<p><span style="color: #000000;"><strong>ភ្នំពេញ ៖</strong> ឃ្លីបវីដេអូ ដែលមានរយៈពេល ៤នាទី និង១៧វិនាទី របស់ឧកញ៉ា ថោង សារ៉ាត់ បានធ្វើការបដិសេធថា ខ្លួន និងអង្គរក្ស មិនមែនជាឃាតក និងអ្នកនៅពីក្រោយខ្នង នៃអំពើឃាតកម្ម បាញ់សម្លាប់ទៅលើឧកញ៉ា អ៊ឹង ម៉េងជឺ នោះឡើយ ដោយលោកចាត់ទុកការចោទប្រកាន់មកលើរូបលោក គឺជារឿងមានបំណង ចង់ធ្វើបាបមកលើរូបលោក ខណៈដែលរូបលោករកស៊ីមានបាន ។ ក្នុងនោះ នៅក្នុងឃ្លីបវីដេអូ ឧកញ៉ា ថោង សារ៉ាត់ ក៏បានអំពាវនាវសូមឲ្យ សម្តេចនាយករដ្ឋមន្រ្តី ហ៊ុន សែន ជួយអន្តរាគមន៍ រកយុត្តិធម៌ឲ្យរូបគាត់ផងដែរ ។</span></p>
<p><span style="color: #000000;">នេះគឺជាឃ្លីបវីដេអូទី១ហើយ ដែលឧកញ៉ា ថោង សារ៉ាត់ បានចេញមុខធ្វើការបដិសេធ ដោយបញ្ចេញរូបភាពផ្ទាល់ ខណៈដែលកន្លងទៅ ការធ្វើការអំពាវនាវសូមឲ្យសម្តេចតេជោ ហ៊ុន សែន ជួយអន្តរាគមន៍ រកយុត្តិធម៌ និងធ្វើការបដិ សេធថា រូបលោក និងអង្គរក្ស មិនមែនជាអ្នកបញ្ជា និងជាឃាតកនោះ គឺមានត្រឹមតែខ្សែអាត់សំឡេងប៉ុណ្ណោះ ដែល ខ្សែអាត់សំឡេងនោះ ត្រូវបានមតិមួយចំនួនធ្វើការអះអាងថា វាមិនមែនជាសំឡេងរបស់ឧកញ៉ា ថោង សារ៉ាត់នោះទេ គឺមានគេបន្លំធ្វើ ដើម្បីទម្លាក់កំហុសមកលើសមត្ថកិច្ចតែប៉ុណ្ណោះ ។</span></p>
<p><span style="color: #000000;">ឃ្លីបវីដេអូ ដែលឧកញ៉ា ថោង សារ៉ាត់ ថត និងបង្ហោះនៅលើបណ្តាញទំនាក់ទំនងសង្គម ដើម្បីធ្វើការបដិសេធ និង អំពាវនាវ សុំការអន្តរាគមន៍ផ្តល់យុត្តិធម៌ពីនាយករដ្ឋមន្រ្តីនោះ លោក ថោង សារ៉ាត់ បានថ្លែងឲ្យដឹងថា រូបលោក និង អង្គរក្ស រងនូវភាពអយុត្តិធម៌ពីការចោទប្រកាន់របស់សមត្ថកិច្ច ។ ក្នុងនោះ លោកបានលើកយកហេតុផលចំនួន ២ យ៉ាងមកបញ្ជាក់ ដើម្បីធ្វើជាអំណះអំណាងថា រូបលោក និងអង្គរក្ស មិនមែនជាឃាតក និងជាអ្នកបញ្ជានៅពីក្រោយខ្នង ដោយទី១ លោកបានអះអាងថា រវាងរូបលោក និងឧកញ៉ា អ៊ឹង ម៉េងជឺ មិនដែលធ្លាប់ស្គាល់គ្នា គ្មានទំនាក់ ទំនងរកស៊ីអ្វីជាមួយគ្នា គ្មានដីជាប់ព្រំគ្នា និងគ្មានមូលហេតុអ្វីដែលលោកត្រូវសម្លាប់គាត់នោះឡើយ និងទី២ បើអង្គ រក្សរបស់លោកជាឃាតក គឺពួកគេមិនហ៊ានជិះម៉ូតូទៅណាមកណាជាមួយលោកនោះឡើយ ព្រោះតែរូបភាពឃ្លីបវីដេអូ ឃាតកបាញ់សម្លាប់ឧកញ៉ា អ៊ឹង ម៉េងជឺ ត្រូវបានគេធ្វើការផ្សព្វផ្សាយជាសាធារណៈអស់ទៅហើយ ដូចេ្នះគេអាចស្គាល់ បាន ។ មិនតែប៉ុណ្ណោះ ឧកញ៉ា ថោង សារ៉ាត់ បានធ្វើការបញ្ជាក់បន្ថែមថា ឃាតកដែលបាញ់សម្លាប់ឧកញ៉ា អ៊ឹង ម៉េងជឺ គឺជាមនុស្សកាន់កាំភ្លើងដៃស្តាំ រីឯអង្គរក្សរបស់លោក ដែលសមត្ថកិច្ចចោទថា ជាជនដៃដល់ឈ្មោះ សៀង វាសនា នោះ គឺប្រើកាំភ្លើងដៃឆ្វេងតែប៉ុណ្ណោះ ហើយករណីសមត្ថកិច្ចឃាត់ខ្លួន ដំបូងឡើយគឺឃាត់ខ្លួនតែឈ្មោះ មាស សម្បត្តិ និង កូយ ចាន់ថុល តែប៉ុណ្ណោះ រីឯឈ្មោះ លី សៅ និង សៀង វាសនា ដែលសមត្ថកិច្ចចោទថា ជាឃាតក និង ជាអ្នកបើកម៉ូតូនោះ គឺត្រូវបានរូបលោកនាំទៅកាន់ស្នងការដ្ឋានឲ្យសមត្ថកិច្ចធ្វើការសាកសួរតែប៉ុណ្ណោះ ហើយបើគេជាឃាតកពិតមែន ច្បាស់ជារត់គេចខ្លួនបាត់ទៅហើយ មិនទៅឲ្យសមត្ថកិច្ចចាប់ខ្លួននោះទេ ។</span></p>
