<p><strong>ភ្នំពេញ៖</strong> អតិថិជនដែលប្រើប្រាស់ សេវាកម្មអ៊ីធើណេតរបស់ក្រុមហ៊ុន Opennet ដែលគេស្គាល់ថា ជាការវិនិយោគរបស់ក្រុមហ៊ុន វៀតណាម បានរិះគន់ចំៗទៅលើក្រុមហ៊ុននេះថា មិនឲ្យតម្លៃរូបិយ ប័ណ្ណកម្ពុជា ជាប្រាក់រៀលនោះឡើយ ពោលគឺបង់ប្រាក់ខ្មែរ មានតម្លៃខ្ពស់ ជាងការដូរប្រាក់ ដុល្លារនៅលើទីផ្សារ ។</p>
<p>អតិថិជនរបស់ Opennet មួយរូប បានប្រាប់ Looking TODAY ក្នុងលក្ខខណ្ឌសុំមិនបញ្ចេញឈ្មោះថា ខ្លួនខឹងចិត្តនឹងក្រុមហ៊ុនផ្តល់សេវាអ៊ីធើណេត Opennet មួយនេះណាស់ ក៏ព្រោះថា ក្រុមហ៊ុនហាក់ មិនឲ្យតម្លៃប្រាក់រៀលខ្មែរទាល់តែសោះ ពោលគឺលើកទឹកចិត្តឲ្យអតិថិជនរបស់ខ្លួន បង់សេវាតែ ប្រាក់ដុល្លារ។</p>
<p>អតិថិជនរូបនោះនិយាយទៀតថា ហេតុដែលខ្លួនហ៊ាននិយាយដូច្នេះ ព្រោះថាពេលដែលទៅបង់ ថ្លៃសេវាជារៀងរាល់ខែ ខាងក្រុមហ៊ុនបានសរសេរអក្សធំៗ នៅកន្លែងទទួលលុយថា «១ដុល្លារ = ៤២៥០រៀល» គឺតម្លៃ១ដុល្លារ នៅលើទីផ្សារថ្លៃមិនដល់ ៤១០០រៀលផង។</p>
<p>នៅពេលដែលបង់សេវាលុយរៀល ពួកគេតម្រូវឲ្យគិតអត្រាប្រាក់ ១ដុល្លារ ស្មើនឹង ៤២៥០រៀល ទើបយល់ព្រម។ នេះហើយបញ្ជាក់ថា ក្រុមហ៊ុនរបស់វៀតណាមមួយនេះ រើសអើងប្រាក់រៀលខ្មែរ និយមតែប្រាក់ដុល្លារប៉ុណ្ណោះ បើទោះបីគេកំពុងរកស៊ីលើទឹកដីខ្មែរក្តី។</p>
<p>ពាក់ព័ន្ធនឹងក្រុមហ៊ុនអ៊ីធើណេត Opennet នេះ ដែល មានអតិថជនមួយចំនួន អ្អូញត្អែរថា សេវា អ៊ីធើណេត របស់ក្រុមហ៊ុននេះ មានដំណើការរអាក់រអួល និង ដើរយឺតផងដែរ ដែលធ្វើឲ្យពួកគេ តឹងចិត្តយ៉ាងខ្លាំង។</p>
<p>អង្គភាពព័ត៌មានយើងខ្ញុំ មិនទាន់អាចសុំការអត្ថាធិប្បាយ ពីការរិះគន់របស់អតិថិជនលើ ក្រុមហ៊ុន Opennet បានទេ នារសៀលថ្ងៃទី ៦ ខែធ្នូ ឆ្នាំ២០១៣នេះ៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2013/December/id-065/PISETH-057.jpg" alt="" width="600" /></p>
<p style="text-align: right;">ផ្តល់សិទ្ធិដោយ៖ <a href="http://www.lookingtoday.com/index.php/entertainment-general-news/25302--opennet-.html"><span style="color: #0000ff;">ដើមអំពិល</span></a></p>