោក Kim Jong Il ។<br /><br />សារព័ត៌មានកូរ៉េខាងត្បូង ក៏បានឱ្យដឹងថា ក្រៅពីលោក Kim Chol ក៏នៅមានមន្ដ្រីរដ្ឋាភិបាល និងយោធា ១៣រូបផ្សេងទៀត ត្រូវកាត់ទោសប្រហារជីវិត ទាក់ទិននឹងការផឹកស្រា ឬរឿងអាស្រូវផ្លូវភេទ ក្នុងអំឡុងពេល “ក្រហម” នេះ។<br /><br />ក្នុងអំឡុងពេលកាន់ទុក្ខមរណភាពមេដឹកនាំនៅកូរ៉េខាងជើង នាពេលកន្លង មេដឹកនាំវ័យក្មេង លោក Kim Jong Un បានចេញបញ្ជា ហាមប្រជាជនទាំងអស់ មិនឱ្យផឹកស្រា រាំច្រៀង ជជែកគ្នា សើចសប្បាយ ប្រសិនបំពាន ពួកគេនឹងត្រូវទទួលទោស។<br /><br />អតីតចារនារីរបស់កូរ៉េខាងជើង នាង Kim Huyn Hee ដែលធ្លាប់ធ្វើឱ្យមនុស្សជាង ១០០នាក់បាត់បង់ជីវិត ក្នុងករណីបំផ្ទុះគ្រាប់បែកលើយន្ដហោះស៊ីវិលរបស់កូរ៉េខាងត្បូង បច្ចុប្បន្នរស់នៅបរទេស ឱ្យដឹងថា ៖ “នៅកូរ៉េខាងជើង យើងខ្ញុំត្រូវបានបង្រៀនឱ្យចាត់ទុកមេដឹកនាំប្រទេសជាធំ ជាងពុកម្ដាយរបស់ខ្លួន។ អ្នកត្រូវរៀននិយាយតាំងពីក្មេងនូវឃ្លា ៖ “អរគុណមេដឹកនាំ ដែលបានប្រទានអ្វីៗទាំងអស់ដល់យើង។ នៅពេលអ្នកនិយាយអ្វីមួយខុស បើទោះជាគ្រាន់តែនិយាយលេង ក៏នឹងត្រូវនាំខ្លួនទៅកែប្រែ” ។</p>
<p style="text-align: center;"><a class="thickbox" title="" href="/FileManager/Commons/2013/10/21/kkk4-21-10-2013--18-07-06.jpg"><img src="/FileManager/Articles/mce/2013/10/21/kkk4-21-10-2013--18-07-06.jpg" alt="" /></a></p>
<p><br /><strong>គោរពរូបថត ដូចគោរពមនុស្ស</strong></p>
<p>មិនត្រឹមតែគោរពមេដឹកប្រទេសនោះទេ ជនជាតិកូរ៉េខាងជើង ក៏ត្រូវគោរពដល់រូបថត និងរូបសំណាករបស់មេដឹកនាំ ដូចទៅនឹងមនុស្សពិត។<br /><br />គ្រួសារប្រជាជនទាំងអស់ នៅពេលមានតាំងរូបថត ឬរូបសំណាកអតីតមេដឹកនាំ Kim Il Sung និង Kim Jong Il គឺសុទ្ធតែមិនត្រូវបានអនុញ្ញាតឱ្យមានធូលីជាប់បីកលរួបទាំងនោះ។ ពិសេស ហាមមិនឱ្យហែក ឆេះ បណ្ដារូបនៅលើកាសែតដែលមានរូបភាពរបស់ Kim Il Sung និង Kim Jong Il ។ នៅពេលអ្នកណាបំពាន អ្នកនោះនឹងទទួលការដាក់ទោស។</p>
<p style="text-align: right;"><br /><br />ប្រែសម្រួលដោយ ៖ តារា<br />ប្រភព ៖ NBC/SH</p>