<p><span style="color: #000000;"><strong>ក្រុងម៉ាឌ្រីដ៖</strong> កីឡាករខ្សែប្រយុទ្ធជួរមុខ Cristiano Ronaldo អាចវិលចូលទីលាន បានវិញហើយ ក្រោយពីជារបួសជើង ពោលគឺចំពេល ដែលក្លឹបស្តេចស Real Madrid ជួបប្រកួតទល់នឹងក្រុមភ្ញៀវ Atletico Madrid នាម៉ោង ០១ និង ០០ នាទីរំលងអាធ្រាត្រយប់នេះ (ម៉ោងនៅកម្ពុជា) ។</span></p>
<p><span style="color: #000000;">នេះជាមួយប្រកួតដ៏សំខាន់សម្រាប់របស់លោក Carlo Ancelotti ក្នុងព្រឹត្តិការណ៍ពានរង្វាន់ La Liga BBVA ប្រចាំ សប្តាហ៍ទី៣រដូវកាល ឆ្នាំ២០១៤-២០១៥នេះទល់នឹងក្រុម ការពារតំណែងជើង ឯករបស់លោក Diego Simeone ដែលទើបបានចាញ់ប្រកួតនៅទឹកដីក្រៅផ្ទះ និងប្រកួតស្មើ ១-១ ក្នុងព្រឹត្តិការណ៍ ពានបើករដូវកាល Spanish-Super Cup ។</span></p>
<p><span style="color: #000000;">តារាឆ្នើមជនជាតិព័រទុយហ្គាល់ វ័យ២៨ឆ្នាំ Ronaldo បានទទួលរងរបួសជើងបន្តិចបន្ទួច បន្ទាប់ពីប្រកួតឈ្នះក្រុមភ្ញៀវ Cordoba ២-០ នៅថ្ងៃបើកឆាក La Liga រដូវកាលថ្មី និងបានធ្វើឲ្យគេខកខាន២ប្រកួត ផងដែរពេល Real ប្រកួតចាញ់ ម្ចាស់ផ្ទះ Real Sociedad ៤-២ និងក្រុមជម្រើសជាតិ ព័រទុយហ្គាល់បរាជ័យ ក្នុងទឹកដីដោយលទ្ធផល ១-០ យ៉ាងអាម៉ាសក្រោម ថ្វីជើងរបស់ក្រុមភ្ញៀវ អាល់បានី (Albania) នៃវគ្គជម្រុះពាន រង្វាន់ប្រចាំទ្វីបអឺរ៉ុប UEFA Euro 2016 ជើងទី១ជុំទី១កាលពីសប្តាហ៍មុន ។</span></p>
<p><span style="color: #000000;">តាមរយៈលោកគ្រូបង្វឹកក្លឹប Real Madrid, Carlo Ancelotti បានអះអាងប្រាប់គេហទំព័រ BBC ថា “Ronaldo បានជា ពីរបួស១០០ភាគរយហើយ ព្រមទាំងបានហ្វឹកហាត់ ជុំគ្នាទៀតកាលពីម្សិលមិញ ។ Ronaldo ជាខ្សែប្រយុទ្ធមួយរូប ដែលមិនអាចខ្វះបាន និងតែងតែ បំប៉ោងសំណាញ់ទី បានស្ទើរតែគ្រប់ការប្រកួតផងដែរ ហើយក៏ជាកីឡាករដែលធ្វើឲ្យ យើងមានទំនុកចិត្តថានឹងទទួលបាន ជ័យជំនះផងដែរ” ។</span></p>
<p><span style="color: #000000;">ក្រុមដែលកំពុងក្តោបក្កាប់ពាន២ក្នុងដៃមាន Copa del Rey និងពាន Champions League ស្តេចសមួយនេះកំពុងស្ថិត លេខរៀងទី១០បណ្តោះអាសន្ន ដោយបានឆ្លងកាត់ ២ប្រកួតឈ្នះ១ និងចាញ់១មិនដែលស្មើ ខណៈដែលគូប្រជែង Barcelona ឈរនៅកំពូលតារាង មាន៦ពិន្ទុពេញ និងក្រុមការពារតំណែង ជើងឯក At.Madrid កំពុងឈរនៅលេខរៀងទី៦ មាន៤ពិន្ទុនៅឡើយ ៕</span></p>
<p><span style="color: #000000;"><a class="thickbox" title="" href="/FileManager/Commons/2014/9/13/msp-0528-13-09-2014--11-42-55.jpg"><img src="/FileManager/Articles/mce/2014/9/13/msp-0528-13-09-2014--11-42-55.jpg" alt="" /></a><br /></span></p>
<p style="text-align: right;"><a href="http://lookingtoday.com/index.php/technology-business-news/34125-ronaldo--real--atmadrid-.html" target="_blank"><span style="color: #000000;">ផ្តល់សិទ្ធដោយ ៖ ដើមអម្ពិល</span></a></p>