<p><span style="color: #000000;">ការអះអាងត្រង់ចំណុច ចុងក្រោយនេះ ត្រូវបានសមត្ថកិច្ចមួយរូប ធ្វើការអះអាងថា ឧកញ៉ា ថោង សារ៉ាត់ និយាយ បំផ្លើស ព្រោះតែឈ្មោះ លី សៅ មិនមែនឧកញ៉ា ថោង សារ៉ាត់ ជាអ្នកនាំយកទៅឲ្យសមត្ថកិច្ចនោះឡើយ គឺសមត្ថកិច្ច ជាអ្នកទៅនាំខ្លួន ខណៈដែលឧកញ៉ា ថោង សារ៉ាត់ បានរត់គេចខ្លួនបាត់ទៅហើយ ។</span></p>
<p><span style="color: #000000;">ជាការកត់សម្គាល់ ករណីឃាតកម្មបាញ់សម្លាប់ឧកញ៉ា អ៊ឹង ម៉េងជឺ និងករណីសមត្ថកិច្ចវែកមុខឃាតក និងជនដៃដល់ នៅពីក្រោយខ្នង ដែលសមត្ថកិច្ចអះអាងថា គឺឧកញ៉ា ថោង សារ៉ាត់ ជាមេខ្លោង និងអង្គរក្សជាជនដៃដល់នោះ រហូត មកដល់ពេលនេះ នៅតែជាព័ត៌មានដែលសាធារណជនចង់ដឹង ដោយសារតែសមត្ថកិច្ចបានរកឃើញបទល្មើសចាប់ ខ្លួនបញ្ជូនទៅតុលាការ ធ្វើការចោទប្រកាន់ និងឃុំខ្លួនរួចមកហើយ ដោយសមត្ថកិច្ចអះអាងថា មានភស្តុតាងគ្រប់ គ្រាន់ តែបែរជាឧកញ៉ា ថោង សារ៉ាត់ ដែលគេចាត់ទុកថា ជាមេខ្លោងធំនោះ នៅតែចេញមុខធ្វើការបដិសេធ និងចោទ ប្រកាន់ទៅលើសមត្ថកិច្ចថា មានបំណងធ្វើបាបរូបគេទៅវិញ ។</span></p>
<p><span style="color: #000000;">សូមបញ្ជាក់ថា ឧកញ៉ា អ៊ឹង ម៉េងជឺ ថៅកែស៊ីម៉ង់ត៍ត្បូងពេជ្រ និងជាម្ចាស់ហាងលក់គ្រឿងអលង្ការហុងកុង ត្រូវបាន ឃាតក បាញ់សម្លាប់ជាច្រើនគ្រាប់ កាលពីយប់ថ្ងៃទី២២ ខែវិច្ឆិកា ឆ្នាំ២០១៤ ពេលកំពុងចុះទិញផ្លែឈើនៅក្បែរ ពហុ កីឡដ្ឋានអូឡាំពិក ៕</span></p>
<p><span style="color: #000000;"><a class="thickbox" title="" href="/FileManager/Commons/2014/12/20/12-20-2014-8-15-42-am-20-12-2014--08-20-27.png"><img src="/FileManager/Articles/mce/2014/12/20/12-20-2014-8-15-42-am-20-12-2014--08-20-27.png" alt="" /></a></span></p>
<p><object width="500" height="400" data="http://www.youtube.com/v/-rbgbbYGOF0&rel=1" type="application/x-shockwave-flash"><param name="wmode" value="transparent" /><param name="src" value="http://www.youtube.com/v/-rbgbbYGOF0&rel=1" /></object><span style="color: #000000;"><br /></span></p>
<p style="text-align: right;"><span style="color: #000000;">ផ្ដល់សិទ្ធដោយ៖ ដើមអម្ពិល</span></p>