<p><strong>ភ្នំពេញ៖</strong> អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានរាយការណ៍ថា នៅខែ មករា ឆ្នាំ២០១៤ នេះ ខ្លួនបានប្រមូលប្រាក់ពន្ធបានជាង ៦៦លានដុល្លារអាម៉េរិក។</p>
<p>យោងតាមសេចក្តីប្រកាស ព័ត៌មានរបស់ អគ្គនាយដ្ឋានពន្ធដារ ចេញផ្សាយកាលពីថ្ងៃទី៧ ខែកុម្ភៈ ឆ្នាំ២០១៤ បានឲ្យដឹងថា កាលពីខែមករា ឆ្នាំ២០១៤ កន្លងទៅអគ្គនាយកពន្ធដារ ប្រមូលប្រាក់ ពន្ធបង់ ចូលថវិកាជាតិ បានចំនួន ២៦៥,៦៩៧ លានរៀល ឬស្មើនឹងប្រមាណជា ៦៦,៤ លានដុល្លារ អាមេរិក កើនឡើង ១៤,៦ ភាគរយបើធៀបទៅនឹង ខែមករាឆ្នាំ២០១៣។</p>
<p>សេចក្ដីប្រកាសព័ត៌ដដែលបានឲ្យដឹងថា ចំណូលពន្ធដារក្នុងឆ្នាំ២០១៤ មានការកើនឡើង គ្រប់ ប្រភេទពន្ធក្នុងនោះ ប្រភេទពន្ធសំខាន់ៗក៏ មានការកើនឡើងផង ដែរដូចជា ពន្ធលើប្រាក់បៀវត្ស កើនឡើង ប្រមាណ ២៤,៨ ភាគរយពន្ធ លើប្រាក់ចំណេញ កើនឡើងចំនួន ៣១,១ ភាគរយ អាករលើតម្លៃបន្ថែម (VAT) កើនឡើងបាន ១១ ភាគរយ។</p>
<p>ទិន្នន័យដដែលនេះក៏បានបង្ហាញថា សម្រាប់ពន្ធតាមវិស័យវិញ ក៏មានការកើនឡើង ស្ទើរគ្រប់ សកម្មភាពផងដែរ ក្នុងនោះផ្នែកសេវា ហិរញ្ញវត្ថុកើនបាន ២៧,៨% ផ្នែកផលិត សម្លៀកបំពាក់ កើនបាន ៣៥% ផ្នែកថ្នាំជក់កើនឡើង ២០៨,៣ %។ ផ្នែកនាំចេញ នាំចូលកើនឡើងប្រមាណ ៤២,៥% ស្ថាបត្យកម្មនិង សំណង់កើនឡើង៤៩% ផ្នែកដឹកជញ្ជូននិង ទេសចរណ៍កើនបាន ២១,៨% អាកាសយានដ្ឋាន និងកំពង់ផែកើនឡើង ១៣៨,៨%សណ្ឋាគារនឹង ផ្ទះសំណាក់កើនឡើងប្រមាណ ២៥,៣% ។</p>
<p>គួរបញ្ជាក់ថា កាលពីឆ្នាំ២០១៣ អគ្គនាយកដ្ឋានពន្ធដារ បានប្រមូលពន្ធចូលថវិកាជាតិ មានចំនួន ប្រមាណជា ៨៨១,៤លានដុល្លារអាមេរិក ការកើនឡើង ១៦,១ ភាគរយបើធៀបទៅនឹងឆ្នាំ២០១២៕</p>
<p style="text-align: center;"><img src="http://image.lookingtoday.com:81/lookingtoday/looking-images/news/2014/February/id-098/S_0160.jpg" alt="" width="600" /></p>
<p style="text-align: right;">ផ្តល់សិទ្ធិដោយ៖ <a href="http://www.lookingtoday.com/index.php/technology-business-news/27394-2014-02-08-03-59-32.html"><span style="color: #0000ff;">ដើមអំពិល</span></a></p>